வைய நிகழ் பல்லவர் 
  தம் குலமரபின் வழித்தோன்றி
வெய்ய கலியும் பகையும் மிகை 
  ஒழியும் வகை அடக்கிச்
செய்ய சடையார் சைவத் திரு 
  நெறியால் அரசு அளிப்பார்
ஐயடிகள் நீதியால் 
  அடிப்படுத்தும் செங்கோலார்  1 

திருமலியும் புகழ் விளங்கச் 
  சேணிலத்தில் எவ்வுயிரும்
பெருமையுடன் இனிது அமரப் 
  பிற புலங்கள் அடிப்படுத்துப்
தருமநெறி தழைத்து ஓங்கத் 
  தாரணிமேல் சைவமுடன்
அருமறையின் துறை விளங்க 
  அரசு அளிக்கும் அந்நாளில்  2 

மன்னவரும் பணி செய்ய 
  வடநூல் தென்தமிழ் முதலாம்
பன்னு கலைப் பணிசெய்யப் 
  பார் அளிப்பார் அரசாட்சி
இன்னல் என இகழ்ந்து அதனை 
  எழில் குமரன் மேல் இழிச்சி
நன்மை நெறித் திருத்தொண்டு 
  நயந்து அளிப்பார் ஆயினார்  3 

தொண்டுரிமை புரக்கின்றார் சூழ்வேலை 
  உலகின் கண்
அண்டர் பிரான் அமர்ந்து 
  அருளும் ஆலயங்களான எலாம்
கண்டிறைஞ்சித் திருத்தொண்டின் கடன் 
  ஏற்ற பணி செய்த
வண் தமிழின் மொழி 
  வெண்பா ஓரொன்றா வழுத்துவார்  4 

பெருத்தெழு காதலில் வணங்கிப் 
  பெரும்பற்றத் தண்புலியூர்த்
திருச்சிற்றம் பலத்து ஆடல் 
  புரிந்து அருளும் செய்ய சடை
நிருத்தனார் திருக்கூத்து நேர்ந்து 
  இறைஞ்சி நெடுந்தகையார்
விருப்பின் உடன் செந்தமிழின் வெண்பா 
  மென் மலர் புனைந்தார்  5 

அவ்வகையால் அருள் பெற்று அங்கு 
  அமர்ந்து சில நாள் வைகி
இவ்வுலகில் தம் பெருமான் 
  கோயில்கள் எல்லாம் எய்திச்
செவ்விய அன்பொடு பணிந்து 
  திருப்பணி ஏற்றன செய்தே
எவ்வுலகும் புகழ்ந்து ஏத்தும் 
  இன்தமிழ் வெண்பா மொழிந்தார்  6 

இந்நெறியால் அரன் அடியார் 
  இன்பமுற இசைந்த பணி
பன்னெடு நாள் ஆற்றியபின் 
  பரமர் திருவடி நிழல் கீழ்
மன்னு சிவலோகத்து வழி 
  அன்பர் மருங்கு அணைந்தார்
கன்னிமதில் சூழ் காஞ்சிக் 
  காடவரை யடிகளார்  7 

பையரவ மணியாரம் 
  அணிந்தார்க்குப் பாவணிந்த
ஐயடிகள் காடவனார் அடி 
  இணைத்தாமரை வணங்கிக்
கையணிமான் மழு உடையார் கழல் 
  பணி சிந்தனை உடைய
செய்தவத்துக் கணம் புல்லர் 
  திருத்தொண்டு விரித்து உரைப்பாம்  8 

உளத்தில் ஒரு துளக்கம் இலோம் 
  உலகு உய்ய இருண்ட திருக்
களத்தர் முது குன்றர் தரு 
  கனகம் ஆற்றினில் இட்டு
வளத்தின் மலிந்தேழ் உலகும் 
  வணங்கு பெரும் திருவாரூர்க்
குளத்தில் எடுத்தார் வினையின் குழிவாய் 
  நின்று எனை எடுத்தார்  9