Shivamanasa Puja

---

ಓಉಮ್ ಪ್ರತ್ಯಕ್ಪ್ರವಣಧೀವೃತ್ಯಾ ಹೃದ್ಗೃಹಾನ್ತಃಪ್ರವೇಶನಮ್ | 
ಮಣ್ಡಪಾನ್ತಃ ಪ್ರವೇಶೋಽಯಂ ಪೂಜಾರ್ಥಂ ತವ ಶಙ್ಕರ ||೧|| 

 

ಗುರುವಾಕ್ಯೇಷು ವಿಶ್ವಾಸಃ ಸ್ಥಿತಿರಾಸನಸಂಸ್ಥಿತಿಃ |
ಸರ್ವಸಙ್ಕಲ್ಪಸನ್ತ್ಯಾಗಃ ಸಙ್ಕಲ್ಪಸ್ತವ ಪೂಜನೇ ||೨|| 

 

ಸರ್ವಾಧಾರಸ್ತ್ವಮೇವೇತಿ ನಿಶ್ಚಯಃ ಪೀಠಪೂಜನಮ್ | 
ಧ್ಯಾನಧ್ಯಾತೃಧ್ಯೇಯಬಾಧೋ ಧ್ಯಾನಮಾನನ್ದಕಾರಣಮ್ ||೩|| 

 

ದೃಶ್ಯಪ್ರಮಾರ್ಜನಂ ಚಿತ್ತಾನ್ನಿರ್ಮಾಲ್ಯಸ್ಯ ವಿಸರ್ಜನಮ್ | 
ಅಹಂ ಬ್ರಹ್ಮೇತ್ಯಖಣ್ಡಾ ಯಾ ವೃತ್ತಿರ್ಧಾರಾಭಿಷೇಚನಮ್ ||೪|| 

 

ಪೃಥಿವ್ಯಾತ್ಮಕತಾ ದೃಷ್ಟಿಸ್ತವ ಗನ್ಧಸಮರ್ಪಣಮ್ | 
ಬೋಧೋಪಶಮವೈರಾಗ್ಯಂ ತ್ರಿದಳಂ ಬಿಲ್ವಮರ್ಪಯೇ ||೫||| 

 

ಆಕಾಶಾತ್ಮಕತಾಬೋಧಃ ಕುಸುಮಾರ್ಪಣಮೀಶ್ವರ | 
ಜಗದಾಕಾಶಪುಷ್ಪಾಭಮಿತಿ ಪದ್ಮಂ ಸಮರ್ಪಯೇ ||೬|| 

 

ವಾಯುತೇಜೋಮಯತ್ವಂ ತೇ ಧೂಪದೀಪಾವನುತ್ತಮೌ | 
ದೃಶ್ಯಾಸಂಭವಬೋಧೇನ ನಿಜಾನನ್ದೇನ ತೃಪ್ತತಾ ||೭|| 

 

ಸರ್ವತಃ ಪ್ರೀತಿಜನಕಂ ನೈವೇದ್ಯಂ ವಿನಿವೇದಯೇ | 
ಜಲಾತ್ಮಕತ್ವಬುದ್ಧಿಸ್ತು ಪೀಯೂಷಂ ತೇಽರ್ಪಯೇ ಪಿಬ ||೮|| 

 

ಕರ್ತವ್ಯೇಷ್ವಪ್ರಸಕ್ತಿಸ್ತು ಹಸ್ತಪ್ರಕ್ಷಾಳನಂ ತವ ||೯|| 

 

ದುರ್ವಾಸನಾಪರಿತ್ಯಾಗಸ್ತಾಂಬೂಲಸ್ಯ ಸಮರ್ಪಣಮ್ | 
ವಾಚಾಂ ವಿಸರ್ಜನಂ ದೇವ ದಕ್ಷಿಣಾ ಶ್ರುತಿಸಂಮತಾ ||೧೦|| 

 

ಫಲಾಭಿಸನ್ಧಿರಾಹಿತ್ಯಂ ಫಲಾರ್ಪಣಮನುತ್ತಮಮ್ | 
ಅಹಮೇವ ಪರಂ ಬ್ರಹ್ಮ ಸಚಿದಾನನ್ದಲಕ್ಷಣಮ್ ||೧೧|| 

 

ಏವಂ ನಿದಿಧ್ಯಾಸವಾಕ್ಯಂ ಸ್ತುತಿಃ ಪ್ರಿಯಕರೀ ತವ | 
ನಾಮರೂಪಾಣಿ ನ ತ್ವತ್ತೋ ಭಿನ್ನಾನೀತಿ ಮತಿಸ್ತು ಯಾ ||೧೨|| 

 

