hālāsya stuti

kalyāṇācala -kodaṇḍa-kāntado-rdaṇḍamaṇḍitam। 
kalambīkṛtakaṃsāriṃ kalaye'ṭṭālasundaram॥ 1 ॥

kālakūṭaprabhā-jāla-kalaṅkīkṛta-kandharam। 
kalādhara-kalāmauliṃ kalaye'ṭṭālasundaram॥ 2 ॥

kālakālaṃ kalātītaṃ kalāvantañca niṣkalam। 
kamalāpatisaṃstutyaṃ kalaye'ṭṭālasundaram॥ 3 ॥

kāntārdhakamanīyāṅgaṃ karuṇāmṛtasāgaram। 
kali-kalmaṣa-doṣaghnaṃ kalaye'ṭṭālasundaram॥ 4 ॥

kadambakānanādhīśaṃ kāṅkṣitārtha-suradrumam। 
kāmaśāsanamīśānaṃ kalaye'ṭṭālasundaram॥ 5 ॥

sṛṣṭāni māyayā tena brahmāṇḍāni bahūni ca। 
rakṣitāni hṛtānyante kalaye'ṭṭālasundaram॥ 6 ॥

svabhaktajana-santāpa-pāpāpadbhaṅga-tatparam। 
kāraṇaṃ sarvajagatāṃ kalaye'ṭṭālasundaram॥ 7 ॥

kulaśekharavaṃśottha-bhūpānāṃ kuladaivatam। 
paripūrṇacidānandaṃ kalaye'ṭṭālasundaram॥ 8 ॥

aṭṭālavīraka-śrīśambhoraṣṭakaṃ paramiṣṭadam। 
paṭhatāṃ śṛṇvatāṃ sadyaḥ tanoti paramāṃ śriyam॥ 9 ॥