മഹേശാനന്താദ്യ ത്രിഗുണരഹിതാമേയവിമല 
സ്വരാകാരാപാരാമിതഗുണഗണാകാരിനിവൃതേ । 
നിരാധാരാധാരാമരവര നിരാകാര പരമ 
പ്രഭാപൂരാകാരാവര പര നമോ വേദ്യ ശിവ തേ ॥1॥

നമോ വേദാവേദ്യാഖിലജഗദുപാദാന നിയതം 
സ്വതന്ത്രാസാമാന്താനവധുതിനിജാകാരവിരതേ । 
നിവർതന്തേ വാചഃ ശിവഭജനമപ്രാപ്യ മനസാ 
യതോഽശക്താഃ സ്തോതും സകൃദപി ഗുണാതീത ശിവ തേ ॥2॥

ത്വദന്യദ്വസ്ത്വേകം നഹി ഭവ സമസ്തത്രിഭുവനേ 
വിഭുസ്ത്വം വിശ്വാത്മാ ന ച പരമമസ്തീശ ഭവതഃ । 
ധ്രുവം മായാതീതസ്ത്വമസി സതതം നാത്ര വിഷയോ ന തേ 
കൃത്യം സത്യം  ക്വചിദപി വിപര്യേതി ശിവ തേ ॥3॥

ത്വയൈവേമം ലോകം നിഖിലമമലം വ്യാപ്യ സതതം 
തഥൈവാന്യാം ലോകസ്ഥിതിമനഘ ദേവോത്തമ വിഭോ । 
ത്വയൈവൈതത്സൃഷ്ടം ജഗദഖിലമീശാന ഭഗവ-
ന്വിലാസോഽയം കശ്ചിത്തവ ശിവ നമോ വേദ്യ ശിവ തേ ॥4॥

ജഗത്സൃഷ്ടേഃ പൂർവം യദഭവദുമാകാന്ത സതതം 
ത്വയാ ലീലാമാത്രം തദപി സകലം രക്ഷിതമഭൂത് ॥ 
തദേവാഗ്രേ ഭാലപ്രകടനയനാദ്ഭുതകരാ-
ജ്ജഗദ്ദഗ്ധ്വാ സ്ഥാസ്യസ്യജ ഹര നമോ വേദ്യ ശിവ തേ ॥5॥

വിഭൂതീനാമന്തോ ഭവ ന ഭവതോ ഭൂതിവിലസ-
ന്നിജാകാര ശ്രീമന്ന ഗുണഗണസീമാപ്യവഗതാ । 
അതദ്വ്യാവൃത്യാഽദ്ധാ ത്വയി സകലവേദാശ്ച ചകിതാ 
ഭവന്ത്യേവാസാമപ്രകൃതിക നമോ ധർഷ ശിവ തേ ॥6॥

വിരാഡ്ര്രൂപം യത്തേ സകലനിഗമാഗോചരമഭൂ-
ത്തദേവേദം രൂപം ഭവതി കിമിദം ഭിന്നമഥവാ । 
ന ജാനേ ദേവേശ ത്രിനയന സുരാരാധ്യചരണ 
ത്വമോങ്കാരോ വേദസ്ത്വമസി ഹി നമോഽഘോര ശിവ തേ ॥7॥

യദന്തസ്തത്വജ്ഞാ മുനിവരഗണാ രൂപമനഘം 
തവേദം സഞ്ചിന്ത്യ സ്വമനസി സദാസന്നവിഹതാഃ । 
യയുർദിവ്യാനന്ദം തദിദമഥവാ കിം തു ന തഥാ 
കിമേതജ്ജാനേഽഹം ശരണദ നമഃ ശർവ ശിവ തേ ॥8॥

തഥാ ശക്ത്യാ സൃഷ്ട്വാ ജഗദഥ ച സംരക്ഷ്യ ബഹുധാ 
തതഃ സംഹൄത്യൈതന്നിവസതി തദാധാരമഥവാ । 
ഇദം തേ കിം രൂപം നിരുപമ ന ജാനേ ഹര വിഭോ 
വിസർഗഃ കോ വാ തേ തമപി ഹി നമോ ഭവ്യ ശിവ തേ ॥9॥

