ശിവഭുജങ്ഗ പ്രയാത സ്തോത്രം

Shivabhujanga Prayata Stotram


ശിവായ നമഃ || 

ശിവഭുജങ്ഗ പ്രയാത സ്തോത്രം |   

ഗലദ്ദാനഗണ്ഡം മിലദ്ഭൃങ്ഗഖണ്ഡം ചലച്ചാരുശുണ്ഡം ജഗത്രാണശൗണ്ഡം | 
ലസദ്ദന്തകാണ്ഡം വിപദ്ഭങ്ഗചണ്ഡം ശിവപ്രേമപിണ്ഡം ഭജേ വക്രതുണ്ഡം||൧|| 

അനാദ്യന്തമാദ്യം പരന്തത്ത്വമര്ഥം ചിദാകാരമേകം തുരീയം ത്വമേയം | 
ഹരിബ്രഹ്മമൃഗ്യം പരബ്രഹ്മരൂപം മനോവാഗതീതം മഹഃ ശൈവമീഡേ ||൨||

സ്വശക്ത്യാദി ശക്ത്യ്ന്തസിംഹാസനസ്ഥം മനോഹാരിസര്വാംഗരത്നാദിഭൂഷം |
ജടാഹീന്ദുഗംഗാസ്ഥിശശ്യര്ക്കമൗലിം പരം ശക്തിമിത്രം നുമഃ പഞ്ചവക്ത്രം ||൩||

ശിവേശാനതത്പൂരുഷാഘോരവാമാദിഭിര്ബ്രഹ്മഭിര്ഹൃന്മുഖൈഃ ഷഡ്ഭിരങ്ഗൈഃ |
അനൗപമ്യഷട്ത്രിംശതം തത്ത്വവിദ്യാമതീതം പരം ത്വാം കഥം വേത്തി കോ വാ ||൪|| 

പ്രവാളപ്രവാഹപ്രഭാശോണമര്ധം മരുത്വന്മണിശ്രീമഹഃ ശ്യാമമര്ധം |
ഗുണസ്യൂതമേകം വപുശ്ചേകമന്തഃ സ്മരാമി സ്മരാപത്തിസംപത്തിഹേതും ||൫|| 

സ്വസേവാസമായാത ദേവാസുരേന്ദ്രാ നമന്മൗലിമന്ദാരമാലാഭിഷിക്തം | 
നമസ്യാമി ശംഭോ പദാംഭോരുഹം തേ ഭവാംഭോധിപോതം ഭവാനീവിഭാവ്യം ||൬||

ജഗന്നാഥ മന്നാഥ ഗൗരീസനാഥ പ്രപന്നാനുകംപിന്വിപന്നാര്തിഹാരിന് | 
മഹഃ സ്തോമമൂര്തേ സമസ്തൈകബന്ധോ നമസ്തേ നമസ്തേ പുനസ്തേ നമോഽസ്തു ||൭|| 

മഹാദേവ ദേവേശ ദേവാധിദേവ സ്മരാരേ പുരാരേ യമാരേ ഹരേതി | 
ബ്രുവാണഃ സ്മരിഷ്വാമി ഭക്ത്യാ ഭവന്തം തതോ മേ ദയാശീല ദേവ പ്രസീദ ||൮||

വിരൂപാക്ഷ വിശ്വേശ വിദ്യാദികേശ ത്രയീമൂല ശംഭോ ശിവ ത്ര്യംബക ത്വം | 
പ്രസീദ സ്മര ത്രാഹി പശ്യാവ പുണ്യ ക്ഷമസ്വാപ്നുഹി ത്ര്യക്ഷ പാഹി ത്വമസ്മാന് ||൯|| 

ത്വദന്യഃ ശരണ്യഃ പ്രപന്ന്സ്യ നേതി പ്രസീദ സ്മരന്നവ ഹന്യാസ്തു ദൈന്യം | 
ന ചേത്തേ ഭവേദ്ഭക്തവാത്സല്യഹാനിസ്തതോ മേ ദയാളോ ദയാം സന്നിധേഹി ||൧൦|| 

