nirvaaNama~njarii

aha.n naamaro naiva martyo na daityo
   na gandharvayakshaH pishaachaprabhedaH .
pumaannaiva na strii tathaa naiva shhaNDaH 
   prakR^ishhTaH prakaashasvaruupaH shivo.aham.h .. 1..

aha.n naiva baalo yuvaa naiva vR^iddho
   na varNii na cha brahmachaarii gR^ihasthaH .
vanastho.api naaha.n na sa.nnyastadharmaa
   jagajjanmanaashaikahetuH shivo.aham.h .. 2..

aha.n naiva meyastirobhuutamaayaa 
   tathaivekshituM maaM pR^itha~NnaastyupaayaH .
samaashlishhTakaayatrayo.apyadvitiiyaH 
   sadaatiindriyaH sarvaruupaH shivo.aham.h .. 3..

aha.n naiva mantaa na gantaa na vaktaa 
   na kartaa na bhoktaa na muktaashramasthaH .
yathaahaM manovR^ittibhedasvaruupa\-
   stathaa sarvavR^ittipradiipaH shivo.aham.h .. 4..

na me lokayaatraapravaahapravR^itti\-
   rna me bandhabuddhyaa duriihaanivR^ittiH .
pravR^ittirnivR^ittyaasya chittasya vR^itti\-
   ryatastanvaha.n tatsvaruupaH shivo.aham.h .. 5..

nidaana.n yadaj~naanakaaryasya kaaryaM
   vinaa yasya sattva.n svato naiva bhaati .
yadaadyantamadhyaantaraalaantaraala\-
   prakaashaatmaka.n syaattadevaahamasmi .. 6..

yato.aha.n na buddhirna me kaaryasiddhi\-
   ryato naahama~Nga.n na me li~Ngabha~Ngam.h .
hR^idaakaashavartii gataa~NgatrayaartiH 
   sadaa sachchidaanandamuurtiH shivo.aham.h .. 7..

yadaasiidvilaasaadvikaara.n jagadya\-
   dvikaraashraya.n naadvitiiyatvataH syaat.h .
manobuddhichittaahamaakaaravR^itti\-
   pravR^ittiryataH syaattadevaahamasmi .. 8..

yadantarbahirvyaapaka.n nityashuddhaM
   yadeka.n sadaa sachchidaanandakandam.h .
yataH sthuulasuukshmaprapa~nchasya bhaanaM
   yatastatprasuutistadevaahamasmi .. 9..

yadarkenduvidyutprabhaajaalamaalaa\-
   vilaasaaspada.n yatsvabhedaadishuunyam.h .
samasta.n jagadyasya paadaatmaka.n syaa\-
   dyataH shaktibhaana.n tadevaahamasmi .. 10..

yataH kaalamR^ityurbibheti prakaamaM
   yatashchittabuddhiindriyaaNaa.n vilaasaH .
haribrahmarudrendrachandraadinaama\-
   prakaasho yataH syaattadevaahamasmi .. 11..

yadaakaashavatsarvaga.n shaantaruupaM
   para.n jyotiraakaarashuunya.n vareNyam.h .
yadaadyantashuunyaM para.n sha~NkaraakhyaM
   yadantarvibhaavya.n tadevaahamasmi .. 12.. 

iti shriimatparamaha.nsaparivraajakaachaaryasya
shriigovindabhagavatpuujyapaadashishhyasya
shriimachchha~NkarabhagavatpAda kR^itau
nirvaaNama~njarii saMpuurNaa ..