rudraakshajaabaalopanishhat.h

rudraakshopanishhadvedyaM mahaarudratayojjvalam.h .
pratiyogivinirmuktashivamaatrapadaM bhaje ..
AUM aapyaayantu mamaa~Ngaani vaakpraaNashchakshuH
shrotramatho balamindriyaaNi cha .. sarvaaNi sarvaM brahmopanishhadaM
maahaM brahma niraakuryaaM maa maa brahma niraakarodaniraakaraNama\-
stvaniraakaraNaM mestu tadaatmani nirate ya upanishhatsu dharmaaste mayi
santu te mayi santu .. AUM shaantiH shaantiH shaantiH ..
hariH AUM .. atha haina.n kaalaagnirudraM bhusuNDaH paprachchha katha.n
rudraakshotpattiH . taddhaaraNaatkiM phalamiti . ta.n hovaacha
bhagavaankaalaagnirudraH . tripuravadhaarthamaha.n nimiilitaaksho.abhavam.h . 
tebhyo jalabindavo bhuumau patitaaste rudraakshaa jaataaH . 
sarvaanugrahaarthaaya teshhaa.n naamochchaaraNamaatreNa 
dashagopradaanaphala.n darshanasparshanaabhyaa.n dviguNaM
phalamata uurdhva.n vaktu.n na shaknomi . tatraite shlokaa bhavanti .
kasmi.nsthita.n tu ki.n naama katha.n vaa dhaaryate naraiH .
katibhedamukhaanyatra kairmantrairdhaaryate katham.h .. 1..
divyavarshhasahasraaNi chakshurunmiilitaM mayaa .
bhuumaavakshipuTaabhyaa.n tu patitaa jalabindavaH .. 2..
tatraashrubindavo jaataa mahaarudraakshavR^ikshakaaH .
sthaavaratvamanupraapya bhaktaanugrahakaaraNaat.h .. 3..
bhaktaanaa.n dhaaraNaatpaapa.n divaaraatrikR^ita.n haret.h .
laksha.n tu darshanaatpuNya.n koTistaddhaaraNaadbhavet.h .. 4..
tasya koTishataM puNya.n labhate dhaaraNaannaraH .
lakshakoTisahasraaNi lakshakoTishataani cha .. 5..
tajjapaallabhate puNya.n naro rudraakshadhaaraNaat.h .
dhaatriiphalapramaaNa.n yachchhreshhThametadudaahR^itam.h .. 6..
badariiphalamaatra.n tu madhyamaM prochyate budhaiH .
adhama.n chaNamaatra.n syaatprakriyaishhaa mayochyate .. 7..
braahmaNaaH kshatriyaa vaishyaaH shuudraashcheti shivaaj~nayaa .
vR^ithaa jaataaH pR^ithivyaa.n tu tajjaatiiyaaH shubhaakshakaaH .. 8..
shvetaastu braahmaNaa j~neyaaH kshatriyaa raktavarNakaaH .
piitaastu vaishyaa vij~neyaaH kR^ishhNaaH shuudraa udaahR^itaaH .. 9..
braahmaNo bibhR^iyaachchhvetaatraktaatraajaa tu dhaarayet.h .
piitaanvaishyastu bibhR^iyaatkR^ishhNaa~nchhuudrastu dhaarayet.h .. 10..
samaaH snigdhaa dR^iDhaaH sthuulaaH kaNTakaiH sa.nyutaaH shubhaaH .
kR^imidashhTaM bhinnabhinna.n kaNTakairhiinameva cha .. 11..
vraNayuktamayukta.n cha shhaDrudraakshaaNi varjayet.h .
svayameva kR^ita.n dvaara.n rudraaksha.n syaadihottamam.h .. 12..
yattu paurushhayatnena kR^ita.n tanmadhyamaM bhavet.h .
samaansnigdhaandR^iDhaansthuulaankshaumasuutreNa dhaarayet.h .. 13..
sarvagaatreNa saumyena saamaanyaani vichakshaNaH .
nikashhe hemarekhaabhaa yasya rekhaa pradR^ishyate .. 14..
tadakshamamuttama.n vidyaattaddhaarya.n shivapuujakaiH .
shikhaayaamekarudraaksha.n trishata.n shirasaa vahet.h .. 15..
shhaTtri.nshata.n gale dadhyaatbaahoH shhoDashashhoDasha .