അയം ദാനകാലസ്ത്വഹം ദാനപാത്രം ഭവാന്നാഥ ദാതാ ത്വദന്യന്ന യാചേ | 
ഭവദ്ഭക്തിമേവ സ്ഥിരാം ദേഹി മഹ്യം കൃപാശീല ശംഭോ കൃതാര്ഥോഽസ്മി തസ്മാത് ||൧൧||

പശും വേത്സി ചേന്മാം ത്വമേവാധിരൂഢഃ കളംകീതി വാ മൂര്ധ്നി ധത്സേ ത്വമേവ | 
ദ്വിജിഹ്വഃ പുനഃ സോഽപി തേ കണ്ഠഭൂഷാ ത്വദങ്ഗകൃതാഃ ശര്വ സര്വേഽപി ധന്യാഃ ||൧൨|| 

ന ശക്നോമി കര്തും പരദ്രോഹലേശം കഥം പ്രീയസേ ത്വം ന ജാനേ ഗിരീശ | 
തദാ ഹി പ്രസന്നോഽസി കസ്യാപി കാന്താസുതദ്രോഹിണോ വാ പിതൃദ്രോഹിണോ വാ ||൧൩|| 

സ്തുതിം ധ്യാനമര്ചാം യഥാവദ്വിധാതും ഭജന്നപ്യജാനന്മഹേശാവലംബേ | 
ത്രസന്തം സുതം ത്രാതുമഗ്രേ മൃകണ്ഡോര്യമപ്രാണനിര്വാപണം ത്വത്പദാബ്ജം ||൧൪|| 

അകണ്ഠേ കളങ്കാദനങ്ഗേ ഭുജങ്ഗാദപാണൗ കപാലാദഭാലേഽനലാക്ഷാത് | 
അമൗലൗ ശശാങ്കാദവാമേ കളത്രാദഹം ദേവമന്യം ന മന്യേ ന മന്യേ ||൧൫|| 

ശിരോദ്രുഷ്ടിഹൃദ്രോഗശൂലപ്രമേഹജ്വരാര്ശോജരായക്ഷ്മഹിക്കാവിഷാര്താന് | 
ത്വമാദ്യോ ഭിഷഗ്ഭേഷജം ഭസ്മ ശംഭോ ത്വമുല്ലാഘയാസ്മാന്വപുര്ലാഘവായ || 

ദരിദ്രോഽസ്മ്യഭദ്രോഽസ്മി ദൂയേ വിഷണ്ണോഽസ്മി സന്നോഽസ്മി ഭിന്നോഽസ്മി ചാഹം | 
ഭവാന്പ്രാണിനാമന്തരാത്മാസി ശംഭോ മമാധിം ന വേത്സി പ്രഭോ രക്ഷ മാം ത്വം ||൧൬|| 

ത്വദക്ഷ്ണോഃ കടാക്ഷഃ പതേത് ത്ര്യക്ഷ യത്ര ക്ഷണം ക്ഷ്മാ ച ലക്ഷ്മീഃ സ്വയം തം വൃണീതേ | 
കിരീടസ്ഫുരച്ചാമരച്ഛത്രമാലാകലാചീഗജക്ഷാമഭൂഷാവിശേഷൈഃ ||൧൭|| 

ഭവാന്യൈ ഭവായാപി മാത്രേ ച പിത്രേ മൃഡാന്യൈ മൃഡായാപ്യഘഘ്നേ  മഖഘ്നേ | 
ശിവാങ്ഗ്യൈ ശിവാങ്ഗായ കുര്മഃ ശിവായൈ ശിവായാംബികായൈ നമസ്യംബകായ ||൧൮|| 

ഭവദ്ഗൗരവം മല്ലഘുത്വം വിദിത്വാ പ്രഭോ രക്ഷ കാരുണ്യദ്രുഷ്ട്യാനുഗം മാം | 
ശിവാത്മാനുഭാവസ്തുതാവക്ഷമോഽഹം സ്വശക്ത്യാ കൃതം മേഽപരാധം ക്ഷമസ്വ ||൧൯|| 

