কল্যাণং নো বিধত্তাং কটকতটলসৎকল্পবাটিনিকুঞ্জ-
ক্রীডাসংসক্তবিদ্যাধরনিবহবধূগীতরুদ্রাপদানঃ।
তারৈর্হেরম্বনাদৈস্তরলিতনিনদত্তারকারাতিকেকী
কৈলাসঃ শর্বনির্বৃত্যভিজনকপদঃ সর্বদা পর্বতেন্দ্রঃ ॥১॥

যস্য প্রাহুঃ স্বরূপং সকলদিবিষদাং সারসর্বস্বয়োগং
যস্যেষুঃ শার্ঙ্গধন্বা সমজনি জগতাং রক্ষণে জাগরূকঃ ।
মৌর্বী দর্বীকরাণামপি চ পরিবৃঢঃ পূস্রয়ী সা চ লক্ষ্যং
সোঽব্যাদব্যাজমস্মানশিবভিদনিশং নাকিনাং শ্রীপিনাকঃ ॥২॥

আতঙ্কাবেগহারী সকলদিবিষদামঙ্ঘ্রিপদ্মাশ্রয়াণাং
মাতঙ্গাদ্যুগ্রদৈত্যপ্রকরতনুগলদ্রক্তধারাক্তধারঃ ।
ক্রূরঃ সূরায়ুতানামপি চ পরিভবং স্বীয়ভাসা বিতন্বন্
ঘোরাকারঃ কুঠারো দৃঢতরদুরিতাখ্যাটবীং পাটয়েন্নঃ ।৩॥

কালারাতেঃ করাগ্রে কৃতবসতিরুরঃশাণতাতো রিপূণাং
কালে কালে কুলাদ্রিপ্রবরতনয়যা কল্পিতস্নহলেপঃ ।
পায়ান্নঃ পাবকার্চিঃপ্রসরসখমুখঃ পাপহন্তা নিতান্তং
শূলঃ শ্রীপাদসেবাভজনরসজুষাং পালনৈকান্তশীলঃ ॥৪॥

দেবস্যাঙ্কাশ্রয়ায়াঃ কুলগিরিদুহিতুর্নেত্রকোণপ্রচার-
প্রস্তারানত্যুদারান্পিপটিষুরিব যো নিত্যমত্যাদরেণ ।
আধত্তে ভঙ্গিতুঙ্গৈরনিশমবয়বৈরন্তরঙ্গং সমোদং
সোমাপীডস্য সোঽয়ং প্রদিশতু কুশলং পাণিরঙ্গঃ কুরঙ্গঃ ॥৫॥

কণ্ঠপ্রান্তাবসজ্জৎকনকময়মহাঘণ্টিকাঘোরঘোষৈঃ
কণ্ঠারাবৈরকুণ্ঠৈরপি ভরিতজগচ্চক্রবালান্তরালঃ ।
চণ্ডঃ প্রোদ্দণ্ডশৃঙ্গঃ ককুদকবলিতোত্তুঙ্গকৈলাসশ্রৃঙ্গঃ
কণ্ঠে কালস্য বাহঃ শময়তু শমলং শাশ্ব্তঃ শাক্বরেন্দ্রঃ ॥৬॥

নির্যদ্দানাম্বুধারাপরিমল়তরল়ীভূতলোলম্বপালীঝঙ্কারৈঃ
শঙ্করাদ্রেঃ শিখরশতদরীঃ পূরয়ন্ভূরীঘোষৈঃ ।
শার্ঘঃ সৌবর্ণশৈলপ্রতিমপৃথুবপুঃ সর্ববিঘ্নাপহর্তা
শর্বাণ্যাঃ পূর্বসূনুঃ স ভবতু ভবতাং স্বস্তিদো হস্তিবক্ত্রঃ ॥৭॥

যঃ পুণ্যৈর্দেবতানাং সমজনি শিবয়োঃ শ্লাঘ্যবীর্যৈকমত্যাদ্-
যন্নাম্নি শ্রূয়মাণে দিতিজভটঘটা ভীতিভারং ভজন্তে ।
ভূয়াৎসোঽয়ং বিভূত্যৈ নিশিতশরশিখাপাটিতক্রৌঞ্চশৈলঃ
সংসারাগাধকূপোদরপতিতসমুত্তারকস্তারকারিঃ ॥৮॥

