logo

|

Home >

Scripture >

scripture >

Telugu

సువర్ణమాలా స్తుతిః - Suvarnamaalaa Stutih

Suvarnamaalaa Stutih

అథ కథమపి మద్రసనాం త్వద్గుణలేశైర్విశోధయామి విభో |
సాంబ సదాశివ శంభో శఙ్కర శరణం మే తవ చరణయుగమ్ ||౧||

ఆఖణ్డలమదఖణ్డనపణ్డిత తణ్డుప్రియ చణ్డీశ విభో |
సాంబ సదాశివ శంభో శఙ్కర శరణం మే తవ చరణయుగమ్ || ౨||

ఇభచర్మాంబర శంబరరిపువపురపహరణోజ్జవలనయన విభో |
సాంబ సదాశివ శంభో శఙ్కర శరణం మే తవ చరణయుగమ్  ||౩||

ఈశ గిరీశ నరేశ పరేశ మహేశ బిలేశయభూషణ భో |
సాంబ సదాశివ శంభో శఙ్కర శరణం మే తవ చరణయుగమ్  ||౪||

ఉమయా దివ్యసుమఙ్గళవిగ్రహయాలిఙ్గితవామాఙ్గ విభో |
సాంబ సదాశివ శంభో శఙ్కర శరణం మే తవ చరణయుగమ్  ||౫||

ఊరీకురు మామజ్ఞమనాథం దూరీకురు మే దురితం భో |
సాంబ సదాశివ శంభో శఙ్కర శరణం మే తవ చరణయుగమ్  ||౬||

ఋషివరమానసహంస చరాచరజననస్థితికారణ భో |
సాంబ సదాశివ శంభో శఙ్కర శరణం మే తవ చరణయుగమ్  || ౭||

ఋక్షాధీశకిరీట మహోక్షారూఢ విధృతరుద్రాక్ష విభో |
సాంబ సదాశివ శంభో శఙ్కర శరణం మే తవ చరణయుగమ్  ||౮||

లృవర్ణద్వన్ద్వమవృన్తసుకుసుమమివాఙ్ఘ్రౌ  తవార్పయామి విభో |
సాంబ సదాశివ శంభో శఙ్కర శరణం మే తవ చరణయుగమ్  ||౯||

ఏకం సదితి శ్రుత్యా త్వమేవ సదసీత్యుపాస్మహే మృడ భో |
సాంబ సదాశివ శంభో శఙ్కర శరణం మే తవ చరణయుగమ్  ||౧౦||

ఐక్యం నిజభక్తేభ్యో వితరసి విశ్వంభరోఽత్ర సాక్షీ భో |
సాంబ సదాశివ శంభో శఙ్కర శరణం మే తవ చరణయుగమ్  || ౧౧||

ఓమితి తవ నిర్దేష్ట్రీ మాయాఽస్మాకం మృడోపకర్త్రీ భో |
సాంబ సదాశివ శంభో శఙ్కర శరణం మే తవ చరణయుగమ్  ||౧౨||

ఔదాస్యం స్ఫుటయతి విషయేషు దిగమ్బరతా చ తవైవ విభో |
సాంబ సదాశివ శంభో శఙ్కర శరణం మే తవ చరణయుగమ్  ||౧౩||

అన్తః కరణవిశుద్ధిం భక్తిం చ త్వయి సతీం ప్రదేహి విభో |
సాంబ సదాశివ శంభో శఙ్కర శరణం మే తవ చరణయుగమ్  ||౧౪||

అస్తోపాధిసమస్తవ్యస్తై రూపైర్జగన్మయోఽసి విభో |
సాంబ సదాశివ శంభో శఙ్కర శరణం మే తవ చరణయుగమ్  ||౧౫||

కరుణావరుణాలయ మయి దాస ఉదాసస్తవోచితో న హి భో |
సాంబ సదాశివ శంభో శఙ్కర శరణం మే తవ చరణయుగమ్  ||౧౬||

ఖలసహవాసం విఘటయ సతామేవ సఙ్గమనిశం భో |
సాంబ సదాశివ శంభో శఙ్కర శరణం మే తవ చరణయుగమ్  || ౧౭||

