hālāsya stuti

kalyāṇaśaila-parikalpita-kārmukāya 
maurvīkṛtākhila-mahoraga-nāyakāya।
pṛthvīrathāya kamalāpatisāyakāya 
hālāsyamadhyanilayāya namaśśivāya॥ 1 ॥

bhaktārtibhañjanaparāya parātparāya 
kālābhrakānti-garalāṅkita-kandharāya।
bhūteśvarāya bhuvanatrayakāraṇāya 
hālāsyamadhyanilayāya namaśśivāya॥ 2 ॥

bhūdāramūrti-harimṛgya-padāmbujāya 
haṃsābjasambhavasudūra sumastakāya। 
jyotirmaya-sphuritadivya-vapurdharāya 
hālāsyamadhyanilayāya namaśśivāya॥ 3 ॥

kādambakānana-nivāsa-kutūhalāya 
kāntārdhabhāga-kamanīya-kalebarāya।
kālāntakāya karuṇāmṛtasāgarāya 
hālāsyamadhyanilayāya namaśśivāya॥ 4 ॥

viśveśvarāya vibudheśvarapūjitāya 
vidyāviśiṣṭa-viditātma-suvaibhavāya। 
vidyāpradāya vimalendravimānagāya 
hālāsyamadhyanilayāya namaśśivāya॥ 5 ॥

sampatpradāya sakalāgamamastakeṣu 
saṅghoṣitātmavibhavāya sadāśivāya। 
sarvātmane sakaladu:kha samūlahantre 
hālāsyamadhyanilayāya namaśśivāya॥ 6 ॥

gaṅgādharāya garuḍadhvajavanditāya 
gaṇḍasphurad-bhujaga-kuṇḍalamaṇḍitāya। 
gandharva-kinnara-sugīta-guṇādhikāya 
hālāsyamadhyanilayāya namaśśivāya॥ 7 ॥

pāṇiṃ pragṛhya malayadhvaja-bhūpaputryā: 
pāṇḍyeśvaraḥ svayamabhūtparameśvaro yaḥ।
tasmai jagatprathita-sundarapāṇḍya-nāmne 
hālāsyamadhyanilayāya namaśśivāya॥ 8 ॥

gīrvāṇadeśikagirāmapi dūragaṃ yat 
vaktuṃ mahattvamiha ko bhavata: pravīṇaḥ।
śambho kṣamasva bhagavaccharaṇāravinda-
bhaktyā kṛtāṃ stutimimāṃ mama sundareśa॥ 9 ॥