আরূঢঃ প্রৌঢবেগপ্রবিজিতপবনং তুঙ্গতুঙ্গং তুরঙ্গং
চৈলং নীলং বসানঃ করতলবিলসৎকাণ্ডকোদণ্ডদণ্ডঃ ।
রাগদ্বেষাদিনানাবিধমৃগপটলীভীতিকৃদ্ভূতভর্তা
কুর্বন্নাখেটলীলাং পরিলসতু মনঃ কাননে মামকীনে ॥৯॥

অম্ভোজাভ্যাং চ রম্ভারথচরণলতাদ্বন্দ্বকুম্ভীন্দ্রকুম্ভৈ-
র্বিম্বেনেন্দোশ্চ কম্বোরুপরি বিলসতা বিদ্রুমেণোৎপলাভ্যাম্ ।
অম্ভোদেনাপি সম্ভাবিতমুপজনিতাডম্বরং শম্বরারেঃ
শম্ভোঃ সম্ভোগয়োগ্যং কিমপি ধনমিদং সম্ভবেৎসম্পদে নঃ ॥১০॥

বেণীসৌভাগ্যবিস্মাপিততপনসুতাচারুবেণীবিলাসান্
বাণীনির্ধূতবাণীকরতলবিধৃতোদারবীণাবিরাবান্ ।
এণীনেত্রান্তভঙ্গীনিরসননিপুণাপাঙ্গকোণানুপাসে 
শোণান্প্রাণানুদূঢপ্রতিনবসুষমাকন্দলানিন্দুমৌলেঃ ॥১১॥

নৃত্তারম্ভেষু হস্তাহতমুরজধিমীধিক্কৃতৈরত্যুদারৈ-
শ্চিত্তানন্দং বিধত্তে সদসি ভগবতঃ সন্ততং যঃ স নন্দী ।
চণ্ডীশাদ্যাস্তথাঽন্যে চতুরগুণগণপ্রীণিতস্বামিসৎকা-
রোৎকর্ষোদ্যৎপ্রসাদাঃ প্রমথপরিবৃঢাঃ সন্তু সন্তোষিণো নঃ ॥১২॥

মুক্তামাণিক্যজালৈঃ পরিকলিতমহাসালমালোকনীয়ং
প্রত্যুপ্তানর্ধরত্নৈর্দিশি দিশি ভবনৈঃ কল্পিতৈর্দিক্পতীনাম্ ।
উদ্যানৈরদ্রিকন্যাপরিজনবনিতামাননীয়ৈঃ পরিতং
হৃদ্যং হৄদ্যস্তু নিত্যং মম ভুবনপতের্ধাম সোমার্ধমৌলেঃ ॥১৩॥

স্তম্ভৈর্জম্ভারিরত্নপ্রবরবিরচিতৈঃ সম্ভৃতোপান্তভাগং
শুম্ভৎসোপানমার্গং শুচিমণিনিচয়ৈর্গুম্ফিতানল্পশিল্পম্ ।
কুম্ভৈঃ সম্পূর্ণশোভং শিরসি সুঘটিতৈঃ শাতকুম্ভৈরপঙ্কৈঃ
শম্ভোঃ সম্ভাবনীয়ং সকলমুনিজনৈঃ স্বস্তিদং স্যাৎসদা নঃ ॥১৪॥

ন্যস্তো মধ্যে সভায়াঃ পরিসরবিলসৎপাদপীঠাভিরামো
হৃদ্যঃ পাদৈশ্চতুর্ভিঃ কনকমণিময়ৈরুচ্চকৈরুজ্জ্বলাত্মা ।
বাসোরত্নেন কেনাপ্যধিকমৃদুতরেণাস্তৃতো বিস্তৃতশ্রীপীঠঃ
পীডাভরং নঃ শময়তু শিবয়োঃ স্বৈরসম্বাসয়োগ্যঃ ॥১৫॥

আসীনস্যাধিপীঠং ত্রিজগদধিপতেরঙ্ঘ্রিপীঠানুষক্তৌ
পাথোজাভোগভাজৌ পরিমৃদুলতলোল্লাসিপদ্মাভিলেখৌ ।
পাতাং পাদাবুভৌ তৌ নমদমরকিরীটোল্লসচ্চারুহীর-
শ্রেণীশোণায়মানোন্নত নখদশকোদ্ভাসমানৌ সমানৌ ॥১৬॥