തവാനന്താന്യാഹുഃ ശുചിപരമരൂപാണി നിഗമാ-
സ്തദന്തർഭൂതം സത്സദസദനിരുക്തം പദമപി । 
നിരുക്തം ഛന്ദോഭിർനിലയനമിദം വാനിലയനം 
ന വിജ്ഞാതം ജ്ഞാതം സകൃദപി നമോ ജ്യേഷ്ഠ ശിവ തേ ॥10॥

തവാഭൂത്സത്യം ചാനൃതമപി ച സത്യം കൃതമഭൂദൃതം 
സത്യം സത്യം തദപി ച യഥാ രൂപമഖിലം । 
യതഃ സത്യം സത്യം ശമമപി സമസ്തം തവ വിഭോ 
കൃതം സത്യം സത്യാനൃതമപി നമോ രുദ്ര ശിവ തേ ॥11॥

തവാമേയം മേയം യദപി തദമേയം വിരചിതം 
ന വാമേയം മേയം രചിതമപി മേയം വിരചിതും । 
ന മേയം മേയം തേ ന ഖലു പരമേയം പരമയം 
ന മേയം ന നാമേയം വരമപി നമോ ദേവ ശിവ തേ ॥12॥

തവാഹാരം ഹാരം വിദിതമവിഹാരം വിരഹസം 
നവാഹാരം ഹാരം ഹര ഹരസി ഹാരം ന ഹരസി । 
ന വാഹാരം ഹാരം പരതരവിഹാരം പരതരം 
പരം പാരം ജാനേ നഹി ഖലു നമോ വിശ്വശിവ തേ ॥13॥

യദേതത്തത്ത്വം തേ സകലമപി തത്ത്വേന വിദിതം
ന തേ തത്ത്വം തത്ത്വം വിദിതമപി തത്ത്വേന വിദിതം । 
ന ചൈതത്തത്ത്വം ചേന്നിയതമപി  തത്ത്വം കിമു ഭവേ 
ന തേ തത്ത്വം തത്ത്വം തദപി ച നമോ വേദ്യ ശിവ തേ ॥14॥

ഇദം രൂപം രൂപം സദസദമലം രൂപമപി ചേ-
ന്ന ജാനേ രൂപം തേ തരതമവിഭിന്നം പരതരം । 
യതോ നാന്യദ്രൂപം നിയതമപി വേദൈർനിഗദിതം 
ന ജാനേ സർവാത്മൻ ക്വചിദപി നമോഽനന്ത ശിവ തേ ॥15॥

ംഅഹദ്ഭൂതം ഭൂതം യദപി ന ച ഭൂതം തവ വിഭോ 
സദാ ഭൂതം ഭൂതം കിമു ന ഭവതോ ഭൂതവിഷയേ । 
യദാഭൂതം ഭൂതം ഭവതി ഹി ന ഭവ്യം ഭഗവതോ 
ഭവാഭൂതം ഭാവ്യം ഭവതി ന നമോ ജ്യേഷ്ഠ ശിവ തേ ॥16॥

വശീഭൂതാ ഭൂതാ സതതമപി ഭൂതാത്മകതയാ 
ന തേ ഭൂതാ ഭൂതാസ്തവ യദപി ഭൂതാ വിഭുതയാ । 
യതോ ഭൂതാ ഭൂതാസ്തവ തു ന ഹി ഭൂതാത്മകതയാ 
ന വാ ഭൂതാ ഭൂതാഃ ക്വചിദപി നമോ ഭൂത ശിവ തേ ॥17॥

ന തേ മായാമായാ സതതമപി മായാമയതയാ 
ധ്രുവം മായാമായാ ത്വയി വര ന മായാമയമപി । 
യദാ മായാമായാ ത്വയി ന ഖലു മായാമയതയാ 
ന മായാമായാ വാ പരമയ നമസ്തേ ശിവ നമഃ ॥18॥

