hālāsya stuti

paripūrṇa parānanda paracitsatyavigraha।
sundareśvara sarvajña trāhi māparādhinam॥ 1 ||

phālākṣijātajvalana lelihānamanobhava।
jīvanmuktipurīnātha trāhi māparādhinam॥ 2 ||

pārijātaguṇātītapādapaṅkajavaibhava।
kadambakānanādhyakṣa trāhi māparādhinam॥ 3 ||

bhaktaprārthitasarvārthakāmadheno purāntaka।
karuṇāvaruṇāvāsa trāhi māparādhinam॥ 4 ||

kaivalyadānanirata kālakūṭa bhayāpaha।
kanyakānagarīnātha trāhi māparādhinam॥ 5 ||

kamalāpati-vāgīśa-śacīśa-pramukhāmaraiḥ।
paripūjitapādābja trāhi māparādhinam॥ 6 ||

pañcāsya pannagāṅkāṅga parānandapradāyaka।
parvathādhīśajāmātaḥ trāhi māparādhinam॥ 7 ||

parātpara padāmbhojaparidhyānaratātmanām।
kāṅkṣitārthaprada svāmin trāhi māparādhinam॥ 8 ||

sundareśvara sarveśa smara saubhāgyasiddhida।
śrīmatsundarapāṇḍyeśa trāhi māparādhinam॥ 9 ||

aparādhāṣṭakaṃ stotraṃ ya: paṭhettavasannidhau।
tasyānantāparādhañca kṣamasva karuṇāmbudhe॥ 10 ||

sumīnākṣī sundareśau bhaktakalpamahīruhau।
tayoranugraho yatra tatra śoko na vidyate॥ 11 ||