ஒன்பதாந் திருமுறை
திருவிசைப்பா
3. கருவூர்த்தேவர் அருளிய திருவிடைமருதூர் திருவிசைப்பா
10. திருவிடைமருதூர்
பண்: பஞ்சமம்
திருச்சிற்றம்பலம்
173.
வெய்யசெஞ் சோதி மண்டலம் பொலிய
வீங்கிருள் நடுநல்யா மத்தோர்
பையசெம் பாந்தள் பருமணி உமிழ்ந்து
பாவியேன் காதல்செய் காதில்
ஐயசெம் பொற்றோட்(டு) அவிர்சடைமொழுப்பின்
அழிவழ கியதிரு நீற்று
மையசெங் கண்டத்(து) அண்டவா னவர்கோன்
மருவிடம் திருவிடை மருதே. 1
174.
இந்திர லோக முழுவதும் பணிகேட்(டு)
இணையடி தொழுதெழத் தாம்போய்
ஐந்தலை நாகம் மேகலை அரையா
அகந்தொறும் பலிதிரி அடிகள்
தந்திரி வீணை கீதமும் பாடச்
சாதிகின் னரங்கலந்(து) ஒலிப்ப
மந்திர கீதம் தீங்குழல் எங்கும்
மருவிடம் திருவிடை மருதே. 2
175.
பனிபடு மதியம் பயில்கொழுந் தன்ன
பல்லவம் வல்லியென்(று) இங்ஙன்
வினைபடு கனகம் போலயா வையுமாய்
வீங்குல(கு) ஒழிவற நிறைந்து
துனிபடு கலவி மலைமகள் உடனாய்த்
தூங்கிருள் நடுநல்யா மத்தென்
மனனிடை அணுகி நுணிகியுள் கலந்தோன்
மருவிடம் திருவிடைமருதே. 3
176.
அணியுமிழ் சோதி மணியுனுள் கலந்தாங்கு
அடியனேன் உள்கலந்து அடியேன்
பணிமகிழ்ந் தருளும் அரிவைபா கத்தன்
படர்சடை விடம்மிடற்(று) அடிகள்
துணியுமிழ் ஆடை அரையிலோர் ஆடை
சுடர்உமிழ் தரஅதன் அருகே
மணியுமிழ் நாக மணியுமிழ்ந்(து) இமைப்ப
மருவிடம் திருவிடைமருதே. 4
177.
பந்தமும் பிரிவும் தெரிபொருட் பனுவல்
படிவழி சென்று சென்றேறிச்
சிந்தையும் தானும் கலந்ததோர் கலவி
தெரியினும் தெரிவுறா வண்ணம்
எந்தையும் தாயும் யானுமென் றிங்ஙன்
எண்ணில்பல் லூழிகள் உடனாய்
வந்தணு காது நுணிகியுள் கலந்தோன்
மருவிடம் திருவிடைமருதே. 5
178.
எரிதரு கரிகாட்(டு) இடுபிணம் நிணமுண்(டு)
ஏப்பமிட்(டு) இலங்ககெயிற்(று) அழல்வாய்த்
துருகழல் நெடும்பேய்க் கணம்எழுந்தாடும்
தூங்கிருள் நடுநல்யா மத்தே
அருள்புரி முறுவல் முகில்நிலா எறிப்ப
அந்திபோன்(று) ஒளிர்திரு மேனி
வரியர(வு) ஆட ஆடும்எம் பெருமான்
மருவிடம் திருவிடைமருதே. 6
179.
எழிலையாழ் செய்கைப் பசுங்கலன் விசும்பின்
இன்துளி படநனைந்(து) உருகி
அழலையாழ் புருவம் புனலொடும் கிடந்தாங்கு
ஆதனேன் மாதரார் கலவித்
தொழிலையாழ் நெஞ்சம் இடர்படா வண்ணம்
தூங்கிருள் நடுநல்யா மத்தோர்
மழலையாழ் சிலம்ப வந்தகம் புகுந்தோன்
மருவிடம் திருவிடை மருதே. 7
180.
வையவாம் பெற்றம் பெற்றம்ஏ(று) உடையார்
மாதவர் காதல்வைத் தென்னை
வெய்யவாம் செந்தீப் பட்டஇட் டிகைபோல்
விழுமியோன் முன்புபின்(பு) என்கோ
நொய்யவா றென்ன வந்துள்வீற் றிருந்த
நூறுநூ றாயிர கோடி
மையவாங் கண்டத்(து) அண்டவா னவர்கோன்
மருவிடம் திருவிடை மருதே. 8
181.
