திருச்சிற்றம்பலம்

மறையாளர் திருக்கடவூர் வந்து 
  உதித்து வண் தமிழின்
துறை ஆன பயன் தெரிந்து 
  சொல் விளங்கிப் பொருள் மறையக்
குறையாத தமிழ்க் கோவை தம் 
  பெயரால் குலவும் வகை
முறையாலே தொகுத்து அமைத்து 
  மூவேந்தர் பால் பயில்வார்  1 

அங்கு அவர் தாம் மகிழும் 
  வகை அடுத்தவுரை நயம் ஆக்கி
கொங்கலர்தார் மன்னவர் பால் பெற்ற 
  நிதிக் குவை கொண்டு
வெம் கண் அராவொடு கிடந்து 
  விளங்கும் இளம் பிறைச் சென்னிச்
சங்கரனார் இனிது அமரும் 
  தானங்கள் பல சமைத்தார்  2 

யாவர்க்கும் மனம் உவக்கும் இன்ப 
  மொழிப் பயன் இயம்பித்
தேவர்க்கு முதல்தேவர் சீர் 
  அடியார் எல்லார்க்கும்
மேவுற்ற இருநிதியம் மிக 
  அளித்து விடையவர்தம்
காவுற்ற திருக்கயிலை 
  மறவாத கருத்தினராய்  3 

ஏய்ந்த கடல் சூழ் உலகில் 
  எங்கும் தம் இசை நிறுத்தி
ஆய்ந்த உணர்விடை அறா 
  அன்பினராய் அணி கங்கை
தோய்ந்த நெடும் சடையார்தம் 
  அருள் பெற்ற தொடர்பினால்
வாய்ந்த மனம் போலும் உடம்பும் 
  வடகயிலை மலை சேர்ந்தார்  4 

வேரியார் மலர்க் கொன்றை 
  வேணியார் அடிபேணும்
காரியார் கழல் வணங்கி 
  அவர் அளித்த கருணையினால்
வாரியார் மதயானை வழுதியர் 
  தம் மதி மரபில்
சீரியார் நெடுமாறர் 
  திருத்தொண்டு செப்புவாம்  5 

  

திருச்சிற்றம்பலம்