Chandrashekara Ashtaka Stotram

ચન્દ્રશેખરાષ્ટકમ્ ।

ચન્દ્રશેખર ચન્દ્રશેખર
ચન્દ્રશેખર પાહિ મામ્ ।
ચન્દ્રશેખર ચન્દ્રશેખર
ચન્દ્રશેખર રક્ષ મામ્ ॥૧॥

રત્નસાનુશરાસનં રજતાદ્રિશૃઙ્ગનિકેતનં
સિઞ્જિનીકૃત પન્નગેશ્વરમચ્યુતાનન સાયકમ્ ।
ક્ષિપ્રદગ્ધપુરત્રયં ત્રિદિવાલયૈરભિવન્દિતં
ચન્દ્રશેખરમાશ્રયે મમ કિં કરિષ્યતિ વૈ યમઃ ॥૨॥

પઞ્ચપાદપ પુષ્પગન્ધ પદાંબુજદ્વય શોભિતં
ભાલલોચન જાતપાવક દગ્ધમન્મથવિગ્રહમ્ ।
ભસ્મદિગ્ધકલેબરં ભવ નાશનં ભવમવ્યયં
ચન્દ્રશેખરમાશ્રયે મમ કિં કરિષ્યતિ વૈ યમઃ ॥૩॥

મત્તવારણ મુખ્યચર્મકૄતોત્તરીય મનોહરં
પઙ્કજાસન પદ્મલોચન પૂજિતાંઘ્રિસરોરુહમ્ ।
દેવસિન્ધુતરઙ્ગસીકર સિક્તશુભ્રજટાધરં
ચન્દ્રશેખરમાશ્રયે મમ કિં કરિષ્યતિ વૈ યમઃ ॥૪॥

યક્ષરાજસખં ભગાક્ષહરં ભુજઙ્ગવિભૂષણં
શૈલરાજસુતાપરિષ્કૃત ચારુવામકલેબરમ્ ।
ક્ષ્વેડનીલગલં પરશ્વધધારિણં મૃગધારિણં
ચન્દ્રશેખરમાશ્રયે મમ કિં કરિષ્યતિ વૈ યમઃ ॥૫॥

કુણ્ડલીકૃત કુણ્ડલેશ્વર કુણ્ડલં વૃષવાહનં
નારદાદિમુનીશ્વર સ્તુતવૈભવં ભુવનેશ્વરમ્ ।
અન્ધકાન્તકમાશ્રિતામરપાદપં શમનાન્તકં
ચન્દ્રશેખરમાશ્રયે મમ કિં કરિષ્યતિ વૈ યમઃ ॥૬॥

ભેષજં ભવરોગિણામખિલાપદામપહારિણં
દક્ષયજ્ઞવિનાશનં ત્રિગુણાત્મકં ત્રિવિલોચનમ્ ।
ભુક્તિમુક્તિફલપ્રદં સકલાઘસંઘનિબર્હણં
ચન્દ્રશેખરમાશ્રયે મમ કિં કરિષ્યતિ વૈ યમઃ ॥૭॥

ભક્તવત્સલમર્ચિતં નિધિમક્ષયં હરિદંબરં
સર્વભૂતપતિં પરાત્પરમપ્રમેયમનુત્તમમ્ ।
સોમવારિદભૂહુતાશન સોમપાનિલખાકૃતિં
ચન્દ્રશેખરમાશ્રયે મમ કિં કરિષ્યતિ વૈ યમઃ ॥૮॥

વિશ્વસૃષ્ટિવિધાયિનં પુનરેવ પાલનતત્પરં
સંહરન્તમપિ પ્રપઞ્ચમશેષલોક નિવાસિનમ્ ।
ક્રીડયન્તમહર્નિશં ગણનાથયૂથસમન્વિતં
ચન્દ્રશેખરમાશ્રયે મમ કિં કરિષ્યતિ વૈ યમઃ ॥૯॥

મૃત્યુભીત મૃકણ્ડુસૂનુકૃતસ્તવં શિવસન્નિધૌ
યત્ર કુત્ર ચ યઃ પઠેન્ન હિ તસ્ય મૃત્યુભયં ભવેત્ ।
પૂર્ણમાયુરરોગતામખિલાર્થ સંપદમાદરાત્
ચન્દ્રશેખર એવ તસ્ય દદાતિ મુક્તિમયત્નતઃ ॥૧૦॥

ઇતિ શ્રીચન્દ્રશેખરાષ્ટકસ્તોત્રં સંપૂર્ણમ્ ॥