கலங்கலம் பொய்கைப் புனற்றெளி விடத்துக்
கலந்தமண் ணிடைக்கிடந் தாங்கு
நலம் கலந்(து) அடியேன் சிந்தையுட் புகுந்த
நம்பனே வம்பனே னுடைய
புலங்கலந் தவனே ! என்று நின்(று) உருகிப்
புலம்புவார் அலம்புகார் அருவி
மலங்கலங் கண்ணிற் கண்மணி அனையான்
மருவிடம் திருவிடைமருதே. 9
182.
ஒருங்கிருங் கண்ணின் எண்ணில்புன் மாக்கள்
உறங்கிருள் நடுநல்யா மத்தோர்
கருங்கண்நின்(று) இமைக்கும் செழுஞ்சுடர் விளக்கம்
கலந்தெனக் கலந்துணர் கருவூர்
தருங்கரும் பனைய தீந்தமிழ் மாலை
தடம்பொழில் மருதயாழ் உதிப்ப
வருங்கருங் கண்டத்து அண்டவா னவர்கோன்
மருவிடம் திருவிடைமருதே. 10
திருச்சிற்றம்பலம்
சுவாமி: மகாலிங்க மூர்த்தி;மருதவாணர்; அம்பிகை: பெருநல மாமுலையம்மை
- ஒன்பதாம் திருமுறை
- ஒன்பதாம் திருமுறை - திருவிசைப்பா - திருப்பல்லாண்டு
- திருமாளிகைத்தேவர் அருளிய கோயில் ஒளிவளர் விளக்கே திருவிசைப்பா
- திருமாளிகைத்தேவர் அருளிய கோயில் - உயர் கொடியாட திருவிசைப்பா
- திருமாளிகைத்தேவர் அருளிய கோயில் உறவாகிய யோகம் திருவிசைப்பா
- திருமாளிகைத்தேவர் அருளிய கோயில் இணங்கிலா ஈசன் திருவிசைப்பா
- சேந்தனார் அருளிய திருவீழிமிழலை ஏகநாயகனை திருவிசைப்பா
- சேந்தனார் அருளிய திருவாவடுதுறை பொய்யாத வேதியர் திருவிசைப்பா
- சேந்தனார் அருளிய திருவிடைக்கழி மாலுமா மனம் திருவிசைப்பா
- கருவூர்த்தேவர் அருளிய கோயில் - கணம் விரி திருவிசைப்பா
- கருவூர்த்தேவர் அருளிய திருக்களந்தை ஆதித்தேச்சரம் கலைகள்தம் பொருளும் திருவிசைப்பா
- கருவூர்த்தேவர் அருளிய திருக்கீழ்க் கோட்டுர் மணியம்பலம் தளிரொளி மணிப்பூம் திருவிசைப்பா
- கருவூர்த்தேவர் அருளிய திருமுகத் தலை புவனநா யகனே திருவிசைப்பா
- கருவூர்த்தேவர் அருளிய திரைலோக்கிய சுந்தரம் நீரோங்கி வளர்கமல திருவிசைப்பா
- கருவூர்த்தேவர் அருளிய கங்கைகொண்ட சோளேச்சரம் அன்னமாய் விசும்பு திருவிசைப்பா
- கருவூர்த்தேவர் அருளிய திருப்பூவணம் திருவருள் புரிந்தாள் திருவிசைப்பா
- கருவூர்த்தேவர் அருளிய திருச்சாட்டியக்குடி பெரியவா கருணை திருவிசைப்பா
- கருவூர்த்தேவர் அருளிய தஞ்சை இராசராசேச்சரம் உலகெலாம் தொழவந்த திருவிசைப்பா
- கருவூர்த்தேவர் அருளிய திருவிடைமருதூர் வெய்யசெஞ்சோதி திருவிசைப்பா
- பூந்துருத்திநம்பி காடநம்பி அருளிய திருவாருர் கைக்குவான் முத்தின் திருவிசைப்பா
- பூந்துருத்திநம்பி காடநம்பி அருளிய கோயில் - முத்து வயிரமணி திருவிசைப்பா
- கண்டராதித்தர் அருளிய கோயில் - மின்னார் உருவம் திருவிசைப்பா
- வேணாட்டடிகள் அருளிய கோயில் - துச்சான திருவிசைப்பா
- திருவாலியமுதனார் அருளிய கோயில் - பாதாதி கேசம் திருவிசைப்பா
- திருவாலியமுதனார் அருளிய கோயில் - பவளமால்வரை திருவிசைப்பா
- திருவாலியமுதனார் அருளிய கோயில் -- அல்லாய்ப் பகலாய் திருவிசைப்பா
- திருவாலியமுதனார் அருளிய கோயில் - கோலமலர் திருவிசைப்பா
- புருடோத்தம நம்பி அருளிய கோயில் - வாரணி திருவிசைப்பா
- புருடோத்தம நம்பி அருளிய கோயில் - வானவர்கள் திருவிசைப்பா
- சேதிராயர் அருளிய கோயில் - சேலுலாம் திருவிசைப்பா