Shiva Stutih 
(Shri Mallikuchisoorisoonu Narayana Panditaachaarya Virachita)

---

శివాయ నమః || 

శివస్తుతిః |
(శ్రీ మల్లికుచిసూరిసూను నారయణ పణ్డితాచార్య విరచితా)

స్ఫుటం స్ఫటికసప్రభం స్ఫుటితహారకశ్రీజటం శశాఙ్కదలశేఖరం కపిలఫుల్లనేత్రత్రయమ్ | 
తరక్షువరకృత్తిమద్భుజగభూషణం భూతిమత్కదా ను శితికణ్ఠ తే వపురవేక్షతే వీక్షణమ్ ||౧||

త్రిలోచన విలోచనే లసతి తే లలామాయితే స్మరో నియమఘస్మరో నియమినామభూద్భస్మసాత్ | 
స్వభక్తిలతయా వశీకృతవతీ సతీయం సతీ స్వభక్తవశతో భవానపి  వశీ ప్రసీద ప్రభో ||౨|| 

మహేశ  మహితోఽసి తత్పురుషపూరుషాగ్ర్యో భవానఘోరరిపుఘోర తేఽనవమ వామదేవాఞ్జలిః | 
నమః సపదిజాత తే త్వమితి పఞ్చరూపోచితప్రపఞ్చచయపఞ్చవృన్మమ మనస్తమస్తాడయ  ||౩|| 

రసాఘనరసానలానిలవియద్వివస్వద్విధుప్రయష్టృషు నివిష్టమిత్యజ భజామి మూర్త్యష్టకమ్ | 
ప్రశాన్తముత భీషణం భువనమోహనం చేత్యహో వపూంషి గుణభూషితేఽహమహమాత్మమోహమ్భిదే ||౪|| 

విముక్తిపరమాధ్వనాం తవ షడధ్వనామాస్పదం పదం నిగమవేదినో జగతి వామదేవాదయః | 
కథఞ్చిదుపశిక్షితా భగవతైవ సంవిద్రతే వయం తు విరలాన్తరాః కథముమేశ తన్మన్మహే ||౫|| 

కఠోరితకుఠారయా లలితశూలయా వాహయా రణడ్డమరుణా స్ఫుద్ధరిణయా సఖట్వాఙ్గయా | 
చలాభిరచలాభిరప్యగణితాభిరున్నత్యతశ్చతుర్దశ జగన్తి తే జయ జయేత్యయుర్విస్మయమ్ ||౬|| 

పురా త్రిపురరన్ధనం వివిధదైత్యవిధ్వంసనం పరాక్రమపరంపరా అపి పరా న తే విస్మయః | 
అమర్షిబలహర్షితక్షుభితవృత్తనేత్రోజ్జ్వలజ్జ్వలనహేలయా శలభితం హి లోకత్రయమ్ ||౭|| 

సహస్రనయనో గుహః సహసహస్రరశ్మిర్విధుర్బృహస్పతిరుతాప్పతిః ససురసిద్ధవిద్యాధరాః |
భవత్పదపరాయణాః శ్రియమిమాం యయుః ప్రార్థితాం భవాన్ సురతరుర్భృశం శివ శివ శివావల్లభ ||౮|| 

తవ ప్రియతమాదతిప్రియతమ సదైవాన్తరం పయస్యుపహితం ఘృతం స్వయమివ శ్రియో వల్లభమ్ | 
విబుధ్య లఘుబుద్ధయః స్వపరపక్షలక్ష్యాయితం పఠన్తి హి లుఠన్తి తే శఠహృదః శుచా శుణ్ఠితాః ||౯|| 

నివాసనిలయా చితా తవ శిరస్తతేర్మాలికా కపాలమపి తే కరే త్వమశివోఽస్యనన్తర్ధియామ్ | 
తథాపి భవతః పదం శివశివేత్యదో జల్పతామకిఞ్చన న కిఞ్చన వృజినమస్తి భస్మీభవేత్ ||౧౦|| 

త్వమేవ కిల కామధుక్ సకలకామమాపూరయన్ సదా త్రినయనో భవాన్ వహతి చార్చి నేత్రోద్భవమ్ | 
విషం విషధరాన్దధత్పిబసి తేన చానన్దవాన్విరుద్ధచరితోచితా జగదధీశ తే భిక్షుతా ||౧౧|| 

నమః శివశివాశివాశివార్థకౄన్తాశివం  నమో హరహరాహరాహర హరాన్తరీం మే ద్రుశమ్ | 
నమో భవ భవాభవప్రభవభూతయే మే  భవాన్నమో మృడ నమో నమో నమ ఉమేశ తుభ్యం నమః ||౧౨|| 

సతాం శ్రవణపద్ధతిం సరతు సన్నతోక్తేత్యసౌ శివస్య కరుణఙ్కురాత్ప్రతికృతాత్సదా సోచితా | 
ఇతి ప్రథితమానసో వ్యధిత నామ నారాయణః శివస్తుతిమిమాం శివం లికుచిసూరిసూనుః సుధీః ||౧౩|| 

ఇతి శ్రీమల్లికుచిసూరిసూనునారయణపణ్డితాచార్యవిరచితా శివస్తుతిః సంపూర్ణా||