మహేశానంతాద్య త్రిగుణరహితామేయవిమల స్వరాకారాపారామితగుణగణాకారినివృతే . నిరాధారాధారామరవర నిరాకార పరమ ప్రభాపూరాకారావర పర నమో వేద్య శివ తే ..1.. నమో వేదావేద్యాఖిలజగదుపాదాన నియతం స్వతంత్రాసామాంతానవధుతినిజాకారవిరతే . నివర్తంతే వాచః శివభజనమప్రాప్య మనసా యతోఽశక్తాః స్తోతుం సకృదపి గుణాతీత శివ తే ..2.. త్వదన్యద్వస్త్వేకం నహి భవ సమస్తత్రిభువనే విభుస్త్వం విశ్వాత్మా న చ పరమమస్తీశ భవతః . ధ్రువం మాయాతీతస్త్వమసి సతతం నాత్ర విషయో న తే కృత్యం సత్యం క్వచిదపి విపర్యేతి శివ తే ..3.. త్వయైవేమం లోకం నిఖిలమమలం వ్యాప్య సతతం తథైవాన్యాం లోకస్థితిమనఘ దేవోత్తమ విభో . త్వయైవైతత్సృష్టం జగదఖిలమీశాన భగవ- న్విలాసోఽయం కశ్చిత్తవ శివ నమో వేద్య శివ తే ..4.. జగత్సృష్టేః పూర్వం యదభవదుమాకాంత సతతం త్వయా లీలామాత్రం తదపి సకలం రక్షితమభూత్ .. తదేవాగ్రే భాలప్రకటనయనాద్భుతకరా- జ్జగద్దగ్ధ్వా స్థాస్యస్యజ హర నమో వేద్య శివ తే ..5.. విభూతీనామంతో భవ న భవతో భూతివిలస- న్నిజాకార శ్రీమన్న గుణగణసీమాప్యవగతా . అతద్వ్యావృత్యాఽద్ధా త్వయి సకలవేదాశ్చ చకితా భవంత్యేవాసామప్రకృతిక నమో ధర్ష శివ తే ..6.. విరాడ్ర్రూపం యత్తే సకలనిగమాగోచరమభూ- త్తదేవేదం రూపం భవతి కిమిదం భిన్నమథవా . న జానే దేవేశ త్రినయన సురారాధ్యచరణ త్వమోంకారో వేదస్త్వమసి హి నమోఽఘోర శివ తే ..7.. యదంతస్తత్వజ్ఞా మునివరగణా రూపమనఘం తవేదం సంచింత్య స్వమనసి సదాసన్నవిహతాః . యయుర్దివ్యానందం తదిదమథవా కిం తు న తథా కిమేతజ్జానేఽహం శరణద నమః శర్వ శివ తే ..8.. తథా శక్త్యా సృష్ట్వా జగదథ చ సంరక్ష్య బహుధా తతః సంహౄత్యైతన్నివసతి తదాధారమథవా . ఇదం తే కిం రూపం నిరుపమ న జానే హర విభో విసర్గః కో వా తే తమపి హి నమో భవ్య శివ తే ..9.. తవానంతాన్యాహుః శుచిపరమరూపాణి నిగమా- స్తదంతర్భూతం సత్సదసదనిరుక్తం పదమపి . నిరుక్తం ఛందోభిర్నిలయనమిదం వానిలయనం న విజ్ఞాతం జ్ఞాతం సకృదపి నమో జ్యేష్ఠ శివ తే ..10.. తవాభూత్సత్యం చానృతమపి చ సత్యం కృతమభూదృతం సత్యం సత్యం తదపి చ యథా రూపమఖిలం . యతః సత్యం సత్యం శమమపి సమస్తం తవ విభో కృతం సత్యం సత్యానృతమపి నమో రుద్ర శివ తే ..11.. తవామేయం మేయం యదపి తదమేయం విరచితం న వామేయం మేయం రచితమపి మేయం విరచితుం . న మేయం మేయం తే న ఖలు పరమేయం పరమయం న మేయం న నామేయం వరమపి నమో దేవ శివ తే ..12.. తవాహారం హారం విదితమవిహారం విరహసం నవాహారం హారం హర హరసి హారం న హరసి . న వాహారం హారం పరతరవిహారం పరతరం పరం పారం జానే నహి ఖలు నమో విశ్వశివ తే ..13.. యదేతత్తత్త్వం తే సకలమపి తత్త్వేన విదితం న తే తత్త్వం తత్త్వం విదితమపి తత్త్వేన విదితం . న చైతత్తత్త్వం చేన్నియతమపి తత్త్వం కిము భవే న తే తత్త్వం తత్త్వం తదపి చ నమో వేద్య శివ తే ..14.. ఇదం రూపం రూపం సదసదమలం రూపమపి చే- న్న జానే రూపం తే తరతమవిభిన్నం పరతరం . యతో నాన్యద్రూపం నియతమపి వేదైర్నిగదితం న జానే సర్వాత్మన్ క్వచిదపి