గరళం జగదుపకృతయే గిలితం భవతా సమోఽస్తి కోఽత్ర విభో |
సాంబ సదాశివ శంభో శఙ్కర శరణం మే తవ చరణయుగమ్  || ౧౮||

ఘనసారగౌరగాత్ర ప్రచురజటాజూటబద్ధగఙ్గ విభో |
సాంబ సదాశివ శంభో శఙ్కర శరణం మే తవ చరణయుగమ్  ||౧౯||

జ్ఞప్తిః సర్వశరీరేష్వఖణ్డితా యా  విభాతి సా త్వయి భో |
సాంబ సదాశివ శంభో శఙ్కర శరణం మే తవ చరణయుగమ్  || ౨౦||

చపలం మమ హృదయకపిం విషయదుచరం దృఢం బధాన విభో |
సాంబ సదాశివ శంభో శఙ్కర శరణం మే తవ చరణయుగమ్  ||౨౧||

ఛాయా  స్థాణోరపి తవ తాపం నమతాం హరత్యహో శివ భో |
సాంబ సదాశివ శంభో శఙ్కర శరణం మే తవ చరణయుగమ్  ||౨౨||

జయ కైలాసనివాస ప్రమథగణాధీశ భూసురార్చిత భో |
సాంబ సదాశివ శంభో శఙ్కర శరణం మే తవ చరణయుగమ్  || ౨౩||

ఝణుతకఝఙ్కిణుఝణుతత్కిటతకశబ్దైర్నటసి మహానట భో |
సాంబ సదాశివ శంభో శఙ్కర శరణం మే తవ చరణయుగమ్  ||౨౪||

జ్ఞానం విక్షేపావృతిరహితం కురు మే గురుస్త్వమేవ విభో |
సాంబ సదాశివ శంభో శఙ్కర శరణం మే తవ చరణయుగమ్  ||౨౫||

టఙ్కారస్తవ ధనుషో  దలయతి హృదయం ద్విషామశనిరివ భో |
సాంబ సదాశివ శంభో శఙ్కర శరణం మే తవ చరణయుగమ్  || ౨౬||

ఠాకృతిరివ తవ మాయా బహిరన్తః శూన్యరూపిణీ ఖలు భో |
సాంబ సదాశివ శంభో శఙ్కర శరణం మే తవ చరణయుగమ్  || ౨౭||

డంబరమంబురుహామపి దలయత్యనఘం త్వదఙ్ఘ్రియుగళం భో |
సాంబ సదాశివ శంభో శఙ్కర శరణం మే తవ చరణయుగమ్  || ౨౮||

ఢక్కాక్షసూత్రశూలద్రుహిణకరోటీసముల్లసత్కర భో |
సాంబ సదాశివ శంభో శఙ్కర శరణం మే తవ చరణయుగమ్  || ౨౯||

ణాకారగర్భిణీ చేచ్ఛుభదా తే శరణగతిర్నృణామిహ భో |
సాంబ సదాశివ శంభో శఙ్కర శరణం మే తవ చరణయుగమ్  || ౩౦||

తవ మన్వతిసఞ్జపతః సద్యస్తరతి నరో హి భవాబ్ధిం భో |
సాంబ సదాశివ శంభో శఙ్కర శరణం మే తవ చరణయుగమ్  ||౩౧

థూత్కారస్తస్య ముఖే భూయాత్తే నామ నాస్తి యస్య విభో |
సాంబ సదాశివ శంభో శఙ్కర శరణం మే తవ చరణయుగమ్  || ౩౨||

దయనీయశ్చ దయాళుః కోఽస్తి మదన్యస్త్వదన్య ఇహ వద భో |
సాంబ సదాశివ శంభో శఙ్కర శరణం మే తవ చరణయుగమ్  ||౩౩||

ధర్మస్థాపనదక్ష త్ర్యక్ష గురో దక్షయజ్ఞశిక్షక భో |
సాంబ సదాశివ శంభో శఙ్కర శరణం మే తవ చరణయుగమ్  ||౩౪||

నను తాడీతోఽసి ధనుషా లుబ్ధధియా త్వం పురా నరేణ విభో |
సాంబ సదాశివ శంభో శఙ్కర శరణం మే తవ చరణయుగమ్  || ౩౫||

