Shiva Stutih 
(Shri Mallikuchisoorisoonu Narayana Panditaachaarya Virachita)

---

ശിവായ നമഃ || 

ശിവസ്തുതിഃ |
(ശ്രീ മല്ലികുചിസൂരിസൂനു നാരയണ പണ്ഡിതാചാര്യ വിരചിതാ)

സ്ഫുടം സ്ഫടികസപ്രഭം സ്ഫുടിതഹാരകശ്രീജടം ശശാങ്കദലശേഖരം കപിലഫുല്ലനേത്രത്രയം | 
തരക്ഷുവരകൃത്തിമദ്ഭുജഗഭൂഷണം ഭൂതിമത്കദാ നു ശിതികണ്ഠ  തേ വപുരവേക്ഷതേ വീക്ഷണം ||൧||

ത്രിലോചന വിലോചനേ ലസതി തേ ലലാമായിതേ സ്മരോ നിയമഘസ്മരോ നിയമിനാമഭൂദ്ഭസ്മസാത് | 
സ്വഭക്തിലതയാ വശീകൃതവതീ സതീയം സതീ സ്വഭക്തവശതോ ഭവാനപി  വശീ പ്രസീദ  പ്രഭോ ||൨|| 

മഹേശ  മഹിതോഽസി തത്പുരുഷപൂരുഷാഗ്ര്യോ ഭവാനഘോരരിപുഘോര തേഽനവമ വാമദേവാഞ്ജലിഃ | 
നമഃ സപദിജാത തേ ത്വമിതി പഞ്ചരൂപോചിതപ്രപഞ്ചചയപഞ്ചവൃന്മമ മനസ്തമസ്താഡയ   ||൩|| 

രസാഘനരസാനലാനിലവിയദ്വിവസ്വദ്വിധുപ്രയഷ്ടൃഷു നിവിഷ്ടമിത്യജ ഭജാമി  മൂര്ത്യഷ്ടകം | 
പ്രശാന്തമുത ഭീഷണം ഭുവനമോഹനം ചേത്യഹോ വപൂംഷി ഗുണഭൂഷിതേഽഹമഹമാത്മമോഹംഭിദേ  ||൪|| 

വിമുക്തിപരമാധ്വനാം തവ ഷഡധ്വനാമാസ്പദം പദം നിഗമവേദിനോ ജഗതി വാമദേവാദയഃ | 
കഥഞ്ചിദുപശിക്ഷിതാ ഭഗവതൈവ സംവിദ്രതേ വയം തു വിരലാന്തരാഃ കഥമുമേശ തന്മന്മഹേ ||൫|| 

കഠോരിതകുഠാരയാ ലലിതശൂലയാ വാഹയാ രണഡ്ഡമരുണാ സ്ഫുദ്ധരിണയാ സഖട്വാങ്ഗയാ |  
ചലാഭിരചലാഭിരപ്യഗണിതാഭിരുന്നത്യതശ്ചതുര്ദശ ജഗന്തി തേ ജയ ജയേത്യയുര്വിസ്മയം  ||൬|| 

പുരാ ത്രിപുരരന്ധനം വിവിധദൈത്യവിധ്വംസനം പരാക്രമപരംപരാ അപി പരാ ന തേ വിസ്മയഃ | 
അമര്ഷിബലഹര്ഷിതക്ഷുഭിതവൃത്തനേത്രോജ്ജ്വലജ്ജ്വലനഹേലയാ ശലഭിതം ഹി  ലോകത്രയം ||൭|| 

സഹസ്രനയനോ ഗുഹഃ സഹസഹസ്രരശ്മിര്വിധുര്ബൃഹസ്പതിരുതാപ്പതിഃ സസുരസിദ്ധവിദ്യാധരാഃ |
ഭവത്പദപരായണാഃ ശ്രിയമിമാം യയുഃ പ്രാര്ഥിതാം ഭവാന് സുരതരുര്ഭൃശം ശിവ ശിവ  ശിവാവല്ലഭ ||൮|| 

തവ പ്രിയതമാദതിപ്രിയതമ സദൈവാന്തരം പയസ്യുപഹിതം ഘൃതം സ്വയമിവ ശ്രിയോ വല്ലഭം | 
വിബുധ്യ ലഘുബുദ്ധയഃ സ്വപരപക്ഷലക്ഷ്യായിതം പഠന്തി ഹി ലുഠന്തി തേ ശഠഹൃദഃ ശുചാ  ശുണ്ഠിതാഃ ||൯|| 

നിവാസനിലയാ ചിതാ തവ ശിരസ്തതേര്മാലികാ കപാലമപി തേ കരേ  ത്വമശിവോഽസ്യനന്തര്ധിയാം | 
തഥാപി ഭവതഃ പദം ശിവശിവേത്യദോ ജല്പതാമകിഞ്ചന ന കിഞ്ചന വൃജിനമസ്തി  ഭസ്മീഭവേത് ||൧൦|| 

ത്വമേവ കില കാമധുക് സകലകാമമാപൂരയന് സദാ ത്രിനയനോ ഭവാന് വഹതി ചാര്ചി  നേത്രോദ്ഭവം | 
വിഷം വിഷധരാന്ദധത്പിബസി തേന ചാനന്ദവാന്വിരുദ്ധചരിതോചിതാ ജഗദധീശ തേ  ഭിക്ഷുതാ ||൧൧|| 

നമഃ ശിവശിവാശിവാശിവാര്ഥകൠന്താശിവം  നമോ ഹരഹരാഹരാഹര ഹരാന്തരീം മേ  ദ്രുശം | 
നമോ ഭവ ഭവാഭവപ്രഭവഭൂതയേ മേ  ഭവാന്നമോ മൃഡ നമോ നമോ നമ ഉമേശ തുഭ്യം നമഃ ||൧൨|| 

സതാം ശ്രവണപദ്ധതിം സരതു സന്നതോക്തേത്യസൗ ശിവസ്യ കരുണങ്കുരാത്പ്രതികൃതാത്സദാ  സോചിതാ | 
ഇതി പ്രഥിതമാനസോ വ്യധിത നാമ നാരായണഃ ശിവസ്തുതിമിമാം ശിവം ലികുചിസൂരിസൂനുഃ  സുധീഃ ||൧൩|| 

ഇതി ശ്രീമല്ലികുചിസൂരിസൂനുനാരയണപണ്ഡിതാചാര്യവിരചിതാ ശിവസ്തുതിഃ സംപൂര്ണാ||