నమోఽనంత శివ తే ..15.. ంఅహద్భూతం భూతం యదపి న చ భూతం తవ విభో సదా భూతం భూతం కిము న భవతో భూతవిషయే . యదాభూతం భూతం భవతి హి న భవ్యం భగవతో భవాభూతం భావ్యం భవతి న నమో జ్యేష్ఠ శివ తే ..16.. వశీభూతా భూతా సతతమపి భూతాత్మకతయా న తే భూతా భూతాస్తవ యదపి భూతా విభుతయా . యతో భూతా భూతాస్తవ తు న హి భూతాత్మకతయా న వా భూతా భూతాః క్వచిదపి నమో భూత శివ తే ..17.. న తే మాయామాయా సతతమపి మాయామయతయా ధ్రువం మాయామాయా త్వయి వర న మాయామయమపి . యదా మాయామాయా త్వయి న ఖలు మాయామయతయా న మాయామాయా వా పరమయ నమస్తే శివ నమః ..18.. యతంతః సంవేద్యం విదితమపి వేదైర్న విదితం న వేద్యం వేద్యం చేన్నియతమపి వేద్యం న విదితం . తదేవేదం వేద్యం విదితమపి వేదాంతనికరైః కరావేద్యం వేద్యం జితమితి నమోఽతర్క్య శివ తే ..19.. శివం సేవ్యం భావం శివమతిశివాకారమశివం న సత్యం శైవం తచ్ఛివమితి శివం సేవ్యమనిశం . శివం శాంతం మత్వా శివపరమతత్త్వం శివమయం న జానే రూపత్వం శివమితి నమో వేద్య శివ తే ..20.. యదజ్ఞాత్వా తత్త్వం సకలమపి సంసారపతితం జగజ్జన్మావృత్తిం దహతి సతతం దుఃఖనిలయం . యదేతజ్జ్ఞాత్వైవావహతి చ నివృత్తిం పరతరాం న జానే తత్తత్త్వం పరమితి నమో వేద్య శివ తే ..21.. న వేదం యద్రూపం నిగమవిషయం మంగళకరం న దృష్టం కేనాపి ధ్రువమితి విజానే శివ విభో . తతశ్చిత్తే శంభో నహి మమ విషాదోఽఘవికౄత్తిః ప్రయత్నల్లబ్ధేఽస్మిన్న కిమపి నమః పూర్ణ శివ తే ..22.. తవాకర్ణ్యాగూఢం యదపి పరతత్త్వం శ్రుతిపరం తదేవాతీతం సన్నయనపదవీం నాత్ర తనుతే . కదాచిత్కించిద్వా స్ఫురతి కతిధా చేతసి తవ స్ఫురద్రూపం భవ్యం భవహర పరావేద్య శివ తే ..23.. త్వమిందుర్భానుస్త్వం హుతభుగసి వాయుశ్చ సలిలం త్వమేవాకాశోఽసి క్షితిరసి తథాఽఽత్మాఽసి భగవన్ . తతః సర్వాకారస్త్వమసి భవతో భిన్నమనఘాన్న తత్సత్యం సత్యం త్రినయన నమోఽనంత శివ తే ..24.. విధుం ధత్సే నిత్యం శిరసి మృదుకంఠోఽపి గరళం నవం నాగాహారం భసితమమలం భాసురతనుం . కరే శూలం భాలే జ్వలనమనిశం తత్కిమితి తే న తత్త్వం జానేఽహం భవహర నమః కుర్ప శివ తే ..25.. తవాపాంగః శుద్ధో యది భవతి భవ్యే శుభకరః కదాచిత్త్కస్మింశ్చిల్లధుతరనరే విప్రభవతి . స ఏవైతాల్లోకాన్ రచయితుమలం సాపి చ మహాన్- కృపాధారోఽయం సుకయతి నమోఽనంత శివ తే ..26.. భవంతం దేవేశం శివమితరగీర్వాణసదృశం ప్రమాదాద్యః కశ్చిద్యది యదపి చిత్తేఽపి మనుతే . స దుఃఖం లబ్ధ్వాఽన్తే నరకమపి యాతి ధ్రువమిదం ధ్రువం దేవారాధ్యామితగుణ నమోఽనంత శివ తే ..27.. ప్రదోషే రత్నాఢ్యే మృదులతరసింహాసనవరే భవానీమారూఢామసకృదపి సంవీక్ష్య భవతా . కృతం సమ్యఙ్నాఠ్యం ప్రథితమితి వేదోఽపి భవతి ప్రభావః కో వాఽయం తవ హర నమో దీప శివ తే ..28.. శ్మశానే సంచారః కిము శివ న తే క్వాపి గమనం యతో విశ్వం వ్యాప్యాఖిలమపి సదా తిష్ఠతి భవాన్ . విభుం నిత్యం శుద్ధం శివముపహతం వ్యాపకమితి శ్రుతిః సాక్షాద్వక్తి త్వయమపి నమః శుద్ధ శివ తే ..29.. ధనుర్మేరుః శేషో ధనువరగుణో