Himalaya Krutam Shiva Stotram

ഹിമാലയ കൃതം ശിവ സ്തോത്രം

ഹിമാലയ ഉവാച ॥

ത്വം ബ്രഹ്മാ സൃഷ്ടികർതാ ച ത്വം വിഷ്ണുഃ പരിപാലകഃ ।
ത്വം ശിവഃ ശിവദോഽനന്തഃ സർവസംഹാരകാരകഃ ॥1॥

ത്വമീശ്വരോ ഗുണാതീതോ ജ്യോതീരൂപഃ സനാതനഃ
പ്രകൃതഃ പ്രകൃതീശശ്ച പ്രാകൃതഃ പ്രകൃതേഃ പരഃ ॥2॥

നാനാരൂപവിധാതാ ത്വം ഭക്താനാം ധ്യാനഹേതവേ ।
യേഷു രൂപേപു യത്പ്രീതിസ്തത്തദ്രൂപം ബിഭർഷി ച ॥3॥

സൂര്യസ്ത്വം സൃഷ്ടിജനക ആധാരഃ സർവതേജസാം ।
സോമസ്ത്വം സസ്യപാതാ ച സതതം ശീതരശ്മിനാ ॥4॥

വായുസ്ത്വം വരുണസ്ത്വം ച ത്വമഗ്നിഃ സർവദാഹകഃ ।
ഇന്ദ്രസ്ത്വം ദേവരാജശ്ച കാലോ മൃത്യുര്യമസ്തഥാ ॥ 5॥

മൃത്യുഞ്ജയോ മൃത്യുമൃത്യുഃ കാലകാലോ യമാന്തകഃ ।
വേദസ്ത്വം വേദകർതാ ച വേദവേദാംഗപാരഗഃ ॥ 6॥

വിദുഷാം ജനകസ്ത്വം ച വിദ്വാംശ്ച വിദുഷാം ഗുരുഃ    ।
മന്ത്രസ്ത്വം ഹി ജപസ്ത്വം ഹി തപസ്ത്വം തത്ഫലപ്രദഃ ॥ 7॥

വാക് ത്വം രാഗാധിദേവീ ത്വം തത്കർതാ തദ്ഗുരുഃ  സ്വയം ।
അഹോ സരസ്വതീബീജം കസ്ത്വാം സ്തോതുമിഹേശ്വരഃ ॥ 8॥

ഇത്യേവമുക്ത്വാശൈലേന്ദ്രസ്തസ്ഥൗ ധൃത്വാ പദാംബുജം ।
തത്രോവാസ തമാബോധ്യ ചാവരുഹ്യ വൃഷാച്ഛിവഃ ॥ 9॥

സ്തോത്രമേതന്മഹാപുണ്യം ത്രിസന്ധ്യം യഃ പഠേന്നരഃ ।
മുച്യതേ സർവപാപേഭ്യോ ഭയേഭ്യശ്ച ഭവാർണവേ ॥ 10॥

അപുത്രോ ലഭതേ പുത്രം മാസമേകം പഠേദ്യദി ।
ഭാര്യാഹീനോ ലഭേദ്ഭാര്യാം സുശീലാം സുമനോഹരാം ॥ 11॥

ചിരകാലഗതം വസ്തു ലഭതേ സഹസാ ധ്രുവം ।
രാജ്യഭ്രഷ്ടോ ലഭേദ്രാജ്യം ശങ്കരസ്യ പ്രസാദതഃ ॥ 12॥

കാരാഗാരേ ശ്മശാനേ ച ശത്രുഗ്രസ്തേഽതിസങ്കടേ ।
ഗഭീരേഽതിജലാകീർണേ ഭഗ്നപോതേ വിഷാദനേ ॥ 13॥

രണമധ്യേ മഹാഭീതേ ഹിംസ്രജന്തുസമന്വിതേ ।
സർവതോ മുച്യതേ സ്തുത്വാ ശങ്കരസ്യ പ്രസാദതഃ ॥ 14॥

ഇതി ശ്രീബ്രഹ്മവൈവർതേ മഹാപുരാണേ ശ്രീകൃഷ്ണജന്മഖണ്ഡേ ഹിമാലയകൃതം ശിവസ്തോത്രം സമ്പൂർണം ॥