अस्ताचलालय-गतस्तपनो दिनान्ते 
पत्यु: करच्युतिभिया तरसात्मवक्त्रम् ।
आवृत्य किन्नु तमसा कमलानि सन्ति
शम्भो! सदाशिव शुभं भवतात् सुनक्तम्।।

प्रीत्या सुपूर्ण-गिरिजावदनं शशाङ्क
दृष्ट्वैव शम्भुनयनामलनीलपद्मम् ।
नूनं प्रसम्पुटितमीश्वरनेत्रपत्रम् 
शम्भो! सदाशिव शुभं भवतात्  सुनक्तम्।।

नीडेषु कीरनिकरा विरतात्मवाचक:
सुप्ता प्रशान्तहृदया धरणी जनन्या ।
क्रोडे हि जीव निजया समयाभिगुप्ता
शम्भो! सदाशिव शुभं भवतात् सुनक्तम्।।

चन्द्रः सुकोमलकरै: धरणीतलस्था
जीवान् हि लालयति किं श्मनाशहेतुः।
स्नेहप्रसन्नवदन रजनीश्वरोसौ
शम्भो सदाशिव शुभं भवतात् सुनक्तम्।।

गौरी-कराम्भुज-सुलालित-वक्त्रपद्म
श्री-कार्तिकेय-गणनाथ-सुसेवितान्घ्रे ।
देवैस्तथा मुनिजनैर्मनुजैः समेढ्य
शम्भो! सदाशिव शुभं भवतात् सुनक्तम् ॥

विश्वेश्वर! प्रमथनाथ! कृपैकसिन्धो!
श्री पार्वतीप्रियपते! भुवनैकबन्धो!
गङ्गाधर! त्रिनयन! त्रिपुरान्तकारिन्!
शम्भो! सदाशिव शुभं भवतात् सुनक्तम् ॥

दिव्यातिदिव्यशयने नयनाभिरामे
संसेवितामलतनो मृदुमन्दहासै: 
संवाहिताखिल गुरो भुवनैकपाल
शम्भो! सदाशिव शुभं भवतात् सुनक्तम्।।

संसिक्त-गन्ध-निवहै: परिपूर्णगेहे
कस्तूरिकागुरु-सुचर्चित-पादपद्म ।
श्रीकान्तकान्त-दुरितान्तक-शान्तमूर्ते
शम्भो! सदाशिव शुभं भवतात् सुनक्तम् ।।

भक्ताभिरक्त-करुणा-परिषिक्त-नेत्र
प्रीति-प्रसन्न-वदन-प्रमथाभिपाल ।
दुर्दैव-खण्डनकृते स्मित-पद्म-वक्त्र
शम्भो! सदाशिव शुभं भवतात् सुनक्तम् ।।

तापाभिखण्डनकृते विधुखण्डभाल
शूलं विभर्षि सततं स्वजनाभिगुप्तै: ।
गौरीश शंकर विभो भुवनैकबन्धो
शम्भो! सदाशिव शुभं भवतात् सुनक्तम् ।।

शुभा रात्रि समायाता विश्रामार्थं तव प्रभो
उमया निद्रयेदानिं सेवितस्त्वं महेश्वर ।
सन्ध्या रात्रिक कथार्यान्ते  श्रुत्वा शयनमन्त्रकं
निद्रागता तवेदानिं नेत्रे निमील्य वर्तसे ।।

गिरिजा करजस्पर्शैः मृदुलैः मधुरै: शुभै:
पुण्या निद्रा समायाति जगदीश्वर शंकर ।
संवाहनविधिज्ञौ तौ कार्तिकेयविनायकौ
ताभ्यां संवाहितपादस्त्वम् शयने परमे स्थित:।।

तन्त्री तानयुतं स्तोत्रं मृदुल-मुरलीरवम् ।
शृण्वन् हि मधुरं शम्भो सुप्तो भवसि साम्प्रतम्  ।।

सुप्तो जगत्पिता शम्भुरुमया परया मुदा ।
तूष्णीं सन्तु भवन्तस्तु मङ्गलं मङ्गलं तयो।।

सुप्तौ शिवसुतौ तौ हि गजानन-षडाननौ।
पित्रा मात्रा परिष्वक्तौ  मङ्गलं मङ्गलं तयोः।।

सिंहोऽथ वृषभस्सुप्तौ मयूरो मूषिकस्तथा ।
सर्वे ते सुखिन: सन्तु शिवा-शिव-प्रसेवका:।।

शिवाय तस्मै जगदीश्वराय देव्यै च तस्यै जगदम्बिकायै ।
गजेन्द्रवक्त्राय षडाननाय नमो नमो मेस्तु नमो नमो मे।।

भक्तिरस्तु शिवे नित्यं शिवायां चापि सर्वदा ।
मनसा वपुषा वाचा प्रणमामि पुन:पुन:।।

सदाशिव-सुनक्तं तु प्रथितं भक्ति-भावत: ।
श्री जगन्नाथ-शिष्येण ह्रिषिकेषाख्यभिक्षुणा।।