ശിവായ നമഃ || ശിവപാദാദി കേശാന്ത വര്ണന സ്തോത്രം കല്യാണം നോ വിധത്താം കടകതടലസത്കല്പവാഹീനികുഞ്ജ- ക്രീഡാസംസക്തവിദ്യാധരനിവഹവധൂഗീതരുദ്രാപദാനഃ| താരൈര്ഹേരംബനാദൈസ്തരലിതനിനദത്താരകാരാതികേകീ കൈലാസഃ ശര്വനിര്വൃത്യഭിജനകപദഃ സര്വദാ പര്വതേന്ദ്രഃ ||൧|| യസ്യ പ്രാഹുഃ സ്വരൂപം സകലദിവിഷദാം സാരസര്വസ്വയോഗം യത്യേഷുഃ ശാര്ംഗധന്വാ സമജനി ജഗതാം രക്ഷണേ ജാഗരൂകഃ | മൗര്വീ ദര്വീകരാണാമപി ച പരിവൃഢഃ പൂസ്രയീ സാ ച ലക്ഷ്യം സോഽവ്യാദവ്യാജമസ്മാനശിവഭിദനിശം നാകിനാം ശ്രീപിനാകഃ ||൨|| ആതങ്കാവേഗഹാരീ സകലദിവിഷദാമംഘ്രിപദ്മാശ്രയാണാം മാതംഗാദ്യുഗ്രദൈത്യപ്രകരതനുഗലദ്രക്തധാരാക്തധാരഃ | ക്രൂരഃ സൂരായുതാനാമപി ച പരിഭവം സ്വീയഭാസാ വിതന്വന് ഘോരാകാരഃ കുഠാരോ ദൃഢതരദുരിതാഖ്യാടവീം പാടയേന്നഃ |൩|| കാലാരാതേഃ കരാഗ്രേ കൃതവസതിരുരഃശാണതാതോ രിപൂണാം കാലേ കാലേ കുലാദ്രിപ്രവരതനയയാ കല്പിതസ്നഹലേപഃ | പായാന്നഃ പാവകാര്ചിഃപ്രസരസഖമുഖഃ പാപഹന്താ നിതാന്തം ശൂലഃ ശ്രീപാദസേവാഭജനരസജുഷാം പാലനൈകാന്തശീലഃ ||൪|| ദേവസ്യാങ്കാശ്രയായാഃ കുലഗിരിദുഹിതുര്നേത്രകോണപ്രചാര- പ്രസ്താരാനത്യുദാരാന്പിപടിഷുരിവ യോ നിത്യമത്യാദരേണ | ആധത്തേ ഭംഗിതുംഗൈരനിശമവയവൈരന്തരംഗം സമോദം സോമാപീഡസ്യ സോഽയം പ്രദിശതു കുശലം പാണിരംഗഃ കുരംഗഃ ||൫|| കണ്ഠപ്രാന്താവസജ്ജത്കനകമയമഹാഘണ്ടികാഘോരഘോഷൈഃ കണ്ഠാരാവൈരകുണ്ഠൈരപി ഭരിതജഗച്ചക്രവാലാന്തരാലഃ | ചണ്ഡഃ പ്രോദ്ദണ്ഡശൃംഗഃ കകുദകവലിതോത്തുംഗകൈലാസശ്രൃംഗഃ കണ്ഠേ കാലസ്യ വാഹഃ ശമയതു ശമലം ശാശ്വ്തഃ ശാക്കരേന്ദ്രഃ ||൬|| നിര്യദ്ദാനാംബുധാരാപരിമളതരളീഭൂതലോലംബപാലീഝങ്കാരൈഃ ശങ്കരാദ്രേഃ ശിഖരശതദരീഃ പൂരയന്ഭൂരീഘോഷൈഃ | ശാര്ഘഃ സൗവര്ണശൈലപ്രതിമപൃഥുവപുഃ സര്വവിഘ്നാപഹര്താ ശര്വാണ്യാഃ പൂര്വസൂനുഃ സ ഭവതു ഭവതാം സ്വസ്തിദോ ഹസ്തിവക്ത്രഃ ||൭|| യഃ പുണ്യൈര്ദേവതാനാം സമജനി ശിവയോഃ ശ്ലാഘ്യവീര്യൈകമത്യാ യന്നാമ്നി ശ്രൂയമാണേ ദിതിജഭടഘടാ ഭീതിഭാരം ഭജന്തേ | ഭൂയാത്സോഽയം വിഭൂത്യൈ നിശിതശരശിഖാപാടിതക്രൗഞ്ചശൈലഃ സംസാരാഗാധകൂപോദരപതിതസമുത്താരകസ്താരകാരിഃ ||൮|| ആരൂഢഃ പ്രൗഢവേഗപ്രവിജിതപവനം തുംഗതുംഗം തുരംഗം ചൈലം നീലം വസാനഃ കരതലവിലസത്കാണ്ഡകോദണ്ഡദണ്ഡഃ | രാഗദ്വേഷാദിനാനാവിധമൃഗപടലീഭീതികൃദ്ഭൂതഭര്താ കുര്വന്നാഖേടലീലാം പരിലസതു മനഃ കാനനേ മാമകീനേ ||൯|| അംഭോജാഭ്യാം ച രംഭാരഥചരണലതാദ്വന്ദ്വകുംഭീന്ദ്രകുംഭൈര്- ബിംബേനേന്ദോശ്ച കംബോരുപരി വിലസതാ വിദ്രുമേണോത്പലാഭ്യാം | അംഭോദേനാപി സംഭാവിതമുപജനിതാഡംബരം ശംബരാരേഃ ശംഭോഃ സംഭോഗയോഗ്യം കിമപി ധനമിദം സംഭവേത്സംപദേ നഃ ||൧൦|| വേണീസൗഭാഗ്യവിസ്മാപിതതപനസുതാചാരുവേണീവിലാസാന് വാണീനിര്ധൂതവാണീകരതലവിധൃതോദാരവീണാവിരാവാന് | ഏണീനേത്രാന്തഭംഗീനിരസനനിപുണാപാംഗകോണാനുപാസേ   ശോണാന്പ്രാണാനുദൂഢപ്രതിനവസുഷമാകന്ദലാനിന്ദുമൗലേഃ ||൧൧|| നൃത്താരംഭേഷു ഹസ്താഹതമുരജധിമീധിക്കൃതൈരത്യുദാരൈ- ശ്ചിത്താനന്ദം വിധത്തേ സദസി ഭഗവതഃ സന്തതം യഃ സ നന്ദീ | ചണ്ഡീശാദ്യാസ്തഥാഽന്യേ ചതുരഗുണഗണപ്രീണിതസ്വാമിസത്കാ- രോത്കര്ഷോദ്യത്പ്രസാദാഃ പ്രമഥപരിവൃഢാഃ സന്തു സന്തോഷിണോ നഃ ||൧൨|| മുക്താമാണിക്യജാലൈഃ പരികലിതമഹാസാലമാലോകനീയം പ്രത്യുപ്താനര്ധരത്നൈര്ദിശി ദിശി ഭവനൈഃ കല്പിതൈര്ദിക്പതീനാം | ഉദ്യാനൈരദ്രികന്യാപരിജനവനിതാമാനനീയൈഃ പരിതം ഹൃദ്യം ഹൃദ്യസ്തു നിത്യം മമ ഭുവനപതേര്ധാമ സോമാര്ധമൗലേഃ ||൧൩|| സ്തംഭൈര്ജംഭാരിരത്നപ്രവരവിരചിതൈഃ സംഭൃതോപാന്തഭാഗം ശുംഭത്സോപാനമാര്ഗം ശുചിമണിനിചയൈര്ഗുംഫിതാനല്പശില്പം | കുംഭൈഃ സംപൂര്ണശോഭം ശിരസി സുഘടിതൈഃ ശാതകുംഭൈരപങ്കൈഃ ശംഭോഃ സംഭാവനീയം സകലമുനിജനൈഃ സ്വസ്തിദം