కల్యాణం నో విధత్తాం కటకతటలసత్కల్పవాటినికుంజ- క్రీడాసంసక్తవిద్యాధరనివహవధూగీతరుద్రాపదానః. తారైర్హేరంబనాదైస్తరలితనినదత్తారకారాతికేకీ కైలాసః శర్వనిర్వృత్యభిజనకపదః సర్వదా పర్వతేంద్రః ..1.. యస్య ప్రాహుః స్వరూపం సకలదివిషదాం సారసర్వస్వయోగం యస్యేషుః శార్ఙ్గధన్వా సమజని జగతాం రక్షణే జాగరూకః . మౌర్వీ దర్వీకరాణామపి చ పరివృఢః పూస్రయీ సా చ లక్ష్యం సోఽవ్యాదవ్యాజమస్మానశివభిదనిశం నాకినాం శ్రీపినాకః ..2.. ఆతంకావేగహారీ సకలదివిషదామంఘ్రిపద్మాశ్రయాణాం మాతంగాద్యుగ్రదైత్యప్రకరతనుగలద్రక్తధారాక్తధారః . క్రూరః సూరాయుతానామపి చ పరిభవం స్వీయభాసా వితన్వన్ ఘోరాకారః కుఠారో దృఢతరదురితాఖ్యాటవీం పాటయేన్నః .3.. కాలారాతేః కరాగ్రే కృతవసతిరురఃశాణతాతో రిపూణాం కాలే కాలే కులాద్రిప్రవరతనయయా కల్పితస్నహలేపః . పాయాన్నః పావకార్చిఃప్రసరసఖముఖః పాపహంతా నితాంతం శూలః శ్రీపాదసేవాభజనరసజుషాం పాలనైకాంతశీలః ..4.. దేవస్యాంకాశ్రయాయాః కులగిరిదుహితుర్నేత్రకోణప్రచార- ప్రస్తారానత్యుదారాన్పిపటిషురివ యో నిత్యమత్యాదరేణ . ఆధత్తే భంగితుంగైరనిశమవయవైరంతరంగం సమోదం సోమాపీడస్య సోఽయం ప్రదిశతు కుశలం పాణిరంగః కురంగః ..5.. కంఠప్రాంతావసజ్జత్కనకమయమహాఘంటికాఘోరఘోషైః కంఠారావైరకుంఠైరపి భరితజగచ్చక్రవాలాంతరాలః . చండః ప్రోద్దండశృంగః కకుదకవలితోత్తుంగకైలాసశ్రృంగః కంఠే కాలస్య వాహః శమయతు శమలం శాశ్వ్తః శాక్వరేంద్రః ..6.. నిర్యద్దానాంబుధారాపరిమళతరళీభూతలోలంబపాలీఝంకారైః శంకరాద్రేః శిఖరశతదరీః పూరయన్భూరీఘోషైః . శార్ఘః సౌవర్ణశైలప్రతిమపృథువపుః సర్వవిఘ్నాపహర్తా శర్వాణ్యాః పూర్వసూనుః స భవతు భవతాం స్వస్తిదో హస్తివక్త్రః ..7.. యః పుణ్యైర్దేవతానాం సమజని శివయోః శ్లాఘ్యవీర్యైకమత్యాద్- యన్నామ్ని శ్రూయమాణే దితిజభటఘటా భీతిభారం భజంతే . భూయాత్సోఽయం విభూత్యై నిశితశరశిఖాపాటితక్రౌంచశైలః సంసారాగాధకూపోదరపతితసముత్తారకస్తారకారిః ..8.. ఆరూఢః ప్రౌఢవేగప్రవిజితపవనం తుంగతుంగం తురంగం చైలం నీలం వసానః కరతలవిలసత్కాండకోదండదండః . రాగద్వేషాదినానావిధమృగపటలీభీతికృద్భూతభర్తా కుర్వన్నాఖేటలీలాం పరిలసతు మనః కాననే మామకీనే ..9.. అంభోజాభ్యాం చ రంభారథచరణలతాద్వంద్వకుంభీంద్రకుంభై- ర్బింబేనేందోశ్చ కంబోరుపరి విలసతా విద్రుమేణోత్పలాభ్యాం . అంభోదేనాపి సంభావితముపజనితాడంబరం శంబరారేః శంభోః సంభోగయోగ్యం కిమపి ధనమిదం సంభవేత్సంపదే నః ..10.. వేణీసౌభాగ్యవిస్మాపితతపనసుతాచారువేణీవిలాసాన్ వాణీనిర్ధూతవాణీకరతలవిధృతోదారవీణావిరావాన్ . ఏణీనేత్రాంతభంగీనిరసననిపుణాపాంగకోణానుపాసే