Vishveshvaralahari ಸಿದ್ಧಿಬುದ್ಧಿಪತಿಂ ವನ್ದೇ ಶ್ರೀಗಣಾದೀಶ್ವರಂ ಮುದಾ | ತಸ್ಯ ಯೋ ವನ್ದನಂ ಕುರ್ಯಾತ್ ಸ ಧೀನಾಂ ಯೋಗಮಿನ್ವತಿ ||೧|| ವನ್ದೇ ಕಾಶೀಪತಿಂ ಕಾಶೀ ಜಾತಾ ಯತ್ಕೃಪಯಾ ಪುರೀ | ಪ್ರಕಾಶನಾರ್ಥಂ ಭಕ್ತಾನಾಂ ಹೋತಾರಂ ರತ್ನಧಾತಮಮ್ ||೨|| ಭಕ್ತಾವನಂ ಕರೋಮೀತಿ ಮಾ ಗರ್ವಂ ವಹ ಶಙ್ಕರ | ತೇಭ್ಯಃ ಸ್ವಪೂಜಾಗ್ರಹಣಾತ್ತವೇತತ್ಸತ್ಯಮಙ್ಗಿರಃ ||೩|| ಮುಧಾ ಲಕ್ಷ್ಮೀಂ ಕಾಮಯನ್ತೇ ಚಞ್ಚಲಾಂ ಸಕಲಾ ಜನಾಃ | ಕಾಶೀರೂಪಾಂ ಕಾಮಯೇಽಹಂ ಲಕ್ಷ್ಮೀಮನಪಗಾಮಿನೀಮ್ ||೪|| ಪ್ರಾಪ್ನುವನ್ತು ಜನಾ ಲಕ್ಷ್ಮೀಂ ಮದಾನ್ಧನೃಪಸೇವನಾತ್ | ಲಭೇ ವಿಶ್ವೇಶಸೇವಾತೋ ಗಾಮಶ್ವಂ ಪುರುಷಾನಹಮ್ ||೫|| ನ ಮತ್ಕುಟುಂಬರಕ್ಷಾರ್ಥಂ ಮಾಹೂಯಾಮಿ ಶ್ರಿಯಂ ಬುಧಾಃ | ವಿಶ್ವೇಶ್ವರಾರಾಧನಾರ್ಥಂ ಶ್ರಿಯಂ ದೇವೀಮುಪಹ್ವಯೇ ||೬|| ಆಪಾತರಮಣೀಯೇಯಂ ಶ್ರೀರ್ಮದಾನ್ಧಕರೀ ಚಲಾ | ಅಸಾರಸಂಸೃತೌ ಕಾಶೀಂ ಸಾ ಹಿ ಶ್ರೀರಮೃತಾ ಸತಾಮ್ ||೭|| ಕಾಶೀ ಗಙ್ಗಾಽನ್ನಪೂರ್ಣಾ ಚ ವಿಶ್ವೇಶಾದ್ಯಾಶ್ಚ ದೇವತಾಃ | ಅವನ್ತು ಬಾಲಮಜ್ಞಂ ಮಾಮುಶತೀರಿವ ಮಾತರಃ ||೮|| ಸದೈವ ದುಃಖಕಾರಿಣೀಂ ನ ಸಂಸೃತಿಂ ಹಿ ಕಾಮಯೇ ಶಿವಪ್ರಿಯಾಂ ಸುಖಪ್ರದಾಂ ಪರಾಂ ಪುರೀಂ ಹಿ ಕಾಮಯೇ | ಸ್ವಭಕ್ತದುಃಖಹಾರಕಂ ಮನೋರಥಪ್ರಪೂರಕಂ ಶಿವಂ ಸದಾ ಮುದಾ ಭಜೇ ಮಹೇರಣಾಯ ಚಕ್ಷಸೇ ||೯|| ಸ್ವಸೇವಕಸುತಾದೀನಾಂ ಪಾಲನಂ ಕುರ್ವತೇ ನೃಪಾಃ | ಪಾಸ್ಯೇವಾಸ್ಮಾಂಸ್ತು ವಿಶ್ವೇಶ ಗೀರ್ವಾಣಃ ಪಾಹಿ ನಃ ಸುತಾನ್ ||೧೦|| ನಿಷೇವ್ಯ ಕಾಶಿಕಾಂ ಪುರೀಂ ಸದಾಶಿವಂ ಪ್ರಪೂಜ್ಯ ವೈ ಗುರೋರ್ಮುಖಾರವಿನ್ದತಃ ಸದಾದಿರೂಪಮದ್ವಯಮ್ | ವಿಚಾರ್ಯ ರೂಪಮಾತ್ಮನೋ ನಿಷೇಧ್ಯ ನಶ್ವರಂ ಜಡಂ ಚಿದಾತ್ಮನಾ ತಮೋಭಿದಂ ಧನೇನ ಹನ್ಮಿ ವೃಶ್ಚಿಕಮ್ ||೧೧|| ಹೇ ಭಾಗೀರಥಿ ಹೇ ಕಾಶಿ ಹೇ ವಿಶ್ವೇಶ್ವರ ತೇ ಸದಾ | ಕಲಯಾಮಿ ಸ್ತವಂ ಶ್ರೇಷ್ಠಮೇಷ ರಾರನ್ತು ತೇ ಹೃದಿ ||೧೨|| ವಿಶ್ವನಾಥ ಸದಾ ಕಾಶ್ಯಾಂ ದೇಹ್ಯಸ್ಮಭ್ಯಂ ಧನಂ ಪರಮ್ | ಪುರಾ ಯುದ್ಧೇಷು ದೈತ್ಯಾನಾಂ ವಿದ್ಮಹೇ ತ್ವಾಂ ಧನಞ್ಜಯಮ್ ||೧೩|| ಅವಿನಾಶಿ ಪುರಾ ದತ್ತಂ ಭಕ್ತೇಭ್ಯೋ ದ್ರವಿಣಂ ತ್ವಯಾ | ಕಾಶಿವಿಶ್ವೇಶಗಙ್ಗೇ ತ್ವಾಮಥ ತೇ ಸ್ತುಮ್ನಮೀಮಹೇ ||೧೪|| ಸಂಸಾರದಾವವಹ್ನೌ ಮಾಂ ಪತಿತಂ ದುಃಖಿತಂ ತವ | ವಿಶ್ವೇಶ ಪಾಹಿ ಗಙ್ಗಾದ್ಯೈರಾಗತ್ಯ ವೃಷಭಿಃ ಸುತಮ್ ||೧೫|| ಕಾಶೀಂ ಪ್ರತಿ ವಯಂ ಯಾಮ ದಯಯಾ ವಿಶ್ವನಾಥ ತೇ | ತತ್ರೈವ ವಾಸಂ ಕುರ್ಯಾಮ ವೃಕ್ಷೇ ನ ವಸತಿಂ ವಯಃ ||೧೬|| ಹೇ ಸರಸ್ವತಿ ಹೇ ಗಙ್ಗೇ ಹೇ ಕಾಲಿನ್ದಿ ಸದಾ ವಯಮ್ | ಭಜಾಮಾಮೃತರೂಪಂ ತಂ ಯೋ ವಃ ಶಿವತಮೋ ರಸಃ ||೧೭|| ವಿಶ್ವನಾಥೇದಮೇವ ತ್ವಾಂ ಯಾಚಾಮ ಸತತಂ ವಯಮ್ | ಸ್ಥಿತ್ವಾ ಕಾಶ್ಯಾಮಧ್ವರೇ ತ್ವಾಂ ಹವಿಷ್ಮನ್ತೋ ಜರಾಮಹೇ ||೧೮|| ಸರ್ವಾಸು ಸೋಮಸಂಸ್ಥಾಸು ಕಾಶ್ಯಾಮಿನ್ದ್ರಸ್ವರೂಪಿಣೇ | ಹೇ ವಿಶ್ವೇಶ್ವರ ತೇ ನಿತ್ಯಂ ಸೋಮಂ ಚೋದಾಮಿ ಪೀತಯೇ ||೧೯|| ಕಾಶ್ಯಾಂ ರೌದ್ರೇಷು ಚಾನ್ಯೇಷು ಯಜಾಮ ತ್ವಾಂ ಮಖೇಷು ವೈ | ಹೇ ವಿಶ್ವೇಶ್ವರ ದೇವೈಸ್ತ್ವಂ ರಾರನ್ಧಿ ಸವಮೇಷು ನಃ || ೨೦|| ಮಾಂ ಮೋಹಾದ್ಯಾ ದುರ್ಜನಾಶ್ಚ ಬಾಧನ್ತೇ ನಿಷ್ಪ್ರಯೋಜನಮ್ | ವಿಶ್ವೇಶ್ವರ ತತೋ ಮೇ ತ್ವಾಂ ವರುತ್ರೀಂ ಧಿಷಣಾಂ ವಹ ||೨೧|| ರುದ್ರಾಕ್ಷಭಸ್ಮಧಾರೀ ತ್ವಾಂ ಕಾಶ್ಯಾಂ ಸ್ತೌಮೀಶ ಸಂಸ್ತವೈಃ | ತ್ವತ್ಪಾದಾಂಬುಜಭೃಙ್ಗಂ ಮಾಂ ನ ಸ್ತೋತಾರಂ ನಿದೇಕರಃ ||೨೨|| ವಿಹಾಯ ಚಞ್ಚಲಂ ವಧೂಸುತಾದಿಕಂ ಹಿ ದುಃಖದಂ ತ್ವದೀಯಕಾಮಸಂಯುತಾ ಭವೇಮ ಕಾಶಿಕಾಪುರೀ | ಸ್ವಸೇವಕಾರ್ತಿನಾಶಕ ಪ್ರಕೃಷ್ಟಸಂವಿದರ್ಪಕ ಭವೈವ ದೇವ ಸನ್ತತಂ ಹ್ಯುತತ್ವಮಸ್ಮಯುರ್ವಸೋ ||೨೩|| ವಿಶ್ವೇಶ ಕಾಶ್ಯಾಂ ಗಙ್ಗಾಯಾಂ ಸ್ನಾತ್ವಾ ತ್ವಾಂ ರಮ್ಯವಸ್ತುಭಿಃ | ಪೂಜಯಾಮ ವಯಂ ಭಕ್ತ್ಯಾ ಕುಶಿಕಾಸೋ ಅವಸ್ಯವಃ ||೨೪|| ವಿಶ್ವೇಶ ನಿತ್ಯಮಸ್ಮಭ್ಯಂ ಭಯಮುತ್ಪಾದಯನ್ತಿ ಯೇ | ತೇಷಾಂ ವಿಧಾಯೋಪಮರ್ದಂ ತತೋ ನೋ ಅಭಯಂ ಕೃಧಿ ||೨೫|| ರಾಕ್ಷಸಾನಾಂ ಸ್ವಭಾವೋಽಯಂ ಬಾಧ್ಯಾ ವಿಶ್ವೇಶ ಜೀವಕಾಃ | ಭಕ್ತಾನುಕಂಪಯಾ ಶಂಭೋ ಸರ್ವಂ ರಕ್ಷೋ ನಿಬರ್ಹಯ ||೨೬|| ವಿಶ್ವೇಶ್ವರ ಸದಾ ಭೀತಃ ಸಂಸಾರರ್ಣವಜ್ಜನಾತ್ | ಮಾಂ ಪಾಲಯ ಸದೇತಿ ತ್ವಾಂ ಪುರುಹೂತಮುಪಬ್ರುವೇ ||೨೭|| ಇದಂ ವಿಮೃಶ್ಯನಶ್ವರಂ ಜಡಂ ಸದೈವ ದುಃಖದಂ ಸಮರ್ಚಿತುಂ ಶಿವಂ ಗತಾಃ ಪರಾಃ ಪುರೀಂ ಯತೋ ದ್ವಿಜಾಃ | ತತೋಽಭಿಗಮ್ಯ ತಾಂ ಪುರೀಂ ಸಮರ್ಚ್ಯ ವಸ್ತುಭಿಃ ಪರೈಃ ಶಿವಂ ಸ್ವಭಕ್ತಮುಕ್ತಿದಂ ತಮಿಲ್ಯಖಿತ್ವ ಈಮಹೇ ||೨೮|| ಕಾಶ್ಯಾಂ ವಯಂ ಸದೈವ ತ್ವಾಂ ಯಜಾಮ ಸಕಲೈರ್ಮಖೈಃ | ವಿಶ್ವೇಶ್ವರ ತ್ವಂ ಸಮಗ್ರೈರ್ದೇವೈರಾಸತ್ಸಿ ಬರ್ಹಿಷಿ ||೨೯|| ಯಕ್ಷೇಶ್ವರೇಣ ರಕ್ಷಿತಂ ಶ್ರೇಷ್ಠಂ ಧನಮಖೇಷು ತೇ | ದೇಹಿ ವ್ಯಯಾಯ ಶಙ್ಕರ ಹ್ಯಸ್ಮಭ್ಯಮಪ್ರತಿಷ್ಕೃತಃ ||೩೦|| ಮತ್ಪೂರ್ವಜಾ ಮಹಾಶೈವಾ ಭಸ್ಮರುದ್ರಾಕ್ಷಧಾರಿಣಃ | ವಿಶ್ವೇಶ್ವರ ಸುರೇಷು ತ್ವಾಮದ್ವಶಮಿವ ಯೇಮಿರೇ ||೩೧|| ಶಂಭೋರ್ವಿಧಾಯ ಯೇಽರ್ಚನಂ ತಿಷ್ಠನ್ತಿ ತತ್ಪರಾ ಯದಾ | ತಾನ್ ಶಙ್ಕರೋ ಗಿರೇ ದ್ರುತಂ ಯೂಥೇನ ವೃಷ್ಣಿರೇಜತಿ ||೩೨|| ತ್ವಾಂ ಪೂಜಯಾಮೀಶ ಸುರಂ ಮಾನಸೈರ್ದಿವ್ಯವಸ್ತುಭಿಃ | ಹೇ ವಿಶ್ವೇಶ್ವರ ದೇವೈಸ್ತ್ವಂ ಸೋಮ ರಾರನ್ಧಿ ನೋ ಹೃದಿ ||೩೩|| ಪ್ರಾದುರ್ಭವಸಿ ಸದ್ಯಸ್ತ್ವಂ ಕ್ಲೇಶೋ ಭಕ್ತಜನೇ ಯದಾ | ತತೋಽಹಂ ಕ್ಲೇಶವಾನ್ ಕುರ್ವೇ ಸದ್ಯೋಜಾತಾಯ ವೈ ನಮಃ ||೩೪|| ವಾಮದೇವೇತಿ ಮನೂ ರಮ್ಯತಾಂ ಯಸ್ಯ ಸಞ್ಜಗೌ | ಈಶಸ್ತಸ್ಮಾತ್ಕಿಯತೇ ವಾಮದೇವಾಯ ತೇ ನಮಃ ||೩೫|| ದಯಾಸಿನ್ಧೋ ದೀನಬನ್ಧೋ ಯೋಽಸ್ತೀಶ ವರದಃ ಕರಃ | ಅಸ್ಮಾಕಂ ವರದಾನೇನ ಸ ಯುಕ್ತಸ್ತೇಽಸ್ತು ದಕ್ಷಿಣಃ ||೩೬|| ದುಷ್ಟಭೀತಸ್ಯ ಮೇ ನಿತ್ಯಂ ಕರಸ್ತೇಽಭಯದಾಯಕಃ | ಮಹೇಶಾಭಯದಾನೇ ಸ್ಯಾದುತ ಸವ್ಯಃ ಶತಕ್ರತೋ ||೩೭|| ಮಹೇಶ್ವರೀಯಪದಪದ್ಮಸೇವಕಃ ಪುರನ್ದರಾದಿಪದನಿಃಸ್ಪೃಹಃ ಸದಾ | ಜನೋಽಸ್ತಿ ಯಃ ಸತತದುರ್ಗತಃ ಪ್ರಭೋ ಪೃಣಕ್ಷಿ ವಸುನಾ ಭವೀಯಸಾ ||೩೮|| ರಕ್ಷಣಾಯ ನಾಸ್ತಿ ಮೇ ತ್ವಾಂ ವಿನೇಶ ಸಾಧನಮ್ | ನಿಶ್ಚಯೇನ ಹೇ ಶಿವ ತ್ವಾಮವಸ್ಯುರಾಚಕೇ ||೩೯|| ರೋಗೈರ್ದುಃಖೈರ್ವೈರಿಗಣೈಶ್ಚ ಯುಕ್ತಾಸ್ತ್ವದ್ದಾಸತ್ವಾಚ್ಛಙ್ಕರ ತತ್ಸಹಸ್ವ | ರಮ್ಯಂ ಸ್ತೋತ್ರಂ ರೋಷಕರಂ ವಚೋ ವಾ ಯತ್ಕಿಞ್ಚಾಹಂ ತ್ವಾಯುರಿದಂ ವದಾಮಿ ||೪೦|| ಧ್ಯಾಯಾಮ ವಸ್ತು ಶಙ್ಕರಂ ಯಾಚಾಮ ಧಾಮ ಶಙ್ಕರಮ್ | ಕುರ್ಯಾಮ ಕರ್ಮ ಶಙ್ಕರಂ ವೋಚೇಮ ಶನ್ತಮಂ ಹೃದೇ ||೪೧|| ಮಾತಾ ತಾತಃ ಸ್ವಾದಿಷ್ಠಂ ಚ ಪೌಷ್ಟಿಕಂ ಮನ್ವಾತೇ ವಾಕ್ಯಂ ಬಾಲಸ್ಯ ಕುತ್ಸಿತಮ್ | ಯದ್ವತ್ತದ್ವಾಕ್ಯಂ ಮೇಽಸ್ತು ಶಂಭವೇ ಸ್ವಾದೋಃ ಸ್ವಾದೀಯೋ ರುದ್ರಾಯ ಬನ್ಧನಮ್ ||೪೨|| ಶಿವಂ ಸುಗನ್ಧಿಸಂಯುತಂ ಸ್ವಭಕ್ತಪುಷ್ಟಿವರ್ಧನಮ್ | ಸುದೀನಭಕ್ತಪಾಲಕಂ ತ್ರಿಯಮ್ಬಕಂ ಯಜಾಮಹೇ ||೪೩|| ದೇವ ದೇವ ಗಿರಿಜಾವಲ್ಲಭ ತ್ವಂ ಪಾಹಿ ಪಾಹಿ ಶಿವ ಶಂಭೋ ಮಹೇಶ | ಯದ್ವದಾಮಿ ಸತತಂ ಸ್ತೋತ್ರವಾಕ್ಯಂ ತಜ್ಜುಷಸ್ವ ಕೃಧಿ ಮಾ ದೇವವನ್ತಮ್ ||೪೪|| ತ್ಯಕ್ತ್ವಾ ಸದಾ ನಿಷ್ಫಲಕಾರ್ಯಭಾರಂ ಧೄತ್ವಾ ಸದಾ ಶಙ್ಕರನಾಮಸಾರಮ್ | ಹೇ ಜೀವ ಜನ್ಮಾನ್ತಕನಾಶಕಾರಂ ಯಕ್ಷ್ಯಾಮಹೇ ಸೌಮನಸಾಯ ರುದ್ರಮ್ ||೪೫|| ಸ್ಥಿತ್ವಾ ಕಾಶ್ಯಾಂ ನಿರ್ಮಲಗಙ್ಗಾತೋಯೇ ಸ್ನಾತ್ವಾ ಸಂಪೂಜ್ಯ ತ್ರಿದಶೇಶ್ವರಂ ವೈ | ತಸ್ಯ ಸ್ತೋತ್ರಂ ಪಾಪಹರೈಸ್ತು ದೇವ ಭದ್ರಂ ಕರ್ಣೇಭಿಃ ಶೃಣುಯಾಮ ದೇವಾಃ ||೪೬|| ವಾರಾಣಸ್ಯಾಂ ಶಙ್ಕರಂ ಸುರಾಢ್ಯಂ ಸಂಪೂಜ್ಯೇಶಂ ವಸುಭಿಃ ಸುಕಾನ್ತೈಃ | ಅಗ್ರೇ ನೃತ್ಯನ್ತಃ ಶಿವಸ್ಯ ರೂಪಂ ಭದ್ರಂ ಪಶ್ಯೇಮಾಕ್ಷಭಿರ್ಯಜತ್ರಾಃ ||೪೭|| ಇಚ್ಛಾಮಸ್ತ್ವಾಂ ಪೂಜಯಿತುಂ ವಯಂ ವಿಶ್ವೇಶ ಸನ್ತತಮ್ || ಪ್ರಯಚ್ಛ ನೋ ಧನಂ ಶ್ರೇಷ್ಠಂ ಯಶಸಂ ವೀರವತ್ತಮಮ್ ||೪೮|| ಕಾಶ್ಯಾಮುಷಿತ್ವಾ ಗಙ್ಗಾಯಾಂ ಸ್ರಾತ್ವಾ ಸಂಪೂಜ್ಯ ಶಙ್ಕರಮ್ | ಧ್ಯಾತ್ವಾ ತಚ್ಚರಣೌ ನಿತ್ಯಮಲಕ್ಷ್ಮೀರ್ನಾಶಯಾಮ್ಯಹಮ್ ||೪೯|| ಅಸತ್ಪದಂ ಸ್ವಹರ್ಷದಂ ನ ಚಾನ್ಯಹರ್ಷದಾಯಕಂ ಸದಾ ಮುದಾ ಪ್ರಸೂರ್ಯಥಾ ಶೃಣೋತಿ ಭಾಷಿತಂ ಶಿಶೋಃ | ಶಿವಾಪಗಾಶಿವಾಬಲಾಶಿವಾಲಯಾಸಮನ್ವಿತ- ಸ್ತಥಾ ಶಿವೇಶ ನಃ ಸುರೈರ್ಗಿರಮುಪಶ್ರುತಿಂ ಚರ ||೫೦|| ಸಗರಸ್ಯಾತ್ಮಜಾ ಗಙ್ಗೇ ಮತಾಃ ಸನ್ತಾರಿತಾಸ್ತ್ವಯಾ | ಅಗರಸ್ಯಾತ್ಮಜಾ ತಸ್ಮಾತ್ ಕಿಂ ನ ತಾರಯಸಿ ಧ್ರುವಮ್ ||೫೧|| ಪ್ರಾಯಿಕೋಽಯಂ ಪ್ರವಾದೋಽಸ್ತು ತರನ್ತಿ ತವ ಸನ್ನಿಧೌ | ತಾರಕಂ ನಾಮ ತೇ ಗಙ್ಗೇ ಸನ್ನಿಧೇಃ ಕಿಂ ಪ್ರಯೋಜನಮ್ |೫೨|| ಮೀನೈರಾಯತಲೋಚನೇ ವಸುಮುಖೀವಾಬ್ಜೇನ ರೋಮಾವಲೀಯುಕ್ತೋ ರಾಜವತೀವ ಪದ್ಮಮುಕುಲೈಃ ಶೈವಾಲವಲ್ಲ್ಯಾ ಯುತೈಃ | ಉದ್ಭಾಸ್ವಜ್ಜಘನೇನ ವಾಲಪುಲಿನೈರುದ್ಯದ್ಭುಜೇವೋರ್ಮಿಭಿರ್- ಗರ್ತೇನೋಜ್ಜ್ವಲನಾಭಿಕೇವ ವಿಲಸತ್ಯೇಷಾ ಪರಂ ಜಾಹ್ನವೀ ||೫೩|| ಶೃಙ್ಗಾರಿತಾಂ ಜಲಚರೈಃ ಶಿವಸುನ್ದರಾಙ್ಗ- ಸಙ್ಗಾಂ ಸದಾಪಹೃತವಿಶ್ವಧವಾನ್ತರಙ್ಗಾಮ್ ಭೃಙ್ಗಾಕುಲಾಂಬುಜಗಲನ್ಮಕರನ್ದತುನ್ದ- ಭೃಙ್ಗಾವಲೀವಿಲಸಿತಾಂ ಕಲಯೇಽಥ ಗಙ್ಗಾಮ್ ||೫೪|| ವಿಶ್ವೇಶೋಽಸಿ ಧನಾಧಿಪಪ್ರಿಯಸಖಾ ಕಿಂ ಚಾನ್ನಪೂರ್ಣಾಪತಿರ್- ಜಾಮಾತಾ ಧರಣೀಮೃತೋ ನಿರುಪಮಾಷ್ಟೈಶ್ವರ್ಯಯುಕ್ತಃ ಸ್ವಯಮ್ | ಚತ್ವಾರ್ಯೇವ ತಥಾಪಿ ದಾಸ್ಯಸಿ ಫಲಾನ್ಯಾತ್ಮಾಶ್ರಯಾನ್ತೇ ಚಿರಂ ತೇಭ್ಯೋಽತೋ ಬತ ಯುಜ್ಯತೇ ಪಶುಪತೇ ಲಬ್ಧಾವತಾರಸ್ತವ ||೫೫|| ದೋಷಾಕರಂ ವಹಸಿ ಮೂರ್ಧ್ನಿ ಕಲಙ್ಕವನ್ತಂ ಕಣ್ಠೇ ದ್ವಿಜಿಹ್ವಮತಿವಕಗತಿಂ ಸುಘೋರಮ್ | ಪಾಪೀತ್ಯಯಂ ಮಯಿ ಕುತೋ ನ ಕೃಪಾಂ ಕರೋಷಿ ಯುಕ್ತೈವ ತೇ ವಿಷಮದ್ದಷ್ಟಿರತೋ ಮಹೇಶ |೫೬|| ಅಸ್ತಿ ತ್ರಿನೇತ್ರಮುಡುರಾಜಕಲಾ ಮಮೇತಿ ಗರ್ವಾಯತೇ ಹ್ಯತಿತರಾಂ ಬತ ವಿಶ್ವನಾಥ | ತ್ವದ್ವಾಸಿನೋ ಜನನಕಾಶಿಶಶಾಙ್ಕಚೂಡಾ- ಭಾಲೇಕ್ಷಣಾಶ್ಚ ನ ಭವನ್ತಿ ಜನಾಃ ಕಿಯನ್ತಃ ||೫೭|| ಕಾಮಂ ಸನ್ತ್ಯಜ ನಶ್ವರೇಽತ್ರ ವಿಷಯೇ ವಾಮಂ ಪದಂ ಮಾ ವಿಶ ಕ್ಷೇಮಂ ಚಾತ್ಮನ ಆಚರ ತ್ವಮದಯಂ ಕಾಮಂ ಸ್ಮರಸ್ವಾನ್ತಕಮ್ | ಭೀಮಂ ದಣ್ಡಧರಸ್ಯ ಯೋತಿಹೃದಯಾರಾಮಂ ಶಿರಪ್ರೋಲ್ಲಸ- ತ್ಸೋಮಂ ಭಾವಯಾ ವಿಶ್ವನಾಥಮನಿಶಂ ಸೋಮಂ ಸಖೇ ಮಾನಸೇ ||೫೮|| ಸಂಪೂಜ್ಯ ತ್ರಿದಶವರಂ ಸದಾಶಿವಂ ಯೋ ವಿಶ್ವೇಶಸ್ತುತಿಲಹರೀಂ ಸದಾ ಪಠೇದ್ವೈ | ಕೈಲಾಸೇ ಶಿವಪದಕಞ್ಜರಾಜಹಂಸ ಆಕಲ್ಪಂ ಸ ಹಿ ನಿವಸೇಚ್ಛಿವಸ್ವರೂಪಃ ||೫೯|| ಅನೇನ ಪ್ರೀಯತಾಂ ದೇವೋ ಭಗವಾನ್ ಕಾಶಿಕಾಪತಿಃ | ಶ್ರೀವಿಶ್ವನಾಥಃ ಪೂರ್ವೇಷಾಮಸ್ಮಾಕಂ ಕುಲದೈವತಮ್ ||೬೦|| ಇಯಂ ವಿಶ್ವೇಶಲಹರೀ ರಚಿತಾ ಖಣ್ಡಯಜ್ವನಾ | ವಿಶ್ವೇಶತುಷ್ಟಿದಾ ನಿತ್ಯಂ ವಸತಾಂ ಹೃದಯೇ ಸತಾಮ್ ||೬೧|| ನಾಮ್ನಾ ಗುಣೈಶ್ಚಾಪಿ ಶಿವೈವ ಮಾತಾ ತಾತಃ ಶಿವಸ್ತ್ರಯಮ್ಬಕಯಜ್ವನಾಮಾ | ಮಲ್ಲಾರಿದೇವಃ ಕುಲದೈವತಂ ಮೇ ಶ್ರೀಕೌಶಿಕಸ್ಯಾಸ್ತಿ ಕುಲೇ ಚ ಜನ್ಮ ||೬೨|| ಇತಿ ಶ್ರೀಗಣೇಶದೀಕ್ಷಿತಾತ್ಮಜತ್ರ್ಯಮ್ಬಕದೀಕ್ಷಿತತನೂಜಖಣ್ಡರಾಜದೀಕ್ಷಿತವಿರಚಿತಾ ವಿಶ್ವೇಶ್ವರಲಹರೀ ಸಂಪೂರ್ಣಾ ||