ಮಹೇಶಾನಂತಾದ್ಯ ತ್ರಿಗುಣರಹಿತಾಮೇಯವಿಮಲ ಸ್ವರಾಕಾರಾಪಾರಾಮಿತಗುಣಗಣಾಕಾರಿನಿವೃತೇ । ನಿರಾಧಾರಾಧಾರಾಮರವರ ನಿರಾಕಾರ ಪರಮ ಪ್ರಭಾಪೂರಾಕಾರಾವರ ಪರ ನಮೋ ವೇದ್ಯ ಶಿವ ತೇ ॥1॥ ನಮೋ ವೇದಾವೇದ್ಯಾಖಿಲಜಗದುಪಾದಾನ ನಿಯತಂ ಸ್ವತಂತ್ರಾಸಾಮಾಂತಾನವಧುತಿನಿಜಾಕಾರವಿರತೇ । ನಿವರ್ತಂತೇ ವಾಚಃ ಶಿವಭಜನಮಪ್ರಾಪ್ಯ ಮನಸಾ ಯತೋಽಶಕ್ತಾಃ ಸ್ತೋತುಂ ಸಕೃದಪಿ ಗುಣಾತೀತ ಶಿವ ತೇ ॥2॥ ತ್ವದನ್ಯದ್ವಸ್ತ್ವೇಕಂ ನಹಿ ಭವ ಸಮಸ್ತತ್ರಿಭುವನೇ ವಿಭುಸ್ತ್ವಂ ವಿಶ್ವಾತ್ಮಾ ನ ಚ ಪರಮಮಸ್ತೀಶ ಭವತಃ । ಧ್ರುವಂ ಮಾಯಾತೀತಸ್ತ್ವಮಸಿ ಸತತಂ ನಾತ್ರ ವಿಷಯೋ ನ ತೇ ಕೃತ್ಯಂ ಸತ್ಯಂ ಕ್ವಚಿದಪಿ ವಿಪರ್ಯೇತಿ ಶಿವ ತೇ ॥3॥ ತ್ವಯೈವೇಮಂ ಲೋಕಂ ನಿಖಿಲಮಮಲಂ ವ್ಯಾಪ್ಯ ಸತತಂ ತಥೈವಾನ್ಯಾಂ ಲೋಕಸ್ಥಿತಿಮನಘ ದೇವೋತ್ತಮ ವಿಭೋ । ತ್ವಯೈವೈತತ್ಸೃಷ್ಟಂ ಜಗದಖಿಲಮೀಶಾನ ಭಗವ- ನ್ವಿಲಾಸೋಽಯಂ ಕಶ್ಚಿತ್ತವ ಶಿವ ನಮೋ ವೇದ್ಯ ಶಿವ ತೇ ॥4॥ ಜಗತ್ಸೃಷ್ಟೇಃ ಪೂರ್ವಂ ಯದಭವದುಮಾಕಾಂತ ಸತತಂ ತ್ವಯಾ ಲೀಲಾಮಾತ್ರಂ ತದಪಿ ಸಕಲಂ ರಕ್ಷಿತಮಭೂತ್ ॥ ತದೇವಾಗ್ರೇ ಭಾಲಪ್ರಕಟನಯನಾದ್ಭುತಕರಾ- ಜ್ಜಗದ್ದಗ್ಧ್ವಾ ಸ್ಥಾಸ್ಯಸ್ಯಜ ಹರ ನಮೋ ವೇದ್ಯ ಶಿವ ತೇ ॥5॥ ವಿಭೂತೀನಾಮಂತೋ ಭವ ನ ಭವತೋ ಭೂತಿವಿಲಸ- ನ್ನಿಜಾಕಾರ ಶ್ರೀಮನ್ನ ಗುಣಗಣಸೀಮಾಪ್ಯವಗತಾ । ಅತದ್ವ್ಯಾವೃತ್ಯಾಽದ್ಧಾ ತ್ವಯಿ ಸಕಲವೇದಾಶ್ಚ ಚಕಿತಾ ಭವಂತ್ಯೇವಾಸಾಮಪ್ರಕೃತಿಕ ನಮೋ ಧರ್ಷ ಶಿವ ತೇ ॥6॥ ವಿರಾಡ್ರ್ರೂಪಂ ಯತ್ತೇ ಸಕಲನಿಗಮಾಗೋಚರಮಭೂ- ತ್ತದೇವೇದಂ ರೂಪಂ ಭವತಿ ಕಿಮಿದಂ ಭಿನ್ನಮಥವಾ । ನ ಜಾನೇ ದೇವೇಶ ತ್ರಿನಯನ ಸುರಾರಾಧ್ಯಚರಣ ತ್ವಮೋಂಕಾರೋ ವೇದಸ್ತ್ವಮಸಿ ಹಿ ನಮೋಽಘೋರ ಶಿವ ತೇ ॥7॥ ಯದಂತಸ್ತತ್ವಜ್ಞಾ ಮುನಿವರಗಣಾ ರೂಪಮನಘಂ ತವೇದಂ ಸಂಚಿಂತ್ಯ ಸ್ವಮನಸಿ ಸದಾಸನ್ನವಿಹತಾಃ । ಯಯುರ್ದಿವ್ಯಾನಂದಂ ತದಿದಮಥವಾ ಕಿಂ ತು ನ ತಥಾ ಕಿಮೇತಜ್ಜಾನೇಽಹಂ ಶರಣದ ನಮಃ ಶರ್ವ ಶಿವ ತೇ ॥8॥ ತಥಾ ಶಕ್ತ್ಯಾ ಸೃಷ್ಟ್ವಾ ಜಗದಥ ಚ ಸಂರಕ್ಷ್ಯ ಬಹುಧಾ ತತಃ ಸಂಹೄತ್ಯೈತನ್ನಿವಸತಿ ತದಾಧಾರಮಥವಾ । ಇದಂ ತೇ ಕಿಂ ರೂಪಂ ನಿರುಪಮ ನ ಜಾನೇ ಹರ ವಿಭೋ ವಿಸರ್ಗಃ ಕೋ ವಾ ತೇ ತಮಪಿ ಹಿ ನಮೋ ಭವ್ಯ ಶಿವ ತೇ ॥9॥ ತವಾನಂತಾನ್ಯಾಹುಃ ಶುಚಿಪರಮರೂಪಾಣಿ ನಿಗಮಾ- ಸ್ತದಂತರ್ಭೂತಂ ಸತ್ಸದಸದನಿರುಕ್ತಂ ಪದಮಪಿ । ನಿರುಕ್ತಂ ಛಂದೋಭಿರ್ನಿಲಯನಮಿದಂ ವಾನಿಲಯನಂ ನ ವಿಜ್ಞಾತಂ ಜ್ಞಾತಂ ಸಕೃದಪಿ ನಮೋ ಜ್ಯೇಷ್ಠ ಶಿವ ತೇ ॥10॥ ತವಾಭೂತ್ಸತ್ಯಂ ಚಾನೃತಮಪಿ ಚ ಸತ್ಯಂ ಕೃತಮಭೂದೃತಂ ಸತ್ಯಂ ಸತ್ಯಂ ತದಪಿ ಚ ಯಥಾ ರೂಪಮಖಿಲಂ । ಯತಃ ಸತ್ಯಂ ಸತ್ಯಂ ಶಮಮಪಿ ಸಮಸ್ತಂ ತವ ವಿಭೋ ಕೃತಂ ಸತ್ಯಂ ಸತ್ಯಾನೃತಮಪಿ ನಮೋ ರುದ್ರ ಶಿವ ತೇ ॥11॥ ತವಾಮೇಯಂ ಮೇಯಂ ಯದಪಿ ತದಮೇಯಂ ವಿರಚಿತಂ ನ ವಾಮೇಯಂ ಮೇಯಂ ರಚಿತಮಪಿ ಮೇಯಂ ವಿರಚಿತುಂ । ನ ಮೇಯಂ ಮೇಯಂ ತೇ ನ ಖಲು ಪರಮೇಯಂ ಪರಮಯಂ ನ ಮೇಯಂ ನ ನಾಮೇಯಂ ವರಮಪಿ ನಮೋ ದೇವ ಶಿವ ತೇ ॥12॥ ತವಾಹಾರಂ ಹಾರಂ ವಿದಿತಮವಿಹಾರಂ ವಿರಹಸಂ ನವಾಹಾರಂ ಹಾರಂ ಹರ ಹರಸಿ ಹಾರಂ ನ ಹರಸಿ । ನ ವಾಹಾರಂ ಹಾರಂ ಪರತರವಿಹಾರಂ ಪರತರಂ ಪರಂ ಪಾರಂ ಜಾನೇ ನಹಿ ಖಲು ನಮೋ ವಿಶ್ವಶಿವ ತೇ ॥