యానమవని- స్తవైవేదం చక్రం నిగమనికరా వాజినికరాః . పురోలక్ష్యం యంతా విధిరిపుహరిశ్చేతి నిగమః కిమేవం త్వన్వేష్యో నిగదతి నమః పూర్ణ శివ తే ..30.. మృదుః సత్త్వం త్వేతద్భవమనఘయుక్తం చ రజసా తమోయుక్తం శుద్ధం హరమపి శివం నిష్కళమితి . వదత్యేకో వేదస్త్వమసి తదుపాస్యం ధ్రువమిదం త్వమోంకరాకారో ధ్రువమితి నమోఽనంత శివ తే ..31.. జగత్సుప్తిం బోధం వ్రజతి భవతో నిర్గతమపి ప్రవృత్తిం వ్యాపరం పునరపి సుషుప్తిం చ సకలం . త్వదన్యం త్వత్ప్రేక్ష్యం వ్రజతి శరణం నేతి నిగమో వదత్యద్ధా సర్వః శివ ఇతి నమః స్తుత్య శివ తే ..32.. త్వమేవాలోకానామధిపతిరుమానాథ జగతాం శరణ్యః ప్రాప్యస్త్వం జలనిధిరివానంతపయసాం . త్వదన్యో నిర్వాణం తట ఇతి చ నిర్వాణయతిరప్యతః సర్వోత్కృష్టస్త్వమసి హి నమో నిత్య శివ తే ..33.. తవైవాంశో భానుస్తపతి విధురప్యేతి పవనః పవత్యేషోఽగ్నిశ్చ జ్వలతి సలిలం చ ప్రవహతి . తవాజ్ఞాకారిత్వం సకలసురవర్గస్య సతతం త్వమేక: స్వాతంత్ర్యం వహసి హి నమోఽనంత శివ తే ..34.. స్వతంత్రోఽయం సోమః సకలభువనైకప్రభురయం నియంతా దేవానామపి హర నియంతాసి న పరః . శివః శుద్ధా మాయారహిత ఇతి వేదోఽపి వదతి స్వయం తామాశాస్య త్రయహర నమోఽనంత శివ తే ..35.. నమో రుద్రానంతామరవర నమః శంకర విభో నమో గౌరీనాథ త్రినయన శరణ్యాంఘ్రికమల . నమః శర్వః శ్రీమన్ననఘ మహదైశ్వర్యనిలయ స్మరారే పాపారే జయ జయ నమః సేవ్య శివ తే .. 36.. మహాదేవామేయానఘగుణగణప్రామవసత- న్నమో భూయో భూయః పునరపి నమస్తే పునరపి . పురారాతే శంభో పునరపి నమస్తే శివ విభో నమో భూయో భూయః శివ శివ నమోఽనంత శివ తే ..37.. కదాచిద్గణ్యంతే నిబిడనియతవృష్టికణికాః కదాచిత్తత్క్షేత్రాణ్యపి సికతలేశం కుశలినా . అనంతైరాకల్పం శివ గుణగణశ్చారురసనై- ర్న శక్యం తే నూనం గణయితుముషిత్వాఽపి సతతం ..38.. మయా విజ్ఞాయైషాఽనిశమపి కృతా జేతుమనసా సకామేనామేయా సతతమపరాధా బహువిధాః . త్వయైతే క్షంతవ్యాః క్వచిదపి శరీరేణ వచసా కృతైర్నైతైర్నూనం శివ శివ కృపాసాగర విభో ..39.. ప్రమాదాద్యే కేచిద్వితతమపరాధా విధిహతాః కృతాః సర్వే తేఽపి ప్రశమముపయాంతు స్ఫుటతరం . శివః శ్రీమచ్ఛంభో శివశివ మహేశేతి చ జపన్ క్వచిల్లింగాకారే శివ హర వసామి స్థిరతరం ..40.. ఇతి స్తుత్వా శివం విష్ణుః ప్రణమ్య చ ముహుర్ముహుః . నిర్విణ్ణో న్యవసన్నూనం కృతాంజలిపుటః స్థిరం ..41.. తదా శివః శివం రూపమాదాయోవాచ సర్వగః . భీషయన్నఖిలాన్భూతాన్ ఘనగంభీరయా గిరా ..42.. మదీయం రూపమమలం కథం జ్ఞేయం భవాదృశైః . యత్తు వేదైరవిజ్ఞాతమిత్యుక్త్వాఽన్తర్దధే శివః ..43.. తతః పునర్విధిస్తత్ర తపస్తప్తుం సమారభత్ . విష్ణుశ్చ శివతత్త్వస్య జ్ఞానార్థమతియత్నతః ..44.. తాదృశీ శివ మే వాచ్ఛా పూజాయిత్వా వదామ్యహం . నాన్యో మయాఽర్చ్యో దేవేషు వినా శంభుం సనాతనం .. 45.. త్వయాపి శాంకరం లింగం పూజనీయం ప్రయత్నతః . విహాయైవాన్యదేవానాం పూజనం శేష సర్వదా ..46.. ఇతి శ్రీస్కందపురాణే విష్ణువిరచితం శివమహిమస్తోత్రం సంపూర్ణం ..