ತವ ಪುಷ್ಪಾಞ್ಜಲಿಃ ಶಮ್ಭೋ ಸರ್ವತ್ರೋತ್ಕೀರ್ಣಪುಷ್ಪಕಃ | 
ಸ್ವಪ್ರಕಾಶಾತ್ಮಬುದ್ಧಿಸ್ತು ಮಹಾನೀರಾಜನಂ ತವ ||೧೩|| 

 

ಪ್ರಾದಕ್ಷಿಣ್ಯಂ ಸರ್ವತಸ್ತೇ ವ್ಯಾಪ್ತಿಬುದ್ಧಿಃ ಸ್ಮೃತಂ ಶಿವ |
ತ್ವಮೇವಾಹಮಿತಿ ಸ್ಥಿತ್ಯಾ ಲೀನತಾ ಪ್ರಣತಿಸ್ತವ ||೧೪|| 

 

ಶುದ್ಧಸತ್ತ್ವಸ್ಯಾಭಿವೃದ್ಧಿಶ್ಛತ್ರಂ ತಾಪಾಪನೋದನಮ್ | 
ರಜಸ್ತಮಸ್ತಿರಸ್ಕಾರಶ್ಚಾಮರಾನ್ದೋಳನೇ ತವ ||೧೫|| 

 

ನಿಜಾನನ್ದಪರಾಘೂರ್ಣದೋಳನಾನ್ದೋಳನೇ ವಸ | 
ಧನ್ಯೋಽಹಂ ಕೃತಕೃತ್ಯೋಽಹಮಿತಿ ಗಾನಂ ತವ ಪ್ರಿಯಮ್ ||೧೬|| 

 

ನಿರಙ್ಕುಶಂ ಮಹಾತೃಪ್ತ್ಯಾ ನರ್ತನಂ ತೇ ಮುದೇ ಶಿವ | 
ನಾನಾವಿಧೈಃ ಶಬ್ದಜಾಲೈರ್ಜೃಂಭಣಂ ವಾದ್ಯಮುತ್ತಮಮ್ ||೧೭|| 

 

ಶಬ್ದಾತಿಗತ್ವಬುದ್ಧಿಸ್ತು ಕಲ್ಯಾಣಮಿತಿ ಡಿಣ್ಡಿಮಃ |
ವೇಗವತ್ತರಗನ್ತಾಽಸೌ ಮನೋಽಶ್ವಸ್ತೇ ಸಮರ್ಪಿತಃ ||೧೮|| 

 

ಅಹಮ್ಭಾವಮಹಾಮತ್ತಗಜೇನ್ದ್ರೋ ಭೂರಿಲಕ್ಷಣಃ | 
ತತ್ರ ದೇಹಾದ್ಯನಾರೋಪನಿಷ್ಠಾ ದೃಢತರೋಽಙ್ಕುಶಃ ||೧೯|| 

 

ಅದ್ವೈತಬೋಧದುರ್ಗೋಽಯಂ ಯತ್ರ ಶತ್ರುರ್ನ ಕಶ್ಚನ | 
ಜನತಾರಾಮವಿಸ್ತಾರೋ ರಮಸ್ವಾತ್ರ ಯಥಾಸುಖಮ್ ||೨೦|| 

ಕಲ್ಪನಾಸಂಪರಿತ್ಯಾಗೋ ಮಹಾರಾಜ್ಯಂ ಸಮರ್ಪಯೇ | 
ಭೋಕ್ತೃತ್ವಾಧ್ಯಾಸರಾಹಿತ್ಯಂ ವರಂ ದೇಹಿ ಸಹಸ್ರಧಾ ||೨೧|| 

 

ಅಖಣ್ಡಾ ತವ ಪೂಜೇಯಂ ಸದಾ ಭವತು ಸರ್ವದಾ | 
ಆತ್ಮತ್ವಾತ್ತವ ಮೇ ಸರ್ವಪೂಜೈವಾಸ್ತಿ ನ ಚಾನ್ಯಥಾ ||೨೨|| 

 

ಇಮಾಂ ಪೂಜಾಂ ಪ್ರತಿದಿನಂ ಯಃ ಪಠೇದ್ಯತ್ರಕುತ್ರಚಿತ್ | 
ಸದ್ಯಃ ಶಿವಮಯೋ ಭೂತ್ವಾ ಮುಕ್ತಶ್ಚರತಿ ಭೂತಲೇ ||೨೩|| 

 

ಇತಿ ಶ್ರೀಮತ್ಪರಮಹಂಸಪರಿವ್ರಾಜಕಾಚಾರ್ಯಶ್ರೀಮತ್ಕೃಷ್ಣಾನನ್ದಸರಸ್ವತೀವಿರಚಿತಾ ಶಿವಮಾನಸಪೂಜಾ ಸಮಾಪ್ತಾ ||