യതന്തഃ സംവേദ്യം വിദിതമപി വേദൈർന വിദിതം 
ന വേദ്യം വേദ്യം ചേന്നിയതമപി വേദ്യം ന വിദിതം । 
തദേവേദം വേദ്യം വിദിതമപി വേദാന്തനികരൈഃ 
കരാവേദ്യം വേദ്യം ജിതമിതി നമോഽതർക്യ ശിവ തേ ॥19॥

ശിവം സേവ്യം ഭാവം ശിവമതിശിവാകാരമശിവം 
ന സത്യം ശൈവം തച്ഛിവമിതി ശിവം സേവ്യമനിശം । 
ശിവം ശാന്തം മത്വാ ശിവപരമതത്ത്വം ശിവമയം 
ന ജാനേ രൂപത്വം ശിവമിതി നമോ വേദ്യ ശിവ തേ ॥20॥

യദജ്ഞാത്വാ തത്ത്വം സകലമപി സംസാരപതിതം 
ജഗജ്ജന്മാവൃത്തിം ദഹതി സതതം ദുഃഖനിലയം । 
യദേതജ്ജ്ഞാത്വൈവാവഹതി ച നിവൃത്തിം പരതരാം 
ന ജാനേ തത്തത്ത്വം പരമിതി നമോ വേദ്യ ശിവ തേ ॥21॥

ന വേദം യദ്രൂപം നിഗമവിഷയം മംഗളകരം 
ന ദൃഷ്ടം കേനാപി ധ്രുവമിതി വിജാനേ ശിവ വിഭോ । 
തതശ്ചിത്തേ ശംഭോ നഹി മമ വിഷാദോഽഘവികൄത്തിഃ 
പ്രയത്നല്ലബ്ധേഽസ്മിന്ന കിമപി നമഃ പൂർണ ശിവ തേ ॥22॥

തവാകർണ്യാഗൂഢം യദപി പരതത്ത്വം ശ്രുതിപരം 
തദേവാതീതം സന്നയനപദവീം നാത്ര തനുതേ । 
കദാചിത്കിഞ്ചിദ്വാ സ്ഫുരതി കതിധാ ചേതസി തവ 
സ്ഫുരദ്രൂപം ഭവ്യം ഭവഹര പരാവേദ്യ ശിവ തേ ॥23॥

ത്വമിന്ദുർഭാനുസ്ത്വം ഹുതഭുഗസി വായുശ്ച സലിലം 
ത്വമേവാകാശോഽസി ക്ഷിതിരസി തഥാഽഽത്മാഽസി ഭഗവൻ । 
തതഃ സർവാകാരസ്ത്വമസി ഭവതോ ഭിന്നമനഘാന്ന 
തത്സത്യം സത്യം ത്രിനയന നമോഽനന്ത ശിവ തേ ॥24॥

വിധും ധത്സേ നിത്യം ശിരസി മൃദുകണ്ഠോഽപി ഗരളം 
നവം നാഗാഹാരം ഭസിതമമലം ഭാസുരതനും । 
കരേ ശൂലം ഭാലേ ജ്വലനമനിശം തത്കിമിതി തേ 
ന തത്ത്വം ജാനേഽഹം ഭവഹര നമഃ കുർപ ശിവ തേ ॥25॥

തവാപാംഗഃ ശുദ്ധോ യദി ഭവതി ഭവ്യേ ശുഭകരഃ 
കദാചിത്ത്കസ്മിംശ്ചില്ലധുതരനരേ വിപ്രഭവതി । 
സ ഏവൈതാല്ലോകാൻ രചയിതുമലം സാപി ച മഹാൻ-
കൃപാധാരോഽയം സുകയതി നമോഽനന്ത ശിവ തേ ॥26॥

ഭവന്തം ദേവേശം ശിവമിതരഗീർവാണസദൃശം 
പ്രമാദാദ്യഃ കശ്ചിദ്യദി യദപി ചിത്തേഽപി മനുതേ । 
സ ദുഃഖം ലബ്ധ്വാഽന്തേ നരകമപി യാതി ധ്രുവമിദം 
ധ്രുവം ദേവാരാധ്യാമിതഗുണ നമോഽനന്ത ശിവ തേ ॥27॥