maNibandhe dvaadashaiva skandhe pa~nchashata.n vahet.h .. 16..
ashhTottarashatairmaalaamupaviitaM prakalpayet.h .
dvisara.n trisara.n vaapi saraaNaaM pa~nchaka.n tathaa .. 17..
saraaNaa.n saptaka.n vaapi bibhR^iyaatkaNThadeshataH .
mukuTe kuNDale chaiva karNikaahaarake.api vaa .. 18..
keyuurakaTake suutra.n kukshibandhe visheshhataH .
supte piite sadaakaala.n rudraaksha.n dhaarayennaraH .. 19..
trishata.n tvadhamaM pa~nchashataM madhyamamuchyate .
sahasramuttamaM proktamevaM bhedena dhaarayet.h .. 20..
shirasiishaanamantreNa kaNThe tatpurushheNa tu .
aghoreNa gale dhaarya.n tenaiva hR^idaye.api cha .. 21..
aghorabiijamantreNa karayordhaarayetsudhiiH .
pa~nchaashadakshagrathitaanvyomavyaapyapi chodare .. 22..
pa~ncha brahmabhira~Ngaishacha trimaalaa pa~ncha sapta cha .
grathitvaa muulamantreNa sarvaaNyakshaaNi dhaarayet.h .. 23..

atha hainaM bhagavanta.n kaalaagnirudraM bhusunDaH paprachchha
rudraakshaaNaaM bhedena yadaksha.n yatsvaruupa.n yatphalamiti .
tatsvaruupaM mukhayuktamarishhTanirasana.n kaamaabhiishhTaphalaM
bruuhiiti hovaacha . tatraite shlokaa bhavanti ..
ekavaktra.n tu rudraakshaM paratattvasvaruupakam.h .
taddhaaraNaatpare tattve liiyate vijitendriyaH .. 1..
dvivaktra.n tu munishreshhTha chaardhanaariishvaraatmakam.h .
dhaaraNaadardhanaariishaH priiyate tasya nityashaH .. 2..
trimukha.n chaiva rudraakshamagnitrayasvaruupakam.h .
taddhaaraNaachcha hutabhuktasya tushhyati nityadaa .. 3..
chaturmukha.n tu rudraaksha.n chaturvaktrasvaruupakam.h .
taddhaaraNaacchaturvaktraH priiyate tasya nityadaa .. 4..
pa~nchavaktra.n tu rudraakshaM pa~nchabrahmasvaruupakam.h .
pa~nchavaktraH svayaM brahma pu.nhatyaa.n cha vyapohati .. 5..
shhaDvaktramapi rudraaksha.n kaartikeyaadhidaivatam.h .
taddhaaraNaanmahaashriiH syaanmahadaarogyamuttamam.h .. 6..
mativij~naanasaMpattishuddhaye dhaarayetsudhiiH .
vinaayakaadhidaiva.n cha pravadanti maniishhiNaH .. 7..
saptavaktra.n tu rudraaksha.n saptamaadhidaivatam.h .
taddhaaraNaanmahaashriiH syaanmahadaarogyamuttamam.h .. 8..
mahatii j~naanasaMpattiH shuchirdhaaraNataH sadaa .
ashhTavaktra.n tu rudraakshamashhTamaatraadhidaivatam.h .. 9..
vasvashhTakapriya.n chaiva ga~Ngaapriitikara.n tathaa .
taddhaaraNaadime priitaa bhaveyuH satyavaadinaH .. 10..
navavaktra.n tu rudraaksha.n navashaktyadhidaivatam.h .
tasya dhaaraNamaatreNa priiyante navashaktayaH .. 11..
dashavaktra.n tu rudraaksha.n yamadaivatyamiiritam.h .
darshanaachchhaantijanaka.n dhaaraNaannaatra sa.nshayaH .. 12..
ekaadashamukha.n tvaksha.n rudraikaadashadaivatam.h .
tadida.n daivataM praahuH sadaa saubhaagyavardhanam.h .. 13..
rudraaksha.n dvaadashamukhaM mahaavishhNusvaruupakam.h .
dvaadashaadityaruupa.n cha bibhartyeva hi tatparam.h .. 14..
trayodashamukha.n tvaksha.n kaamada.n siddhida.n shubham.h .
tasya dhaaraNamaatreNa kaamadevaH prasiidati .. 15..
chaturdashamukha.n chaaksha.n rudranetrasamudbhavam.h .
sarvavyaadhihara.n chaiva sarvadaarogyamaapnuyaat.h .. 16..
madyaM maa.nsa.n cha lashunaM palaaNDu.n shigrumeva cha .
shleshhmaataka.n viDvaraahamabhakshya.n varjayennaraH .. 17..
grahaNe vishhuve chaivamayane sa.nkrame.api cha .
darsheshhu puurNamaase cha puurNeshhu divaseshhu cha .
rudraakshadhaaraNaatsadyaH sarvapaapaiH pramuchyate .. 18..
rudraakshamuula.n tadbrahmaa tannaala.n vishhNureva cha .
tanmukha.n rudra ityaahustadbinduH sarvadevataaH .. 19.. iti ..
atha kaalaagnirudraM bhagavanta.n sanatkumaaraH paprachchhaadhiihi
bhagavanrudraakshadhaaraNavidhim.h . tasminsamaye nidaagha\-
jaDabharatadattaatreyakaatyaayanabharadvaajakapilavasishhTha\-
pippalaadaadayashcha kaalaagnirudraM parisametyochuH . atha 
kaalaagnirudraH kimarthaM bhavataamaagamanamiti hovaacha .
rudraakshadhaaraNavidhi.n vai sarve shrotumichchhaamaha iti . atha
kaalaagnirudraH provaacha . rudrasya nayanaadutpannaa rudraakshaa 
iti loke khyaayante . atha sadaashivaH sa.nhaarakaale sa.nhaara.n
kR^itvaa sa.nhaaraakshaM mukuliikaroti . tannayanaajjaataa rudraakshaa
iti hovaacha . tasmaadrudraakshatvamiti kaalaagnirudraH provaacha .
tadrudraakshe vaagvishhaye kR^ite dashagopradaanena yatphalamavaapnoti
tatphalamashnute . sa eshha bhasmajyotii rudraaksha iti . tadrudraaksha.n 
kareNa spR^ishhTvaa dhaaraNamaatreNa dvisahasragopradaanaphalaM
bhavati . tadrudraakshe karNayordhaaryamaaNe ekaadashasahasragopradaanaphalaM
bhavati . ekaadasharudratva.n cha gachchhati . tadrudraakshe shirasi
dhaaryamaaNe koTigopradaanaphalaM bhavati . eteshhaa.n sthaanaanaa.n 
karNayoH phala.n vaktu.n na shakyamiti hovaacha . ya imaa.n rudraakshajaabaalopanishhada.n
nityamadhiite baalo vaa yuvaa vaa veda sa mahaanbhavati . sa guruH sarveshhaaM
mantraaNaamupadeshhTaa bhavati etaireva homa.n kuryaat.h . etairevaarchanam.h .
tathaa rakshoghnaM mR^ityutaaraka.n guruNaa labdha.n kaNThe baahau 
shikhaayaa.n vaa badhniita . saptadviipavatii bhuumirdakshiNaartha.n naavakalpate .
tasmaachchhraddhayaa yaa.n kaa~nchidgaa.n dadyaatsaa dakshiNaa bhavati . 
ya imaamupanishhadaM braahmaNaH saayamadhiiyaano divasakR^itaM paapa.n
naashayati . madhyaahne.adhiiyaanaH shhaDjanmakR^itaM paapa.n naashayati .
saayaM praataH prayu~njaano.anekajanmakR^itaM paapa.n naashayati .
shhaTsahasralakshagaayatriijapaphalamavaapnoti . brahmahatyaasuraapaana\-
svarNasteyagurudaaragamanatatsa.nyogapaatakebhyaH puuto bhavati . 
sarvatiirthaphalamashnute . patitasaMbhaashhaNaatpuuto bhavati . 
pa~Nktishatasahasrapaavano bhavati . shivasaayujyamavaapnoti . na cha
punaraavartate na cha punaraavartata ityoMsatyamityupanishhat.h ..
AUM aapyaayantu mamaa~Ngaani vaakpraaNashchakshuH shrotramatho
balamindriyaaNi cha .. sarvaaNi sarvaM brahmopanishhadaM maahaM
brahma niraakuryaaM maa maa brahma niraakarodaniraakaraNama\-
stvaniraakaraNaM mestu  tadaatmani nirate ya upanishhatsu dharmaaste
mayi santu te mayi santu .. 

AUM shaantiH shaantiH shaantiH ..
iti rudraakshajaabaalopanishhatsamaaptaa ..