Vedasara Shivastava Stotram 
(Shankaracharya Virachito)

ശിവായ നമഃ || 

വേദസാര ശിവസ്തവ സ്തോത്രം |
(ഛംകരാചാര്യവിരചിതോ)

പശൂനാം പതിം പാപനാശം പരേശം ഗജേന്ദ്രസ്യ കൃത്തിം വസാനം വരേണ്യം | 
ജടാജൂടമധ്യേ സ്ഫുരദ്ഗാങ്ഗവാരിം മഹാദേവമേകം സ്മരാമി സ്മരാരിം ||൧|| 

മഹേശം സുരേശം സുരാരാതിനാശം വിഭും വിശ്വനാഥം വിഭൂത്യങ്ഗഭൂഷം | 
വിരൂപാക്ഷമിന്ദ്വര്ക്കവഹ്നിം ത്രിനേത്രം സദാനന്ദമീഡേ പ്രഭും പഞ്ചവക്ത്രം ||൨|| 

ഗിരീശം ഗണേശം ഗലേ നീലവര്ണം ഗവേന്ദ്രാധിരൂഢം ഗുണാതീതരൂപം | 
ഭവം ഭാസ്വരം ഭസ്മനാ ഭൂഷിതാങ്ഗം ഭവാനീകളത്രം ഭജേ പഞ്ചവക്ത്രം ||൩||

ശിവാകാന്ത ശംഭോ ശശാങ്കാര്ധമൗലേ മഹേശാന ശൂലിന് ജടാജൂടധാരിന് | 
ത്വമേകോ ജഗദ്വ്യാപകോ വിശ്വരൂപ പ്രസീദ പ്രസീദ പ്രഭോ പൂര്ണരൂപ ||൪|| 

പരാത്മാനമേകം ജഗദ്ബീജമാദ്യം നിരീഹം നിരാകാരമോങ്കാരവേദ്യം | 
യതോ ജായതേ പാല്യതേ യേന വിശ്വം തമീശം ഭജേ ലീയതേ യത്ര വിശ്വം ||൫|| 

ന ഭൂമിര്ന ചാപോ ന വഹ്നിര്ന വായുര്ന ചാകാശമാസ്തേ ന തന്ദ്രാ ന നിദ്രാ | 
ന ഗ്രീഷ്മോ ന ശീതം ന ദേശോ ന വേഷോ ന യസ്യാസ്തി മൂര്തിസ്ത്രിമൂര്തിം തമീഡേ ||൬|| 

അജം ശാശ്വതം കാരണം കാരണാനാം ശിവം കേവലം ഭാസകം ഭാസകാനാം | 
തുരീയം തമഃ പാരമാദ്യന്തഹീനം പ്രപദ്യേ പരം പാവനം ദ്വൈതഹീനം ||൭|| 

നമസ്തേ നമസ്തേ വിഭോ വിശ്വമൂര്തേ നമസ്തേ നമസ്തേ ചിദാനന്ദമൂര്തേ !  
നമസ്തേ നമസ്തേ തപോയോഗഗമ്യ നമസ്തേ നമസ്തേ ശ്രുതിജ്ഞാനഗമ്യ ||൮|| 

പ്രഭോ ശൂലപാണേ വിഭോ വിശ്വനാഥ മഹാദേവ ശംഭോ മഹേശ ത്രിനേത്ര | 
ശിവാകാന്ത ശാന്ത സ്മരാരേ പുരാരേ ത്വദന്യോ വരേണ്യോ ന മാന്യോ ന ഗണ്യഃ ||൯|| 

ശംഭോ മഹേശ കരുണാമയ ശൂലപാണേ ഗൗരീപതേ പശുപതേ പശുപാശനാശിന് | 
കാശീപതേ കരുണയാ ജഗദേതദേകസ്ത്വം ഹംസി പാസി വിദധാസി മഹേശ്വരോഽസി ||൧൦|| 

ത്വത്തോ ജഗദ്ഭവതി ദേവ ഭവ സ്മരാരേ ത്വയ്യേവ തിഷ്ഠതി ജഗന്മൃഡ വിശ്വനാഥ | 
ത്വയ്യേവ ഗച്ഛതി ലയം ജഗദേതദീശ ലിങ്ഗാത്മകം ഹര ചരാചരവിശ്വരൂപിന് ||൧൧|| 

ഇതി ശ്രീമച്ഛംകരാചാര്യവിരചിതോ വേദസാരശിവസ്തവഃ സംപൂര്ണഃ ||