പ്രദോഷേ രത്നാഢ്യേ  മൃദുലതരസിംഹാസനവരേ 
ഭവാനീമാരൂഢാമസകൃദപി സംവീക്ഷ്യ ഭവതാ । 
കൃതം സമ്യങ്നാഠ്യം പ്രഥിതമിതി വേദോഽപി ഭവതി 
പ്രഭാവഃ കോ വാഽയം തവ ഹര നമോ ദീപ ശിവ തേ ॥28॥

ശ്മശാനേ സഞ്ചാരഃ കിമു ശിവ ന തേ ക്വാപി ഗമനം
യതോ വിശ്വം വ്യാപ്യാഖിലമപി സദാ തിഷ്ഠതി ഭവാൻ । 
വിഭും നിത്യം ശുദ്ധം ശിവമുപഹതം വ്യാപകമിതി 
ശ്രുതിഃ സാക്ഷാദ്വക്തി ത്വയമപി നമഃ ശുദ്ധ ശിവ തേ ॥29॥

ധനുർമേരുഃ ശേഷോ ധനുവരഗുണോ യാനമവനി-
സ്തവൈവേദം ചക്രം നിഗമനികരാ വാജിനികരാഃ । 
പുരോലക്ഷ്യം യന്താ വിധിരിപുഹരിശ്ചേതി നിഗമഃ 
കിമേവം ത്വന്വേഷ്യോ നിഗദതി നമഃ പൂർണ ശിവ തേ ॥30॥

മൃദുഃ സത്ത്വം ത്വേതദ്ഭവമനഘയുക്തം ച രജസാ 
തമോയുക്തം ശുദ്ധം ഹരമപി ശിവം നിഷ്കളമിതി । 
വദത്യേകോ വേദസ്ത്വമസി തദുപാസ്യം ധ്രുവമിദം 
ത്വമോങ്കരാകാരോ ധ്രുവമിതി നമോഽനന്ത ശിവ തേ ॥31॥

ജഗത്സുപ്തിം ബോധം വ്രജതി ഭവതോ നിർഗതമപി 
പ്രവൃത്തിം വ്യാപരം പുനരപി സുഷുപ്തിം ച സകലം । 
ത്വദന്യം ത്വത്പ്രേക്ഷ്യം വ്രജതി ശരണം നേതി നിഗമോ 
വദത്യദ്ധാ സർവഃ ശിവ ഇതി നമഃ സ്തുത്യ ശിവ തേ ॥32॥

ത്വമേവാലോകാനാമധിപതിരുമാനാഥ ജഗതാം ശരണ്യഃ 
പ്രാപ്യസ്ത്വം ജലനിധിരിവാനന്തപയസാം । 
ത്വദന്യോ നിർവാണം തട ഇതി ച നിർവാണയതിരപ്യതഃ 
സർവോത്കൃഷ്ടസ്ത്വമസി ഹി നമോ നിത്യ ശിവ തേ ॥33॥

തവൈവാംശോ ഭാനുസ്തപതി വിധുരപ്യേതി പവനഃ 
പവത്യേഷോഽഗ്നിശ്ച ജ്വലതി സലിലം ച പ്രവഹതി ।
തവാജ്ഞാകാരിത്വം സകലസുരവർഗസ്യ സതതം 
ത്വമേക: സ്വാതന്ത്ര്യം വഹസി ഹി നമോഽനന്ത ശിവ തേ ॥34॥

സ്വതന്ത്രോഽയം സോമഃ സകലഭുവനൈകപ്രഭുരയം 
നിയന്താ ദേവാനാമപി ഹര നിയന്താസി ന പരഃ ।
ശിവഃ ശുദ്ധാ മായാരഹിത ഇതി വേദോഽപി വദതി 
സ്വയം താമാശാസ്യ ത്രയഹര നമോഽനന്ത ശിവ തേ ॥35॥

