Dvadasha Jyothirlinga Stotram

---

ಶಿವಾಯ ನಮಃ || 

ದ್ವಾದಶಜ್ಯೋತಿರ್ಲಿಙ್ಗ ಸ್ತೋತ್ರಮ್ |  

ಸೌರಾಷ್ಟ್ರದೇಶೇ ವಿಶದೇಽತಿರಮ್ಯೇ ಜ್ಯೋತಿರ್ಮಯಂ ಚನ್ದ್ರ ಕಲಾವತಂಸಮ್ | 
ಭಕ್ತಿಪ್ರದಾನಾಯ ಕೃಪಾವತೀರ್ಣಂ ತಂ ಸೋಮನಾಥಂ ಶರಣಂ ಪ್ರಪದ್ಯೇ ||೧||

ಶ್ರೀಶೈಲಶೃಙ್ಗೇ ವಿಬುಧಾತಿಸಙ್ಗೇ ತುಲಾದ್ರಿತುಙ್ಗೇಽಪಿ ಮುದಾ ವಸನ್ತಮ್ | 
ತಮರ್ಜುನಂ ಮಲ್ಲಿಕಪೂರ್ವಮೇಕಂ ನಮಾಮಿ ಸಂಸಾರಸಮುದ್ರಸೇತುಮ್ ||೨|| 

ಅವನ್ತಿಕಾಯಾಂ ವಿಹಿತಾವತಾರಂ ಮುಕ್ತಿಪ್ರದಾನಾಯ ಚ ಸಜ್ಜನಾನಾಮ್ | 
ಅಕಾಲಮೃತ್ಯೋಃ ಪರಿರಕ್ಷಣಾರ್ಥಂ ವನ್ದೇ ಮಹಾಕಾಲಮಹಾಸುರೇಶಮ್ ||೩||

ಕಾವೇರಿಕಾನರ್ಮದಯೋಃ ಪವಿತ್ರೇ ಸಮಾಗಮೇ ಸಜ್ಜನತಾರಣಾಯ | 
ಸದೈವ ಮಾನ್ಧಾತೃಪುರೇ ವಸನ್ತಮೋಙ್ಕಾರಮೀಶಂ ಶಿವಮೇಕಮೀಡೇ ||೪|| 

ಪೂರ್ವೋತ್ತರೇ ಪ್ರಜ್ವಲಿಕಾನಿಧಾನೇ ಸದಾ ವಸನ್ತಂ ಗಿರಿಜಾಸಮೇತಮ್ | 
ಸುರಾಸುರಾರಾಧಿತಪಾದಪದ್ಮಂ ಶ್ರೀವೈದ್ಯನಾಥಂ ತಮಹಂ ನಮಾಮಿ ||೫|| 

ಯಾಮ್ಯೇ ಸದಙ್ಗೇ ನಗರೇಽತಿರಮ್ಯೇ ವಿಭೂಷಿತಾಙ್ಗಂ ವಿವಿಧೈಶ್ಚ ಭೋಗೈಃ | 
ಸದ್ಭಕ್ತಿಮುಕ್ತಿಪ್ರದಮೀಶಮೇಕಂ ಶ್ರೀನಾಗನಾಥಂ ಶರಣಂ ಪ್ರಪದ್ಯೇ ||೬||  

ಮಹಾದ್ರಿಪಾರ್ಶ್ವೇ ಚ ತಟೇ ರಮನ್ತಂ ಸಮ್ಪುಜ್ಯಮಾನಂ ಸತತಂ ಮುನೀನ್ದ್ರೈಃ |
ಸುರಾಸುರೈರ್ಯಕ್ಷಮಹೋರಗಾದ್ಯೈಃ ಕೇದಾರಮೀಶಂ ಶಿವಮೇಕಮೀಡೇ ||೭|| 

ಸಹ್ಯಾದ್ರಿಶೀರ್ಷೇ ವಿಮಲೇ ವಸನ್ತಂ ಗೋದಾವರೀತೀರಪವಿತ್ರದೇಶೇ | 
ಯದ್ದರ್ಶನಾತ್ಪಾತಕಮಾಶು ನಾಶಂ ಪ್ರಯಾತಿ ತಂ ತ್ರ್ಯಮ್ಬಕಮೀಶಮೀಡೇ ||೮|| 

ಸುತಾಮ್ರಪರ್ಣೀಜಲರಾಶಿಯೋಗೇ ನಿಬಧ್ಯ ಸೇತುಂ ವಿಶಿಖೈರಸಂಖ್ಯೈಃ | 
ಶ್ರೀರಾಮಚನ್ದ್ರೇಣ ಸಮರ್ಪಿತಂ ತಂ ರಾಮೇಶ್ವರಾಖ್ಯಂ ನಿಯತಂ ನಮಾಮಿ ||೯|| 

ಯಂ ಡಾಕಿನೀಶಾಕಿನಿಕಾಸಮಾಜೈರ್ನಿಷೇವ್ಯಮಾಣಂ ಪಿಶಿತಾಶನೈಶ್ಚ | 
ಸದೈವ ಭೀಮಾದಿಪದಪ್ರಸಿದ್ಧ್ಂ ತಂ ಶಙ್ಕರಂ ಭಕ್ತಹಿತಂ ನಮಾಮಿ ||೧೦|| 

ಸಾನನ್ದಮಾನನ್ದವನೇ ವಸನ್ತಮಾನನ್ದಕನ್ದಂ ಹತಪಾಪ ವೄನ್ದಮ್ | 
ವಾರಾಣಸೀನಾಥಮನಾಥನಾಥಂ ಶ್ರೀವಿಶ್ವನಾಥಂ ಶರಣಂ ಪ್ರಪದ್ಯೇ ||೧೧|| 

ಇಲಾಪುರೇ ರಮ್ಯವಿಶಾಲಕೇಽಸ್ಮಿನ್ಸಮುಲ್ಲಸನ್ತಂ ಚ ಜಗದ್ವರೇಣ್ಯಮ್ | 
ವನ್ದೇ ಮಹೋದಾರತರಸ್ವಭಾವಂ ಘೃಷ್ಣೇಶ್ವರಾಖ್ಯಂ ಶರಣಂ ಪ್ರಪದ್ಯೇ ||೧೨|| 

ಜ್ಯೋತಿರ್ಮಯದ್ವಾದಶಲಿಙ್ಗಕಾನಾಂ ಶಿವಾತ್ಮನಾಂ ಪ್ರೋಕ್ತಮಿದಂ ಕ್ರಮೇಣ | 
ಸ್ತೋತ್ರಂ ಪಠಿತ್ವಾ ಮನುಜೋಽತಿಭಕ್ತ್ಯಾ ಫಲಂ ತದಾಲೋಕ್ಯ ನಿಜಂ ಭಜೇಚ್ಚ ||೧೩|| 

ಇತಿ ಶ್ರೀದ್ವಾದಶಜ್ಯೋತಿರ್ಲಿಙ್ಗಸ್ತೋತ್ರಂ ಸಂಪೂರ್ಣಮ್ ||