സ്യാത്സദാ നഃ ||൧൪|| ന്യസ്തോ മധ്യേ സഭായാഃ പരിസരവിലസത്പാദപീഠാഭിരാമോ ഹൃദ്യഃ പാദൈശ്ചതുര്ഭിഃ കനകമണിമയൈരുച്ചകൈരുജ്ജ്വലാത്മാ | വാസോരത്നേന കേനാപ്യധികമൃദുതരേണാസ്തൃതോ വിസ്തൃതശ്രീപീഠഃ പീഡാഭരം നഃ ശമയതു ശിവയോഃ സ്വൈരസംവാസയോഗ്യഃ ||൧൫|| ആസീനസ്യാധിപീഠം ത്രിജഗദധിപതേരംഘ്രിപീഠാനുഷക്തൗ പാഥോജാഭോഗഭാജൗ പരിമൃദുലതലോല്ലാസിപദ്മാഭിലേഖൗ | പാതാം പാദാവുഭൗ തൗ നമദമരകിരീടോല്ലസച്ചാരുഹീര- ശ്രേണീശോണായമാനോന്നത നഖദശകോദ്ഭാസമാനൗ സമാനൗ ||൧൬|| യന്നാദോ വേദവാചാം നിഗദതി നിഖിലം ലക്ഷണം പക്ഷികേതുര്- ലക്ഷ്മീസംഭോഗസൗഖ്യം വിരചയതി യയോശ്ചാപരേ രൂപഭേദേ | ശംഭോഃ സംഭാവനീയേ പദകമലസമാസംഗതസ്തുംഗശോഭേ മാംഗല്യം നഃ സമഗ്രം സകലസുഖകരേ നൂപുരേ പൂരയേതാം ||൧൭|| അംഗേ ശൃംഗാരയോനേഃ സപദി ശലഭതാം നേത്രവഹ്നൗ പ്രയാതേ ശത്രോരുദ്ധൃത്യ തസ്മാദിഷുധിയുഗമധോ ന്യസ്തമഗ്രേ കിമേതത് | ശങ്കാമിത്ഥം നതാനാമമരപരിഷദാമന്തരങ്കൂരയത്തത്- സംഘാതം ചാരു ജംഘായുഗമഖിലപതേരംഹസാ സംഹരേന്നഃ ||൧൮|| ജാനുദ്വന്ദ്വേന മീനധ്വജനൃവരസമുദ്ഗോപമാനേന സാകം രാജന്തൗ രാജരംഭാകരികരകനകസ്തംഭസംഭാവനീയൗ | ഊരൂ ഗൗരീകരാംഭോരുഹസരസസമാമര്ദനാനന്ദഭാജൗ ചാരൂ ദൂരീക്രിയേതാം  ദുരിതമുപചിതം ജന്മജന്മാന്തരേ നഃ ||൧൯|| ആമുക്താനര്ഘരത്നപ്രകരകരപരിഷ്വക്തകല്യാണകാഞ്ചീ- ദാമ്നാ ബദ്ധേന ദുഗ്ധദ്യുതിനിചയമുഷാ ചീനപട്ടാംബരേണ | സംവീതേ ശൈലകന്യാസുചരിതപരിപാകായമാനേ നിതംബേ നിത്യം നര്നര്തു ചിത്തം മമ നിഖിലജഗത്സ്വാമിനഃ സോമമൗലേഃ ||൨൦|| സന്ധ്യാകാലാനുരജ്യദ്ദിനകരസരുചാ കാലധൗതേന ഗാഢം വ്യാനദ്ധഃ സ്നിഗ്ധമുഗ്ധഃ സരസമുദരബന്ധേന വീതോപമേന | ഉദ്ദീപ്രൈഃ സ്വപ്രകാശൈരുപചിതമഹിമാ മന്മഥാരേരുദാരോ മധ്യോ മിഥ്യാര്ഥസഘ്ര്യങ് മമ ദിശതു സദാ സംഗതിം മംഗളാനാം ||൨൧|| നാഭീചക്രാലവാലാന്നവനവസുഷമാദോഹദശ്രീപരീതാ- ദുദ്ഗച്ഛന്തീ പുരസ്താദുദരപഥമതിക്രമ്യ വക്ഷഃ പ്രയാന്തീ | ശ്യാമാ കാമാഗമാര്ഥപ്രകഥനലിപിവദ്ഭാസതേ യാ നികാമം സാ മാം സോമാര്ധമൗലേഃ സുഖയതു സതതം രോമവല്ലീമതല്ലീ ||൨൨|| ആശ്ലേഷേഷ്വദ്രിജായാഃ കഠിനകുചതടീലിപ്തകാശ്മീരപങ്ക- വ്യാസംഗാദ്യദുദ്യദര്കദ്യുതിഭിരുപചിതസ്പര്ധമുദ്ദാമഹൃദ്യം | ദക്ഷാരാതേരുദൂഢപ്രതിനവമണിമാലാവലീഭാസമാനം വക്ഷോ വിക്ഷോഭിതാഘം സതതനതിജുഷാം രക്ഷതാദക്ഷതം നഃ ||൨൩|| വാമാങ്കേ വിസ്ഫുരന്ത്യാഃ കരതലവിലസച്ചാരുരക്തോത്പലായാഃ കാന്തായാ വാമവക്ഷോരുഹഭരശിഖരോന്മര്ദനവ്യഗ്രമേകം | അന്യാംസ്ത്രീനപ്യുദാരാന്വരപരശുമൃഗാലങ്കൃതാനിന്ദുമൗലേര്- ബാഹൂനാബദ്ധഹേമാംഗദമണികടകാനന്തരാലോകയാമഃ ||൨൪|| സമ്മ്രാന്തായാഃ ശിവായാഃ പതിവിലയഭിയാ സര്വലോകോപതാപാത്- സംവിഗ്നസ്യാപി വിഷ്ണോഃ സരഭസമുഭയോര്വാരണപ്രേരണാഭ്യാം | മധ്യേ ത്രൈശങ്കവീയാമനുഭവതി ദശാം യത്ര ഹാലാഹലോഷ്മാ സോഽയം സര്വാപദാം നഃ ശമയതു നിചയം നീലകണ്ഠസ്യ കണ്ഠഃ ||൨൫|| ഹൃദ്യൈരദ്രീന്ദ്രകന്യാമൃദുദശനപദൈര്മുദ്രിതോ വിദ്രുമശ്രീ- രുദ്ദ്യോതന്ത്യാ നിതാന്തം ധവളധവളയാ മിശ്രിതോ ദന്തകാന്ത്യാ | മുക്താമാണിക്യജാലവ്യതികരസദൃശാ തേജസാ ഭാസമാനഃ സദ്യോജാതസ്യ ദദ്യാദധരമണിരസൗ സംപദാം സഞ്ചയം നഃ ||൨൬|| കര്ണാലങ്കാരനാനാമണിനികരരുചാം സഞ്ചയൈരഞ്ചിതായാം വര്ണ്യായാം സ്വര്ണപദ്മോദരപരിവിലസത്കര്ണികാസന്നിഭായാം | പദ്ധത്യാം പ്രാണവായോഃ പ്രണതജനഹൃദംഭോജവാസസ്യ ശംഭോര്നിത്യം നശ്ചിത്തമേതദ്വിരചയതു സുഖേ നാസികാം നാസികായാം ||൨൭|| അത്യന്തം ഭാസമാനേ രുചിരതരരുചാം സംഗമാത്സന്മണീനാ- മുദ്യച്ചണ്ഡാംശുധാമപ്രസരനിരസനസ്പഷ്ടദൃഷ്ടാപദാനേ | ഭൂയാസ്താം ഭൂതയേ നഃ കരിവരജയിനഃ കര്ണപാശാവലംബേ ഭക്താലീഭാലസജ്ജജ്ജനിമരണലിപേഃ കുണ്ഡലേ കുണ്ഡലേ തേ ||൨൮|| യാഭ്യാം കാലവ്യവസ്ഥാ ഭവതി തനുമതാം യോ മുഖം ദേവതാനാം യേഷാമാഹുഃ സ്വരൂപം ജഗതി മുനിവരാ ദേവതാനാം ത്രയീം താം | രുദ്രാണീവക്ത്രപങ്കേരുഹസതതവിഹാരോത്സുകേന്ദീവരേഭ്യ- സ്തേഭ്യസ്ത്രിഭ്യഃ പ്രണാമാഞ്ജലിമുപരചയേ ത്രീക്ഷണസ്യേക്ഷണേഭ്യഃ ||൨൯|| വാമം വാമാങ്കഗായാ വദനസരസിജേ വ്യാവലദ്വല്ലഭായാ വ്യാനമ്രേഷ്വന്യദന്യത്പുനരലികഭവം വീതനിഃശേഷരൗക്ഷ്യം | ഭൂയോ ഭൂയോഽപി മോദാന്നിപതദതിദയാശീതലം ചൂതബാണേ ദക്ഷാരേരീക്ഷണാനാം ത്രയമപഹരതാദാശു താപത്രയം നഃ ||൩൦|| യസ്മിന്നര്ധേന്ദുമുഗ്ധദ്യുതിനിചയതിരസ്കാരനിസ്തന്ദ്രകാന്തൗ കാശ്മീരക്ഷോദസങ്കല്പിതമിവ രുചിരം ചിത്രകം ഭാതി നേത്രം | തസ്മിന്നുല്ലീലചില്ലീനടവരതരുണീലാസ്യരംഗായമാണേ കാലാരേഃ ഫാലദേശേ വിഹരതു ഹൃദയം വീതചിന്താന്തരം നഃ ||൩൧|| സ്വാമിന് ഗംഗാമിവാംഗീകുരു തവ ശിരസാ മാമപീത്യര്ഥയന്തീം ധന്യാം കന്യാം ഖരാംശോഃ ശിരസി വഹതി കിംന്വേഷ കാരുണ്യശാലീ | ഇത്ഥം ശങ്കാം ജനാനാം ജനയദതിഘനം കൈശികം കാലമേഘ- ച്ഛായം ഭൂയാദുദാരം ത്രിപുരവിജയിനഃ ശ്രേയസേ ഭൂയസേ നഃ ||൩൨|| ശ്രൃംഗാരാകല്പയോഗ്യൈഃ ശിഖരിവരസുതാസത്സഖീഹസ്തലൂനൈഃ സൂനൈരാബദ്ധമാലാവലിപരിവിലസത്സൗരഭാകൃഷ്ടഭൃംഗം | തുംഗം മാണിക്യകാന്ത്യാ പരിഹസിതസുരാവാസശൈലേന്ദ്രശ്രൃംഗം സംഘം നഃ സങ്കടാനാം വിഘടയതു സദാ കാങ്കടീകം കിരീടം ||൩൩|| വക്രാകാരഃ കലങ്കീ ജഡതനുരഹമപ്യംഘ്രിസേവാനുഭാവാ- ദുത്തംസത്വം പ്രയാതഃ സുലഭതരഘൃണാസ്യന്ദിനശ്ചന്ദ്രമൗലേഃ | തത്സേവന്താം ജനൗഘാഃ ശിവമിതി നിജയാഽവസ്ഥയൈവ ബ്രുവാണം വന്ദേ ദേവസ്യ ശംഭോര്മുകുടസുഘടിതം മുഗ്ധപീയൂഷഭാനും ||൩൪|| കാന്ത്യാ സംഫുല്ലമല്ലീകുസുമധവളയാ വ്യാപ്യ വിശ്വം വിരാജന് വൃത്താകാരോ വിതന്വന് മുഹുരപി ച പരാം നിര്വൃതിം പാദഭാജാം | സാനന്ദം നന്ദിദോഷ്ണാ മണികടകവതാ വാഹ്യമാനഃ പുരാരേഃ ശ്വേതച്ഛത്രാഖ്യശീതദ്യുതിരപഹരതാദസ്താപദാ നഃ ||൩൫|| ദിവ്യാകല്പോജ്ജ്വലാനാം ശിവഗിരിസുതയോഃ പാര്ശ്വയോരാശ്രിതാനാം രുദ്രാണീസത്സഖീനാമതിതരലകടാക്ഷാഞ്ചലൈരഞ്ചിതാനാം | ഉദ്വേല്ലദ്വാഹുവല്ലീവിലസനസമയേ ചാമരാന്ദോലനീനാമുദ്ഭൂതഃ കങ്കണാലീവലയകലകലോ വാരയേദാപദോ നഃ ||൩൬|| സ്വര്ഗൗകഃസുന്ദരീണാം സുലലിതവപുഷാം സ്വാമിസേവാപരാണാം വല്ഗദ്ഭൂഷാണി വക്ത്രാംബുജപരിവിഗലന്മുഗ്ധഗീതാമൃതാനി | നിത്യം നൃത്താന്യുപാസേ ഭുജവിധുതിപദന്യാസഭാവാവലോക- പ്രത്യുദ്യത്പ്രീതിമാദ്യത്പ്രമഥനടനടീദത്തസംഭാവനാനി ||൩൭|| സ്ഥാനപ്രാപ്ത്യാ സ്വരാണാം കിമപി വിശദതാം വ്യഞ്ജയന്മഞ്ജുവീണാ- സ്വാനാവച്ഛിന്നതാലക്രമമമൃതമിവാസ്വാദ്യമാനം ശിവാഭ്യാം | നാനാരാഗാതിഹൃദ്യം നവരസമധുരസ്തോത്രജാതാനു വിദ്ധം ഗാനം വീണാമഹര്ഷേഃ കലമതിലലിതം കര്ണപൂരായതാം നഃ ||൩൮|| ചേതോ ജാതപ്രമോദം സപദി വിദധതീ പ്രാണിനാം വാണിനീനാം പാണിദ്വന്ദ്വാഗ്രജാഗ്രത്സുലലിതരണിതസ്വര്ണതാലാനുകൂലാ | സ്വീയാരാവേണ പാഥോധരരവപടുനാ നാദയന്തീ മയൂരീ മായൂരീം മന്ദഭാവം മണിമുരജഭവാ മാര്ജനാ മാര്ജയേന്നഃ ||൩൯|| ദേവേഭ്യോ ദാനവേഭ്യഃ പിതൃമുനിപരിഷത്സിദ്ധവിദ്യാധരേഭ്യഃ സാധ്യേഭ്യശ്ചാരണേഭ്യോ മനുജപശുപതജ്ജാതികീടാദികേഭ്യഃ | ശ്രീകൈലാസപ്രരൂഢാസ്തൃണവിടപിമുഖാശ്ചാപി യേ സന്തി തേഭ്യഃ സവഭ്യോ നിര്വിചാരം നതിമുപരചയേ ശര്വപാദാശ്രയേഭ്യഃ ||൪൦|| ധ്യായന്നിത്യം പ്രഭാതേ പ്രതിദിവസമിദം സ്തോത്രരത്നം പഠേദ്യഃ കിംവാ ബ്രൂമസ്തദീയം സുചരിതമഥവാ കീര്തയാമഃ സമാസാത് | സംപജ്ജാതം സമഗ്രം സദസി ബഹുമതിം സര്വലോകപ്രിയത്വം സംപ്രാപ്യായുഃശതാന്തേ പദമയതി പരബ്രഹ്മണോ മന്മഥാരേഃ ||൪൧|| ഇതി ശ്രീമത്പരമഹംസപരിവ്രാജകാചാര്യസ്യ ശ്രീഗോവിന്ദഭഗവത്പൂജ്യപാദശിഷ്യസ്യ ശ്രീമച്ഛങ്കരാചാര്യസ്യ കൃതം ശിവപാദാദികേശാന്തവര്ണനസ്തോത്രം സംപൂര്ണം ||