పరిమాతుం తవ మూర్తిం నాలమజస్తత్పరాత్పరోఽసి విభో|
సాంబ సదాశివ శంభో శఙ్కర శరణం మే తవ చరణయుగమ్  || ౩౬||

ఫలమిహ నృతయా జనుషస్త్వత్పదసేవా సనాతనేశ విభో |
సాంబ సదాశివ శంభో శఙ్కర శరణం మే తవ చరణయుగమ్  || ౩౭||

బలమారోగ్యం చాయుస్త్వద్గుణరుచితాం చిరం ప్రదేహి విభో |
సాంబ సదాశివ శంభో శఙ్కర శరణం మే తవ చరణయుగమ్  || ౩౮||

భగవన్ భర్గ భయాపహ భూతపతే భూతిభూషితాఙ్గ విభో |
సాంబ సదాశివ శంభో శఙ్కర శరణం మే తవ చరణయుగమ్  || ౩౯||

మహిమా తవ నహి మాతి శ్రుతిషు హిమానీధరాత్మజాధవ భో |
సాంబ సదాశివ శంభో శఙ్కర శరణం మే తవ చరణయుగమ్  || ౪౦||

యమనియమాదిభిరఙ్గైర్యమినో హృదయే భజన్తి స త్వం భో |
సాంబ సదాశివ శంభో శఙ్కర శరణం మే తవ చరణయుగమ్  || ౪౧||

రజ్జావహిరివ శుక్తౌ రజతమివ త్వయి జగన్తి భాన్తి విభో |
సాంబ సదాశివ శంభో శఙ్కర శరణం మే తవ చరణయుగమ్  || ౪౨||

లబ్ధ్వా భవత్ప్రసాదాచ్చక్రం విధురవతి లోకమఖిలం భో |
సాంబ సదాశివ శంభో శఙ్కర శరణం మే తవ చరణయుగమ్  || ౪౩||  

వసుధాతద్ధరతచ్ఛయరథమౌర్వీశరపరాకృతాసుర భో |
సాంబ సదాశివ శంభో శఙ్కర శరణం మే తవ చరణయుగమ్  || ౪౪||  

శర్వ దేవ సర్వోత్తమ సర్వద దుర్వృత్తగర్వహరణ విభో |
సాంబ సదాశివ శంభో శఙ్కర శరణం మే తవ చరణయుగమ్  || ౪౫||

షడ్రిపుషడూర్మిషడ్వికారహర సన్ముఖ షణ్ముఖజనక విభో |
సాంబ సదాశివ శంభో శఙ్కర శరణం మే తవ చరణయుగమ్  || ౪౬||

సత్యం జ్ఞానమనన్తం బ్రహ్మేత్యేతల్లక్షణలక్షిత భో |
సాంబ సదాశివ శంభో శఙ్కర శరణం మే తవ చరణయుగమ్  || ౪౭||

హాహాహూహూముఖసురగాయకగీతపదానవద్య విభో |
సాంబ సదాశివ శంభో శఙ్కర శరణం మే తవ చరణయుగమ్  || ౪౮||

ళాదిర్న హి ప్రయోగస్తదన్తమిహ మఙ్గళం సదాఽస్తు విభో |
సాంబ సదాశివ శంభో శఙ్కర శరణం మే తవ చరణయుగమ్  || ౪౯||

క్షణమివ దివసాన్నేష్యతి త్వత్పదసేవాక్షణోత్సుకః శివ భో |
సాంబ సదాశివ శంభో శఙ్కర శరణం మే తవ చరణయుగమ్  ||౫౦||

ఇతి శ్రీమత్పరమహంసపరివ్రాజకాచార్యశ్రీగోవిన్దభగవత్పూజ్యపాదశిష్యస్య
శ్రీశఙ్కరభగవతః కృతౌ సువర్ణమాలాస్తుతిః సంపూర్ణా||

Related Content

Suvarnamaalaa Stutih

Suvarnamala Stuti

सुवर्णमालास्तुतिः - Suvarnamaalaa Stutih

सुवर्णमालास्तुतिः - Suvarnamaalaa Stutih

सुवर्णमालास्तुतिः - Suvarnamala Stutih