നമോ രുദ്രാനന്താമരവര നമഃ ശങ്കര വിഭോ 
നമോ ഗൗരീനാഥ ത്രിനയന ശരണ്യാംഘ്രികമല । 
നമഃ ശർവഃ ശ്രീമന്നനഘ മഹദൈശ്വര്യനിലയ 
സ്മരാരേ പാപാരേ ജയ ജയ നമഃ സേവ്യ ശിവ തേ ॥ 36॥

മഹാദേവാമേയാനഘഗുണഗണപ്രാമവസത-
ന്നമോ ഭൂയോ ഭൂയഃ പുനരപി നമസ്തേ പുനരപി । 
പുരാരാതേ ശംഭോ പുനരപി നമസ്തേ ശിവ വിഭോ 
നമോ ഭൂയോ ഭൂയഃ ശിവ ശിവ നമോഽനന്ത ശിവ തേ ॥37॥

കദാചിദ്ഗണ്യന്തേ നിബിഡനിയതവൃഷ്ടികണികാഃ 
കദാചിത്തത്ക്ഷേത്രാണ്യപി സികതലേശം കുശലിനാ । 
അനന്തൈരാകല്പം ശിവ ഗുണഗണശ്ചാരുരസനൈ-
ര്ന ശക്യം തേ നൂനം ഗണയിതുമുഷിത്വാഽപി സതതം ॥38॥

മയാ വിജ്ഞായൈഷാഽനിശമപി കൃതാ ജേതുമനസാ 
സകാമേനാമേയാ സതതമപരാധാ ബഹുവിധാഃ । 
ത്വയൈതേ ക്ഷന്തവ്യാഃ ക്വചിദപി ശരീരേണ വചസാ 
കൃതൈർനൈതൈർനൂനം ശിവ ശിവ കൃപാസാഗര വിഭോ ॥39॥

പ്രമാദാദ്യേ കേചിദ്വിതതമപരാധാ വിധിഹതാഃ 
കൃതാഃ സർവേ തേഽപി പ്രശമമുപയാന്തു സ്ഫുടതരം । 
ശിവഃ ശ്രീമച്ഛംഭോ ശിവശിവ മഹേശേതി ച ജപൻ 
ക്വചില്ലിംഗാകാരേ ശിവ ഹര വസാമി സ്ഥിരതരം ॥40॥

ഇതി സ്തുത്വാ ശിവം വിഷ്ണുഃ പ്രണമ്യ ച മുഹുർമുഹുഃ । 
നിർവിണ്ണോ ന്യവസന്നൂനം കൃതാഞ്ജലിപുടഃ സ്ഥിരം ॥41॥

തദാ ശിവഃ ശിവം രൂപമാദായോവാച സർവഗഃ ।
ഭീഷയന്നഖിലാൻഭൂതാൻ ഘനഗംഭീരയാ ഗിരാ ॥42॥

മദീയം രൂപമമലം കഥം ജ്ഞേയം ഭവാദൃശൈഃ । 
യത്തു വേദൈരവിജ്ഞാതമിത്യുക്ത്വാഽന്തർദധേ ശിവഃ ॥43॥

തതഃ പുനർവിധിസ്തത്ര തപസ്തപ്തും സമാരഭത് । 
വിഷ്ണുശ്ച ശിവതത്ത്വസ്യ ജ്ഞാനാർഥമതിയത്നതഃ ॥44॥

താദൃശീ ശിവ മേ വാച്ഛാ പൂജായിത്വാ വദാമ്യഹം ।
നാന്യോ മയാഽർച്യോ ദേവേഷു വിനാ ശംഭും സനാതനം ॥ 45॥

ത്വയാപി ശാങ്കരം ലിംഗം പൂജനീയം പ്രയത്നതഃ ।
വിഹായൈവാന്യദേവാനാം പൂജനം ശേഷ സർവദാ ॥46॥

ഇതി ശ്രീസ്കന്ദപുരാണേ വിഷ്ണുവിരചിതം ശിവമഹിമസ്തോത്രം സമ്പൂർണം ॥