శోణాన్ప్రాణానుదూఢప్రతినవసుషమాకందలానిందుమౌలేః ..11.. నృత్తారంభేషు హస్తాహతమురజధిమీధిక్కృతైరత్యుదారై- శ్చిత్తానందం విధత్తే సదసి భగవతః సంతతం యః స నందీ . చండీశాద్యాస్తథాఽన్యే చతురగుణగణప్రీణితస్వామిసత్కా- రోత్కర్షోద్యత్ప్రసాదాః ప్రమథపరివృఢాః సంతు సంతోషిణో నః ..12.. ముక్తామాణిక్యజాలైః పరికలితమహాసాలమాలోకనీయం ప్రత్యుప్తానర్ధరత్నైర్దిశి దిశి భవనైః కల్పితైర్దిక్పతీనాం . ఉద్యానైరద్రికన్యాపరిజనవనితామాననీయైః పరితం హృద్యం హౄద్యస్తు నిత్యం మమ భువనపతేర్ధామ సోమార్ధమౌలేః ..13.. స్తంభైర్జంభారిరత్నప్రవరవిరచితైః సంభృతోపాంతభాగం శుంభత్సోపానమార్గం శుచిమణినిచయైర్గుంఫితానల్పశిల్పం . కుంభైః సంపూర్ణశోభం శిరసి సుఘటితైః శాతకుంభైరపంకైః శంభోః సంభావనీయం సకలమునిజనైః స్వస్తిదం స్యాత్సదా నః ..14.. న్యస్తో మధ్యే సభాయాః పరిసరవిలసత్పాదపీఠాభిరామో హృద్యః పాదైశ్చతుర్భిః కనకమణిమయైరుచ్చకైరుజ్జ్వలాత్మా . వాసోరత్నేన కేనాప్యధికమృదుతరేణాస్తృతో విస్తృతశ్రీపీఠః పీడాభరం నః శమయతు శివయోః స్వైరసంవాసయోగ్యః ..15.. ఆసీనస్యాధిపీఠం త్రిజగదధిపతేరంఘ్రిపీఠానుషక్తౌ పాథోజాభోగభాజౌ పరిమృదులతలోల్లాసిపద్మాభిలేఖౌ . పాతాం పాదావుభౌ తౌ నమదమరకిరీటోల్లసచ్చారుహీర- శ్రేణీశోణాయమానోన్నత నఖదశకోద్భాసమానౌ సమానౌ ..16.. యన్నాదో వేదవాచాం నిగదతి నిఖిలం లక్షణం పక్షికేతుర్- లక్ష్మీసంభోగసౌఖ్యం విరచయతి యయోశ్చాపరే రూపభేదే . శంభోః సంభావనీయే పదకమలసమాసంగతస్తుంగశోభే మాంగల్యం నః సమగ్రం సకలసుఖకరే నూపురే పూరయేతాం ..17.. అంగే శృంగారయోనేః సపది శలభతాం నేత్రవహ్నౌ ప్రయాతే శత్రోరుద్ధృత్య తస్మాదిషుధియుగమధో న్యస్తమగ్రే కిమేతత్ . శంకామిత్థం నతానామమరపరిషదామంతరంకూరయత్తత్- సంఘాతం చారు జంఘాయుగమఖిలపతేరంహసా సంహరేన్నః ..18.. జానుద్వంద్వేన మీనధ్వజనృవరసముద్గోపమానేన సాకం రాజంతౌ రాజరంభాకరికరకనకస్తంభసంభావనీయౌ . ఊరూ గౌరీకరాంభోరుహసరససమామర్దనానందభాజౌ చారూ దూరీక్రియేతాం దురితముపచితం జన్మజన్మాంతరే నః ..19.. ఆముక్తానర్ఘరత్నప్రకరకరపరిష్వక్తకల్యాణకాంచీ- దామ్నా బద్ధేన దుగ్ధద్యుతినిచయముషా చీనపట్టాంబరేణ . సంవీతే శైలకన్యాసుచరితపరిపాకాయమానే నితంబే నిత్యం నర్నర్తు చిత్తం మమ నిఖిలజగత్స్వామినః సోమమౌలేః ..20.. సంధ్యాకాలానురజ్యద్దినకరసరుచా కాలధౌతేన గాఢం వ్యానద్ధః స్నిగ్ధముగ్ధః సరసముదరబంధేన వీతోపమేన . ఉద్దీప్రైః స్వప్రకాశైరుపచితమహిమా మన్మథారేరుదారో మధ్యో మిథ్యార్థసఘ్ర్యఙ్ మమ దిశతు సదా సంగతిం మంగళానాం..21.. నాభీచక్రాలవాలాన్నవనవసుషమాదోహదశ్రీపరీతా- దుద్గచ్ఛంతీ పురస్తాదుదరపథమతిక్రమ్య వక్షః ప్రయాంతీ . శ్యామా కామాగమార్థప్రకథనలిపివద్భాసతే యా నికామం సా మాం సోమార్ధమౌలేః సుఖయతు సతతం రోమవల్లీమతల్లీ ..22.. ఆశ్లేషేష్వద్రిజాయాః కఠినకుచతటీలిప్తకాశ్మీరపంక- వ్యాసంగాద్యదుద్యదర్కద్యుతిభిరుపచితస్పర్ధముద్దామహృద్యం . దక్షారాతేరుదూఢప్రతినవమణిమాలావలీభాసమానం వక్షో విక్షోభితాఘం సతతనతిజుషాం రక్షతాదక్షతం నః ..23.. వామాంకే విస్ఫురంత్యాః కరతలవిలసచ్చారురక్తోత్పలాయాః కాంతాయా వామవక్షోరుహభరశిఖరోన్మర్దనవ్యగ్రమేకం . అన్యాంస్త్రీనప్యుదారాన్వరపరశుమృగాలంకృతానిందుమౌలే- ర్బాహూనాబద్ధహేమాంగదమణికటకానంతరాలోకయామః ..24.. సమ్మ్రాంతాయాః శివాయాః పతివిలయభియా సర్వలోకోపతాపాత్- సంవిగ్నస్యాపి విష్ణోః సరభసముభయోర్వారణప్రేరణాభ్యాం . మధ్యే త్రైశంకవీయామనుభవతి దశాం యత్ర హాలాహలోష్మా సోఽయం సర్వాపదాం నః శమయతు నిచయం నీలకంఠస్య కంఠః ..25.. హృద్యైరద్రీంద్రకన్యామృదుదశనపదైర్ముద్రితో విద్రుమశ్రీ- రుద్ద్యోతంత్యా నితాంతం ధవళధవళయా మిశ్రితో దంతకాంత్యా . ముక్తామాణిక్యజాలవ్యతికరసదృశా తేజసా భాసమానః సద్యోజాతస్య దద్యాదధరమణిరసౌ సంపదాం సంచయం నః ..26.. కర్ణాలంకారనానామణినికరరుచాం సంచయైరంచితాయాం వర్ణ్యాయాం స్వర్ణపద్మోదరపరివిలసత్కర్ణికాసన్నిభాయాం . పద్ధత్యాం ప్రాణవాయోః ప్రణతజనహృదంభోజవాసస్య శంభోర్నిత్యం నశ్చిత్తమేతద్విరచయతు సుఖే నాసికాం నాసికాయాం ..27.. అత్యంతం భాసమానే రుచిరతరరుచాం సంగమాత్సన్మణీనా- ముద్యచ్చండాంశుధామప్రసరనిరసనస్పష్టదృష్టాపదానే . భూయాస్తాం భూతయే నః కరివరజయినః కర్ణపాశావలంబే భక్తాలీభాలసజ్జజ్జనిమరణలిపేః కుండలే కుండలే తే ..28.. యాభ్యాం కాలవ్యవస్థా భవతి తనుమతాం యో ముఖం దేవతానాం యేషామాహుః స్వరూపం జగతి మునివరా దేవతానాం త్రయీం తాం . రుద్రాణీవక్త్రపంకేరుహసతతవిహారోత్సుకేందీవరేభ్య- స్తేభ్యస్త్రిభ్యః ప్రణామాంజలిముపరచయే త్రీక్షణస్యేక్షణేభ్యః ..29.. వామం వామాంకగాయా వదనసరసిజే వ్యావలద్వల్లభాయా వ్యానమ్రేష్వన్యదన్యత్పునరలికభవం వీతనిఃశేషరౌక్ష్యం . భూయో భూయోఽపి మోదాన్నిపతదతిదయాశీతలం చూతబాణే దక్షారేరీక్షణానాం త్రయమపహరతాదాశు తాపత్రయం నః ..30.. యస్మిన్నర్ధేందుముగ్ధద్యుతినిచయతిరస్కారనిస్తంద్రకాంతౌ కాశ్మీరక్షోదసంకల్పితమివ రుచిరం చిత్రకం భాతి నేత్రం . తస్మిన్నుల్లీలచిల్లీనటవరతరుణీలాస్యరంగాయమాణే కాలారేః ఫాలదేశే విహరతు హృదయం వీతచింతాంతరం నః ..31.. స్వామిన్ గంగామివాంగీకురు తవ శిరసా మామపీత్యర్థయంతీం ధన్యాం కన్యాం ఖరాంశోః శిరసి వహతి కింన్వేష కారుణ్యశాలీ . ఇత్థం శంకాం జనానాం జనయదతిఘనం కైశికం కాలమేఘ- చ్ఛాయం భూయాదుదారం త్రిపురవిజయినః శ్రేయసే భూయసే నః ..32.. శ్రృంగారాకల్పయోగ్యైః శిఖరివరసుతాసత్సఖీహస్తలూనైః సూనైరాబద్ధమాలావలిపరివిలసత్సౌరభాకృష్టభృంగం . తుంగం మాణిక్యకాంత్యా పరిహసితసురావాసశైలేంద్రశ్రృంగం సంఘం నః సంకటానాం విఘటయతు సదా కాంకటీకం కిరీటం ..33.. వక్రాకారః కలంకీ జడతనురహమప్యంఘ్రిసేవానుభావా- దుత్తంసత్వం ప్రయాతః సులభతరఘృణాస్యందినశ్చంద్రమౌలేః . తత్సేవంతాం జనౌఘాః శివమితి నిజయాఽవస్థయైవ బ్రువాణం వందే దేవస్య శంభోర్ముకుటసుఘటితం ముగ్ధపీయూషభానుం ..34.. కాంత్యా సంఫుల్లమల్లీకుసుమధవళయా వ్యాప్య విశ్వం విరాజన్ వృత్తాకారో వితన్వన్ ముహురపి చ పరాం నిర్వృతిం పాదభాజాం . సానందం నందిదోష్ణా మణికటకవతా వాహ్మమానః పురారేః శ్వేతచ్ఛత్రాఖ్యశీతద్యుతిరపహరతాదస్తాపదా నః ..35.. దివ్యాకల్పోజ్జ్వలానాం శివగిరిసుతయోః పార్శ్వయోరాశ్రితానాం రుద్రాణీసత్సఖీనామతితరలకటాక్షాంచలైరంచితానాం . ఉద్వేల్లద్వాహువల్లీవిలసనసమయే చామరాందోలనీనాముద్భూతః కంకణాలీవలయకలకలో వారయేదాపదో నః ..36.. స్వర్గౌకఃసుందరీణాం సులలితవపుషాం స్వామిసేవాపరాణాం వల్గద్భూషాణి వక్త్రాంబుజపరివిగలన్ముగ్ధగీతామృతాని . నిత్యం నృత్తాన్యుపాసే భుజవిధుతిపదన్యాసభావావలోక- ప్రత్యుద్యత్ప్రీతిమాద్యత్ప్రమథనటనటీదత్తసంభావనాని ..37.. స్థానప్రాప్త్యా స్వరాణాం కిమపి విశదతాం వ్యంజయన్మంజువీణా- స్వానావచ్ఛిన్నతాలక్రమమమృతమివాస్వాద్యమానం శివాభ్యాం . నానారాగాతిహృద్యం నవరసమధురస్తోత్రజాతాను విద్ధం గానం వీణామహర్షేః కలమతిలలితం కర్ణపూరాయతాం నః ..38.. చేతో జాతప్రమోదం సపది విదధతీ ప్రాణినాం వాణినీనాం పాణిద్వంద్వాగ్రజాగ్రత్సులలితరణితస్వర్ణతాలానుకూలా . స్వీయారావేణ పాథోధరరవపటునా నాదయంతీ మయూరీ మాయూరీం మందభావం మణిమురజభవా మార్జనా మార్జయేన్నః ..39.. దేవేభ్యో దానవేభ్యః పితృమునిపరిషత్సిద్ధవిద్యాధరేభ్యః సాధ్యేభ్యశ్చారణేభ్యో మనుజపశుపతజ్జాతికీటాదికేభ్యః . శ్రీకైలాసప్రరూఢాస్తృణవిటపిముఖాశ్చాపి యే సంతి తేభ్యః సవభ్యో నిర్విచారం నతిముపరచయే శర్వపాదాశ్రయేభ్యః ..40.. ధ్యాయన్నిత్యం ప్రభాతే ప్రతిదివసమిదం స్తోత్రరత్నం పఠేద్యః కింవా బ్రూమస్తదీయం సుచరితమథవా కీర్తయామః సమాసాత్ . సంపజ్జాతం సమగ్రం సదసి బహుమతిం సర్వలోకప్రియత్వం సంప్రాప్యాయుఃశతాంతే పదమయతి పరబ్రహ్మణో మన్మథారేః ..41.. ఇతి శ్రీమత్పరమహంసపరివ్రాజకాచార్యస్య శ్రీగోవిందభగవత్పూజ్యపాదశిష్యస్య శ్రీమచ్ఛంకరాచార్యస్య కృతం శివపాదాదికేశాంతవర్ణనస్తోత్రం సంపూర్ణం ..