യദാ കര്ണരന്ധ്രം വ്രജേത്കാലവാഹദ്വിഷത്കണ്ഠഘണ്ടാഘണാകാരനാദഃ | 
വൃഷാധീശമാരുഹ്യ ദേവൗപവാഹ്യം തദാ വത്സ മാ ഭീരിതി പ്രീണയ ത്വം ||൨൦|| 

യദാ ദാരുണാ ഭാഷണാ ഭീഷണാ മേ ഭവിഷ്യന്ത്യുപാന്തേ കൃതാന്തസ്യ ദൂതാഃ | 
തദാ മന്മനസ്ത്വത്പദാംഭോരുഹസ്ഥം കഥം നിശ്ചലം സ്യാന്നമസ്തേഽസ്തു ശംഭോ||൨൧|| 

യദാ ദുര്നിവാരവ്യഥോഽഹം ശയാനോ ലുഠന്നിഃശ്വസന്നിഃസൃതാ വ്യക്തവാണിഃ | 
തദാ ജഹ്രുകന്യാജലാലങ്കൃതം തേ ജടാമണ്ഡലം മന്മനോമന്ദിരം സ്യാത് ||൨൨|| 

യദാ പുത്രമിത്രാദയോ മത്സകാശേ രുദന്ത്യസ്യ ഹാ കീദ്രുശീയം ദശേതി | 
തദാ ദേവദേവേശ ഗൗരീശ ശംഭോ നമസ്തേ ശിവായേത്യജസ്രം ബ്രവാണി || ൨൩|| 

യദാ പശ്യതാം മാമസൗ വേത്തി നാസ്മാനയം ശ്വാസ ഏവേതി വാചോ ഭവേയുഃ | 
തദാ ഭൂതിഭൂഷം ഭുജങ്ഗാവനദ്ധം പുരാരേ ഭവന്തം സ്ഫുടം ഭാവയേയം ||൨൪|| 

യദാ യാതനാദേഹ സന്ദേഹവാഹീ ഭവേദാത്മദേഹേ ന മോഹോ മഹാന്മേ | 
തദാ കാശശീതാംശുസങ്കാശമീശ സ്മരാരേ വപുസ്തേ നമസ്തേ സ്മരാണി ||൨൫|| 

യദാ പാരമച്ഛായമസ്ഥാനമദ്ഭിര്ജനൈര്വാ വിഹീനം ഗമിഷ്യാമി മാര്ഗം | 
തദാ തം നിരുബ്ധന്കൃതാന്തസ്യ മാര്ഗം മഹാദേവ മഹ്യം മനോജ്ഞം പ്രയച്ഛ ||൨൬|| 

യദാ രൗരവാദി സ്മരന്നേവ ഭീത്യാ വ്രജാമ്യത്ര മോഹം മഹാദേവ ഘോരം | 
തദാ മാമഹോ നാഥ തസ്താരയിഷ്യത്യനാഥം പരാധീനമര്ധേന്ദുമൗലേ ||൨൭|| 

യദാ ശ്വേതപത്രായതാലങ്ഘ്യശക്തേഃ കൃതാന്താദ്ഭയം ഭക്തവാത്സല്യഭാവാത് | 
തദാ പാഹി മാം പാര്വതീവല്ലഭാന്യം ന പശ്യാമി പാതാരമേതാദ്രുശം മേ ||൨൮||

ഇദാനീമിദാനീം മൃതിര്മേ ഭവിത്രീത്യഹോ സന്തതം ചിന്തയാ പീഡിതോഽസ്മി | 
കഥം നാമ മാ ഭൂന്മൃതൗ ഭീതിരേഷാ നമസ്തേ ഗതീനാം ഗതേ നീലകണ്ഠ ||൨൯|| 

അമര്യാദമേവാഹമാഽഽബാലവൃദ്ധം ഹരന്തം കൃതാന്തം സമീക്ഷ്യാസ്മി ഭീതഃ | 
മൃതൗ താവകാങ്ഘ്ര്യബ്ജദിവ്യപ്രസാദാദ്ഭവാനീപതേ നിര്ഭയോഽഹം ഭവാനി ||൩൦|| 

ജരാജന്മഗര്ഭാധിവാസാദിദുഃഖാന്യസഹ്യാനി ജഹ്യാം ജഗന്നാഥദേവ | 
ഭവന്തം വിനാ മേ ഗതിര്നൈവ ശംഭോ ദയാളോ ന ജാഗര്ത്തി കിം വാ ദയാ തേ || ൩൧|| 

ശിവായേതി ശബ്ദോ നമഃപൂര്വ ഏഷ സ്മരന്മുക്തികൃന്മൃത്യുഹാ തത്ത്വവാചീ |  
മഹേശാന മാ ഗാന്മനസ്തോ വചസ്തഃ സദാ മഹ്യമേതത്പ്രദാനം പ്രയച്ഛ ||൩൨|| 

ത്വമത്യംബ മാം പശ്യ ശീതാംശുമൗലിപ്രിയേ ഭേഷജം ത്വം ഭവവ്യാധിശാന്തൗ | 
ബഹുക്ലേശഭാജം പദാംഭോജപോതേ ഭവാബ്ധൗ നിമഗ്നം നയസ്വാദ്യപാരം || ൩൩|| 

അനുദ്യല്ലലാടാക്ഷിവഹ്നിപ്രരോഹൈരവാമസ്ഫുരച്ചാരുവാമോരുശോഭൈഃ | 
അനങ്ഗഭ്രമദ്ഭോഗിഭൂഷാവിശേഷരചന്ദ്രാര്ധചൂഡൈരലം ദൈവതൈര്നഃ || ൩൪|| 

അകണ്ഠേ കളങ്കാദനങ്ഗേ ഭുജങ്ഗാദപാണൗ കപാലാദഭാലേഽനലാക്ഷാത് | 
അമൗലൗ ശശാങ്കാദവാമേ കളത്രാദഹം ദേവമന്യം ന മന്യേ ന മന്യേ ||൩൫|| 

മഹാദേവ ശംഭോ ഗിരീശ ത്രിശൂലിംസ്ത്വയീദം സമസ്തം വിഭാതീതി യസ്മാത് | 
ശിവാദന്യഥാ ദൈവതം നാഭിജാനേ ശിവോഽഹം ശിവോഽഹം ശിവോഽഹം ||൩൬|| 

യതോഽജായതേദം പ്രപഞ്ചം വിചിത്രം സ്ഥിതിം യാതി യസ്മിന് യദേകാന്തമന്തേ | 
സ കര്മാദിഹീനഃ സ്വയംജ്യോതിരാത്മാ ശിവോഽഹം ശിവോഽഹം ശിവോഽഹം ||൩൭|| 

കിരീടേ നിശേശോ ലലാടേ ഹുതാശോ ഭുജേ ഭോഗിരാജോ ഗലേ കാലിമാ ച | 
തനൗ കാമിനീ യസ്യ തത്തുല്യദേവം ന ജാനേ ന ജാനേ ന ജാനേ || ൩൮|| 

അനേന സ്തവേനാദരാദംബികേശം പരാം ഭക്തിമാസാദ്യ യം യേ നമന്തി | 
മൃതൗ നിര്ഭയാസ്തേ ജനാസ്തം ഭജന്തേ ഹൃദംഭോജമധ്യേ സദാസീനമീശം || ൩൯|| 

ഭുജങ്ഗപ്രിയാകല്പ ശംഭോ മയൈവം ഭുജങ്ഗപ്രയാതേന വൃത്തേന ക്ലൃപ്തം | 
നരഃ സ്തോത്രമേതത്പഠിത്വോരുഭക്ത്യാ സുപുത്രായുരാരോഗ്യമൈശ്വര്യമേതി || ൪൦|| 

ഇതി ശ്രീമത്പരമഹംസപരിവ്രാജകാചാര്യ ശ്രീമച്ഛങ്കാരാചാര്യ 
വിരചിതം ശിവഭുജങ്ഗ പ്രയാതസ്തോത്രം സംപൂര്ണം ||

Back to Sanskrit Page
Back to Hindu Scriptures and Stotras Main Page
Back to Shaivam Home Page