బిల్వాష్టకమ్

 

Bilvaashtakam

---

త్రిదళం త్రిగుణాకారం త్రినేత్రం చ త్రయాయుధమ్ | 
త్రిజన్మపాపసంహారమేకబిల్వం శివార్పణమ్ ||౧|| 

 

త్రిశాఖైర్బిల్వపత్రైశ్చ హ్యచ్ఛిద్రైః కోమళైః శుభైః | 
శివపూజాం కరిష్యామి హ్యేకబిల్వమ్ శివార్పణమ్ ||౨|| 

 

అఖణ్డబిల్వపత్రేణ పూజితే నన్దికేశ్వరే | 
శుధ్యన్తి సర్వపాపేభ్యో హ్యేకబిల్వమ్ శివార్పణమ్ ||౩|| 

 

శాలిగ్రామశిలామేకాం విప్రాణాం జాతు అర్పయేత్ | 
సోమయజ్ఞమహాపుణ్యమ్ హ్యేకబిల్వమ్ శివార్పణమ్ ||౪|| 

 

దన్తికోటిసహస్రాణి అశ్వమేధశతాని చ | 
కోటికన్యామహాదానమ్ హ్యేకబిల్వమ్ శివార్పణమ్ ||౫|| 

 

లక్ష్మ్యాఃస్తనత ఉత్పన్నం మహాదేవస్య చ ప్రియమ్ | 
బిల్వవృక్షం ప్రయచ్ఛామి హ్యేకబిల్వమ్ శివార్పణమ్ ||౬|| 

 

దర్శనం బిల్వవృక్షస్య స్పర్శనం పాపనాశనమ్ | 
అఘోరపాపసంహారమ్ హ్యేకబిల్వమ్ శివార్పణమ్ ||౭|| 

 

మూలతో బ్రహ్మరూపాయ మధ్యతో విష్ణురూపిణే | 
అగ్రతః శివరూపాయ హ్యేకబిల్వమ్ శివార్పణమ్ ||౮|| 

 

బిల్వాష్టకమిదం పుణ్యం యః పఠేచ్ఛివసన్నిధౌ | 
సర్వపాపవినిర్ముక్తః శివలోకమవాప్నుయాత్ ||౯|| 

 

ఇతి బిల్వాష్టకం సంపూర్ణమ్ ||