śiva aṣṭakam

prabhuṃ prāṇanāthaṃ vibhuṃ viśvanāthaṃ jagannāthanāthaṃ sadānandabhājam .
bhavadbhavyabhūteśvaraṃ bhūtanāthaṃ śivaṃ śaṅkaraṃ śaṃbhumīśānamīḍe ..1..

gale ruṇḍamālaṃ tanau sarpajālaṃ mahākālakālaṃ gaṇeśādhipālam .
jaṭājūṭagaṅgottaraṅgairviśālaṃ śivaṃ śaṅkaraṃ śaṃbhumīśānamīḍe ..2..

mudāmākaraṃ maṇḍanaṃ maṇḍayantaṃ mahāmaṇḍalaṃ bhasmabhūṣādharaṃ  tam .
anādiṃ hyapāraṃ mahāmohamāraṃ śivaṃ śaṅkaraṃ śaṃbhumīśānamīḍe ..3..

taṭādhonivāsaṃ mahāṭṭāṭṭahāsaṃ mahāpāpanāśaṃ sadā suprakāśam .
girīśaṃ gaṇeśaṃ sureśaṃ maheśaṃ śivaṃ śaṅkaraṃ śaṃbhumīśānamīḍe ..4.

girīndrātmajāsaṅgṛhītārdhadehaṃ girau saṃsthitaṃ sarvadā sannigeham .
parabrahma brahmādibhirvandyamānaṃ śivaṃ śaṅkaraṃ śaṃbhumīśānamīḍe ..5..

kapālaṃ triśūlaṃ karābhyāṃ dadhānaṃ padāṃbhojanamrāya kāmaṃ dadānam .
balīvardayānaṃ surāṇāṃ pradhānaṃ śivaṃ śaṅkaraṃ śaṃbhumīśānamīḍe ..6..

śaraccandragātraṃ guṇānandapātraṃ trinetraṃ pavitraṃ dhanĕśasya mitram .
aparṇākal̤atraṃ caritraṃ vicitraṃ śivaṃ śaṅkaraṃ śaṃbhumīśānamīḍe ..7..

haraṃ sarpahāraṃ citābhūvihāraṃ bhavaṃ vedasāraṃ sadā nirvikāram .
śmaśāne vasantaṃ manojaṃ dahantaṃ śivaṃ śaṅkaraṃ śaṃbhumīśānamīḍe ..8..

stavaṃ yaḥ prabhāte naraḥ śūlapāṇeḥ paṭhetsarvadā bhargabhāvānuraktaḥ .
sa putraṃ dhanaṃ dhānyamitraṃ kal̤atraṃ vicitraiḥ samārādya mokṣaṃ prayāti ..9..

iti śrīśivāṣṭakaṃ saṃpūrṇam ..