13॥ ಯದೇತತ್ತತ್ತ್ವಂ ತೇ ಸಕಲಮಪಿ ತತ್ತ್ವೇನ ವಿದಿತಂ ನ ತೇ ತತ್ತ್ವಂ ತತ್ತ್ವಂ ವಿದಿತಮಪಿ ತತ್ತ್ವೇನ ವಿದಿತಂ । ನ ಚೈತತ್ತತ್ತ್ವಂ ಚೇನ್ನಿಯತಮಪಿ ತತ್ತ್ವಂ ಕಿಮು ಭವೇ ನ ತೇ ತತ್ತ್ವಂ ತತ್ತ್ವಂ ತದಪಿ ಚ ನಮೋ ವೇದ್ಯ ಶಿವ ತೇ ॥14॥ ಇದಂ ರೂಪಂ ರೂಪಂ ಸದಸದಮಲಂ ರೂಪಮಪಿ ಚೇ- ನ್ನ ಜಾನೇ ರೂಪಂ ತೇ ತರತಮವಿಭಿನ್ನಂ ಪರತರಂ । ಯತೋ ನಾನ್ಯದ್ರೂಪಂ ನಿಯತಮಪಿ ವೇದೈರ್ನಿಗದಿತಂ ನ ಜಾನೇ ಸರ್ವಾತ್ಮನ್ ಕ್ವಚಿದಪಿ ನಮೋಽನಂತ ಶಿವ ತೇ ॥15॥ ಂಅಹದ್ಭೂತಂ ಭೂತಂ ಯದಪಿ ನ ಚ ಭೂತಂ ತವ ವಿಭೋ ಸದಾ ಭೂತಂ ಭೂತಂ ಕಿಮು ನ ಭವತೋ ಭೂತವಿಷಯೇ । ಯದಾಭೂತಂ ಭೂತಂ ಭವತಿ ಹಿ ನ ಭವ್ಯಂ ಭಗವತೋ ಭವಾಭೂತಂ ಭಾವ್ಯಂ ಭವತಿ ನ ನಮೋ ಜ್ಯೇಷ್ಠ ಶಿವ ತೇ ॥16॥ ವಶೀಭೂತಾ ಭೂತಾ ಸತತಮಪಿ ಭೂತಾತ್ಮಕತಯಾ ನ ತೇ ಭೂತಾ ಭೂತಾಸ್ತವ ಯದಪಿ ಭೂತಾ ವಿಭುತಯಾ । ಯತೋ ಭೂತಾ ಭೂತಾಸ್ತವ ತು ನ ಹಿ ಭೂತಾತ್ಮಕತಯಾ ನ ವಾ ಭೂತಾ ಭೂತಾಃ ಕ್ವಚಿದಪಿ ನಮೋ ಭೂತ ಶಿವ ತೇ ॥17॥ ನ ತೇ ಮಾಯಾಮಾಯಾ ಸತತಮಪಿ ಮಾಯಾಮಯತಯಾ ಧ್ರುವಂ ಮಾಯಾಮಾಯಾ ತ್ವಯಿ ವರ ನ ಮಾಯಾಮಯಮಪಿ । ಯದಾ ಮಾಯಾಮಾಯಾ ತ್ವಯಿ ನ ಖಲು ಮಾಯಾಮಯತಯಾ ನ ಮಾಯಾಮಾಯಾ ವಾ ಪರಮಯ ನಮಸ್ತೇ ಶಿವ ನಮಃ ॥18॥ ಯತಂತಃ ಸಂವೇದ್ಯಂ ವಿದಿತಮಪಿ ವೇದೈರ್ನ ವಿದಿತಂ ನ ವೇದ್ಯಂ ವೇದ್ಯಂ ಚೇನ್ನಿಯತಮಪಿ ವೇದ್ಯಂ ನ ವಿದಿತಂ । ತದೇವೇದಂ ವೇದ್ಯಂ ವಿದಿತಮಪಿ ವೇದಾಂತನಿಕರೈಃ ಕರಾವೇದ್ಯಂ ವೇದ್ಯಂ ಜಿತಮಿತಿ ನಮೋಽತರ್ಕ್ಯ ಶಿವ ತೇ ॥19॥ ಶಿವಂ ಸೇವ್ಯಂ ಭಾವಂ ಶಿವಮತಿಶಿವಾಕಾರಮಶಿವಂ ನ ಸತ್ಯಂ ಶೈವಂ ತಚ್ಛಿವಮಿತಿ ಶಿವಂ ಸೇವ್ಯಮನಿಶಂ । ಶಿವಂ ಶಾಂತಂ ಮತ್ವಾ ಶಿವಪರಮತತ್ತ್ವಂ ಶಿವಮಯಂ ನ ಜಾನೇ ರೂಪತ್ವಂ ಶಿವಮಿತಿ ನಮೋ ವೇದ್ಯ ಶಿವ ತೇ ॥20॥ ಯದಜ್ಞಾತ್ವಾ ತತ್ತ್ವಂ ಸಕಲಮಪಿ ಸಂಸಾರಪತಿತಂ ಜಗಜ್ಜನ್ಮಾವೃತ್ತಿಂ ದಹತಿ ಸತತಂ ದುಃಖನಿಲಯಂ । ಯದೇತಜ್ಜ್ಞಾತ್ವೈವಾವಹತಿ ಚ ನಿವೃತ್ತಿಂ ಪರತರಾಂ ನ ಜಾನೇ ತತ್ತತ್ತ್ವಂ ಪರಮಿತಿ ನಮೋ ವೇದ್ಯ ಶಿವ ತೇ ॥21॥ ನ ವೇದಂ ಯದ್ರೂಪಂ ನಿಗಮವಿಷಯಂ ಮಂಗಳಕರಂ ನ ದೃಷ್ಟಂ ಕೇನಾಪಿ ಧ್ರುವಮಿತಿ ವಿಜಾನೇ ಶಿವ ವಿಭೋ । ತತಶ್ಚಿತ್ತೇ ಶಂಭೋ ನಹಿ ಮಮ ವಿಷಾದೋಽಘವಿಕೄತ್ತಿಃ ಪ್ರಯತ್ನಲ್ಲಬ್ಧೇಽಸ್ಮಿನ್ನ ಕಿಮಪಿ ನಮಃ ಪೂರ್ಣ ಶಿವ ತೇ ॥22॥ ತವಾಕರ್ಣ್ಯಾಗೂಢಂ ಯದಪಿ ಪರತತ್ತ್ವಂ ಶ್ರುತಿಪರಂ ತದೇವಾತೀತಂ ಸನ್ನಯನಪದವೀಂ ನಾತ್ರ ತನುತೇ । ಕದಾಚಿತ್ಕಿಂಚಿದ್ವಾ ಸ್ಫುರತಿ ಕತಿಧಾ ಚೇತಸಿ ತವ ಸ್ಫುರದ್ರೂಪಂ ಭವ್ಯಂ ಭವಹರ ಪರಾವೇದ್ಯ ಶಿವ ತೇ ॥23॥ ತ್ವಮಿಂದುರ್ಭಾನುಸ್ತ್ವಂ ಹುತಭುಗಸಿ ವಾಯುಶ್ಚ ಸಲಿಲಂ ತ್ವಮೇವಾಕಾಶೋಽಸಿ ಕ್ಷಿತಿರಸಿ ತಥಾಽಽತ್ಮಾಽಸಿ ಭಗವನ್ । ತತಃ ಸರ್ವಾಕಾರಸ್ತ್ವಮಸಿ ಭವತೋ ಭಿನ್ನಮನಘಾನ್ನ ತತ್ಸತ್ಯಂ ಸತ್ಯಂ ತ್ರಿನಯನ ನಮೋಽನಂತ ಶಿವ ತೇ ॥24॥ ವಿಧುಂ ಧತ್ಸೇ ನಿತ್ಯಂ ಶಿರಸಿ ಮೃದುಕಂಠೋಽಪಿ ಗರಳಂ ನವಂ ನಾಗಾಹಾರಂ ಭಸಿತಮಮಲಂ ಭಾಸುರತನುಂ । ಕರೇ ಶೂಲಂ ಭಾಲೇ ಜ್ವಲನಮನಿಶಂ ತತ್ಕಿಮಿತಿ ತೇ ನ ತತ್ತ್ವಂ ಜಾನೇಽಹಂ ಭವಹರ ನಮಃ ಕುರ್ಪ ಶಿವ ತೇ ॥25॥ ತವಾಪಾಂಗಃ ಶುದ್ಧೋ ಯದಿ ಭವತಿ ಭವ್ಯೇ ಶುಭಕರಃ ಕದಾಚಿತ್ತ್ಕಸ್ಮಿಂಶ್ಚಿಲ್ಲಧುತರನರೇ ವಿಪ್ರಭವತಿ । ಸ ಏವೈತಾಲ್ಲೋಕಾನ್ ರಚಯಿತುಮಲಂ ಸಾಪಿ ಚ ಮಹಾನ್- ಕೃಪಾಧಾರೋಽಯಂ ಸುಕಯತಿ ನಮೋಽನಂತ ಶಿವ ತೇ ॥26॥ ಭವಂತಂ ದೇವೇಶಂ ಶಿವಮಿತರಗೀರ್ವಾಣಸದೃಶಂ ಪ್ರಮಾದಾದ್ಯಃ ಕಶ್ಚಿದ್ಯದಿ ಯದಪಿ ಚಿತ್ತೇಽಪಿ ಮನುತೇ । ಸ ದುಃಖಂ ಲಬ್ಧ್ವಾಽನ್ತೇ ನರಕಮಪಿ ಯಾತಿ ಧ್ರುವಮಿದಂ ಧ್ರುವಂ ದೇವಾರಾಧ್ಯಾಮಿತಗುಣ ನಮೋಽನಂತ ಶಿವ ತೇ ॥27॥ ಪ್ರದೋಷೇ ರತ್ನಾಢ್ಯೇ ಮೃದುಲತರಸಿಂಹಾಸನವರೇ ಭವಾನೀಮಾರೂಢಾಮಸಕೃದಪಿ ಸಂವೀಕ್ಷ್ಯ ಭವತಾ । ಕೃತಂ ಸಮ್ಯಙ್ನಾಠ್ಯಂ ಪ್ರಥಿತಮಿತಿ ವೇದೋಽಪಿ ಭವತಿ ಪ್ರಭಾವಃ ಕೋ ವಾಽಯಂ ತವ ಹರ ನಮೋ ದೀಪ ಶಿವ ತೇ ॥28॥ ಶ್ಮಶಾನೇ ಸಂಚಾರಃ ಕಿಮು ಶಿವ ನ ತೇ ಕ್ವಾಪಿ ಗಮನಂ ಯತೋ ವಿಶ್ವಂ ವ್ಯಾಪ್ಯಾಖಿಲಮಪಿ ಸದಾ ತಿಷ್ಠತಿ ಭವಾನ್ । ವಿಭುಂ ನಿತ್ಯಂ ಶುದ್ಧಂ ಶಿವಮುಪಹತಂ ವ್ಯಾಪಕಮಿತಿ ಶ್ರುತಿಃ ಸಾಕ್ಷಾದ್ವಕ್ತಿ ತ್ವಯಮಪಿ ನಮಃ ಶುದ್ಧ ಶಿವ ತೇ ॥29॥ ಧನುರ್ಮೇರುಃ ಶೇಷೋ ಧನುವರಗುಣೋ ಯಾನಮವನಿ- ಸ್ತವೈವೇದಂ ಚಕ್ರಂ ನಿಗಮನಿಕರಾ ವಾಜಿನಿಕರಾಃ । ಪುರೋಲಕ್ಷ್ಯಂ ಯಂತಾ ವಿಧಿರಿಪುಹರಿಶ್ಚೇತಿ ನಿಗಮಃ ಕಿಮೇವಂ ತ್ವನ್ವೇಷ್ಯೋ ನಿಗದತಿ ನಮಃ ಪೂರ್ಣ ಶಿವ ತೇ ॥30॥ ಮೃದುಃ ಸತ್ತ್ವಂ ತ್ವೇತದ್ಭವಮನಘಯುಕ್ತಂ ಚ ರಜಸಾ ತಮೋಯುಕ್ತಂ ಶುದ್ಧಂ ಹರಮಪಿ ಶಿವಂ ನಿಷ್ಕಳಮಿತಿ । ವದತ್ಯೇಕೋ ವೇದಸ್ತ್ವಮಸಿ ತದುಪಾಸ್ಯಂ ಧ್ರುವಮಿದಂ ತ್ವಮೋಂಕರಾಕಾರೋ ಧ್ರುವಮಿತಿ ನಮೋಽನಂತ ಶಿವ ತೇ ॥31॥ ಜಗತ್ಸುಪ್ತಿಂ ಬೋಧಂ ವ್ರಜತಿ ಭವತೋ ನಿರ್ಗತಮಪಿ ಪ್ರವೃತ್ತಿಂ ವ್ಯಾಪರಂ ಪುನರಪಿ ಸುಷುಪ್ತಿಂ ಚ ಸಕಲಂ । ತ್ವದನ್ಯಂ ತ್ವತ್ಪ್ರೇಕ್ಷ್ಯಂ ವ್ರಜತಿ ಶರಣಂ ನೇತಿ ನಿಗಮೋ ವದತ್ಯದ್ಧಾ ಸರ್ವಃ ಶಿವ ಇತಿ ನಮಃ ಸ್ತುತ್ಯ ಶಿವ ತೇ ॥32॥ ತ್ವಮೇವಾಲೋಕಾನಾಮಧಿಪತಿರುಮಾನಾಥ ಜಗತಾಂ ಶರಣ್ಯಃ ಪ್ರಾಪ್ಯಸ್ತ್ವಂ ಜಲನಿಧಿರಿವಾನಂತಪಯಸಾಂ । ತ್ವದನ್ಯೋ ನಿರ್ವಾಣಂ ತಟ ಇತಿ ಚ ನಿರ್ವಾಣಯತಿರಪ್ಯತಃ ಸರ್ವೋತ್ಕೃಷ್ಟಸ್ತ್ವಮಸಿ ಹಿ ನಮೋ ನಿತ್ಯ ಶಿವ ತೇ ॥33॥ ತವೈವಾಂಶೋ ಭಾನುಸ್ತಪತಿ ವಿಧುರಪ್ಯೇತಿ ಪವನಃ ಪವತ್ಯೇಷೋಽಗ್ನಿಶ್ಚ ಜ್ವಲತಿ ಸಲಿಲಂ ಚ ಪ್ರವಹತಿ । ತವಾಜ್ಞಾಕಾರಿತ್ವಂ ಸಕಲಸುರವರ್ಗಸ್ಯ ಸತತಂ ತ್ವಮೇಕ: ಸ್ವಾತಂತ್ರ್ಯಂ ವಹಸಿ ಹಿ ನಮೋಽನಂತ ಶಿವ ತೇ ॥34॥ ಸ್ವತಂತ್ರೋಽಯಂ ಸೋಮಃ ಸಕಲಭುವನೈಕಪ್ರಭುರಯಂ ನಿಯಂತಾ ದೇವಾನಾಮಪಿ ಹರ ನಿಯಂತಾಸಿ ನ ಪರಃ । ಶಿವಃ ಶುದ್ಧಾ ಮಾಯಾರಹಿತ ಇತಿ ವೇದೋಽಪಿ ವದತಿ ಸ್ವಯಂ ತಾಮಾಶಾಸ್ಯ ತ್ರಯಹರ ನಮೋಽನಂತ ಶಿವ ತೇ ॥35॥ ನಮೋ ರುದ್ರಾನಂತಾಮರವರ ನಮಃ ಶಂಕರ ವಿಭೋ ನಮೋ ಗೌರೀನಾಥ ತ್ರಿನಯನ ಶರಣ್ಯಾಂಘ್ರಿಕಮಲ । ನಮಃ ಶರ್ವಃ ಶ್ರೀಮನ್ನನಘ ಮಹದೈಶ್ವರ್ಯನಿಲಯ ಸ್ಮರಾರೇ ಪಾಪಾರೇ ಜಯ ಜಯ ನಮಃ ಸೇವ್ಯ ಶಿವ ತೇ ॥ 36॥ ಮಹಾದೇವಾಮೇಯಾನಘಗುಣಗಣಪ್ರಾಮವಸತ- ನ್ನಮೋ ಭೂಯೋ ಭೂಯಃ ಪುನರಪಿ ನಮಸ್ತೇ ಪುನರಪಿ । ಪುರಾರಾತೇ ಶಂಭೋ ಪುನರಪಿ ನಮಸ್ತೇ ಶಿವ ವಿಭೋ ನಮೋ ಭೂಯೋ ಭೂಯಃ ಶಿವ ಶಿವ ನಮೋಽನಂತ ಶಿವ ತೇ ॥37॥ ಕದಾಚಿದ್ಗಣ್ಯಂತೇ ನಿಬಿಡನಿಯತವೃಷ್ಟಿಕಣಿಕಾಃ ಕದಾಚಿತ್ತತ್ಕ್ಷೇತ್ರಾಣ್ಯಪಿ ಸಿಕತಲೇಶಂ ಕುಶಲಿನಾ । ಅನಂತೈರಾಕಲ್ಪಂ ಶಿವ ಗುಣಗಣಶ್ಚಾರುರಸನೈ- ರ್ನ ಶಕ್ಯಂ ತೇ ನೂನಂ ಗಣಯಿತುಮುಷಿತ್ವಾಽಪಿ ಸತತಂ ॥38॥ ಮಯಾ ವಿಜ್ಞಾಯೈಷಾಽನಿಶಮಪಿ ಕೃತಾ ಜೇತುಮನಸಾ ಸಕಾಮೇನಾಮೇಯಾ ಸತತಮಪರಾಧಾ ಬಹುವಿಧಾಃ । ತ್ವಯೈತೇ ಕ್ಷಂತವ್ಯಾಃ ಕ್ವಚಿದಪಿ ಶರೀರೇಣ ವಚಸಾ ಕೃತೈರ್ನೈತೈರ್ನೂನಂ ಶಿವ ಶಿವ ಕೃಪಾಸಾಗರ ವಿಭೋ ॥39॥ ಪ್ರಮಾದಾದ್ಯೇ ಕೇಚಿದ್ವಿತತಮಪರಾಧಾ ವಿಧಿಹತಾಃ ಕೃತಾಃ ಸರ್ವೇ ತೇಽಪಿ ಪ್ರಶಮಮುಪಯಾಂತು ಸ್ಫುಟತರಂ । ಶಿವಃ ಶ್ರೀಮಚ್ಛಂಭೋ ಶಿವಶಿವ ಮಹೇಶೇತಿ ಚ ಜಪನ್ ಕ್ವಚಿಲ್ಲಿಂಗಾಕಾರೇ ಶಿವ ಹರ ವಸಾಮಿ ಸ್ಥಿರತರಂ ॥40॥ ಇತಿ ಸ್ತುತ್ವಾ ಶಿವಂ ವಿಷ್ಣುಃ ಪ್ರಣಮ್ಯ ಚ ಮುಹುರ್ಮುಹುಃ । ನಿರ್ವಿಣ್ಣೋ ನ್ಯವಸನ್ನೂನಂ ಕೃತಾಂಜಲಿಪುಟಃ ಸ್ಥಿರಂ ॥41॥ ತದಾ ಶಿವಃ ಶಿವಂ ರೂಪಮಾದಾಯೋವಾಚ ಸರ್ವಗಃ । ಭೀಷಯನ್ನಖಿಲಾನ್ಭೂತಾನ್ ಘನಗಂಭೀರಯಾ ಗಿರಾ ॥42॥ ಮದೀಯಂ ರೂಪಮಮಲಂ ಕಥಂ ಜ್ಞೇಯಂ ಭವಾದೃಶೈಃ । ಯತ್ತು ವೇದೈರವಿಜ್ಞಾತಮಿತ್ಯುಕ್ತ್ವಾಽನ್ತರ್ದಧೇ ಶಿವಃ ॥43॥ ತತಃ ಪುನರ್ವಿಧಿಸ್ತತ್ರ ತಪಸ್ತಪ್ತುಂ ಸಮಾರಭತ್ । ವಿಷ್ಣುಶ್ಚ ಶಿವತತ್ತ್ವಸ್ಯ ಜ್ಞಾನಾರ್ಥಮತಿಯತ್ನತಃ ॥44॥ ತಾದೃಶೀ ಶಿವ ಮೇ ವಾಚ್ಛಾ ಪೂಜಾಯಿತ್ವಾ ವದಾಮ್ಯಹಂ । ನಾನ್ಯೋ ಮಯಾಽರ್ಚ್ಯೋ ದೇವೇಷು ವಿನಾ ಶಂಭುಂ ಸನಾತನಂ ॥ 45॥ ತ್ವಯಾಪಿ ಶಾಂಕರಂ ಲಿಂಗಂ ಪೂಜನೀಯಂ ಪ್ರಯತ್ನತಃ । ವಿಹಾಯೈವಾನ್ಯದೇವಾನಾಂ ಪೂಜನಂ ಶೇಷ ಸರ್ವದಾ ॥46॥ ಇತಿ ಶ್ರೀಸ್ಕಂದಪುರಾಣೇ ವಿಷ್ಣುವಿರಚಿತಂ ಶಿವಮಹಿಮಸ್ತೋತ್ರಂ ಸಂಪೂರ್ಣಂ ॥