যন্নাদো বেদবাচাং নিগদতি নিখিলং লক্ষণং পক্ষিকেতুর্-
লক্ষ্মীসম্ভোগসৌখ্যং বিরচয়তি যয়োশ্চাপরে রূপভেদে ।
শম্ভোঃ সম্ভাবনীয়ে পদকমলসমাসঙ্গতস্তুঙ্গশোভে
মাঙ্গল্যং নঃ সমগ্রং সকলসুখকরে নূপুরে পূরয়েতাম্ ॥১৭॥

অঙ্গে শৃঙ্গারয়োনেঃ সপদি শলভতাং নেত্রবহ্নৌ প্রয়াতে
শত্রোরুদ্ধৃত্য তস্মাদিষুধিয়ুগমধো ন্যস্তমগ্রে কিমেতৎ ।
শঙ্কামিত্থং নতানামমরপরিষদামন্তরঙ্কূরয়ত্তৎ-
সঙ্ঘাতং চারু জঙ্ঘায়ুগমখিলপতেরংহসা সংহরেন্নঃ ॥১৮॥

জানুদ্বন্দ্বেন মীনধ্বজনৃবরসমুদ্গোপমানেন সাকং
রাজন্তৌ রাজরম্ভাকরিকরকনকস্তম্ভসম্ভাবনীয়ৌ ।
ঊরূ গৌরীকরাম্ভোরুহসরসসমামর্দনানন্দভাজৌ
চারূ দূরীক্রিয়েতাং  দুরিতমুপচিতং জন্মজন্মান্তরে নঃ ॥১৯॥

আমুক্তানর্ঘরত্নপ্রকরকরপরিষ্বক্তকল্যাণকাঞ্চী-
দাম্না বদ্ধেন দুগ্ধদ্যুতিনিচয়মুষা চীনপট্টাম্বরেণ ।
সম্বীতে শৈলকন্যাসুচরিতপরিপাকায়মানে নিতম্বে
নিত্যং নর্নর্তু চিত্তং মম নিখিলজগৎস্বামিনঃ সোমমৌলেঃ ॥২০॥

সন্ধ্যাকালানুরজ্যদ্দিনকরসরুচা কালধৌতেন গাঢং
ব্যানদ্ধঃ স্নিগ্ধমুগ্ধঃ সরসমুদরবন্ধেন বীতোপমেন ।
উদ্দীপ্রৈঃ স্বপ্রকাশৈরুপচিতমহিমা মন্মথারেরুদারো
মধ্যো মিথ্যার্থসঘ্র্যঙ্ মম দিশতু সদা সঙ্গতিং মঙ্গল়ানাম্॥২১॥

নাভীচক্রালবালান্নবনবসুষমাদোহদশ্রীপরীতা-
দুদ্গচ্ছন্তী পুরস্তাদুদরপথমতিক্রম্য বক্ষঃ প্রয়ান্তী ।
শ্যামা কামাগমার্থপ্রকথনলিপিবদ্ভাসতে যা নিকামং
সা মাং সোমার্ধমৌলেঃ সুখয়তু সততং রোমবল্লীমতল্লী ॥২২॥

আশ্লেষেষ্বদ্রিজায়াঃ কঠিনকুচতটীলিপ্তকাশ্মীরপঙ্ক-
ব্যাসঙ্গাদ্যদুদ্যদর্কদ্যুতিভিরুপচিতস্পর্ধমুদ্দামহৃদ্যম্ ।
দক্ষারাতেরুদূঢপ্রতিনবমণিমালাবলীভাসমানং
বক্ষো বিক্ষোভিতাঘং সততনতিজুষাং রক্ষতাদক্ষতং নঃ ॥২৩॥

বামাঙ্কে বিস্ফুরন্ত্যাঃ করতলবিলসচ্চারুরক্তোৎপলায়াঃ
কান্তায়া বামবক্ষোরুহভরশিখরোন্মর্দনব্যগ্রমেকং ।
অন্যাংস্ত্রীনপ্যুদারান্বরপরশুমৃগালঙ্কৃতানিন্দুমৌলে-
র্বাহূনাবদ্ধহেমাঙ্গদমণিকটকানন্তরালোকয়ামঃ ॥২৪॥

সম্ম্রান্তায়াঃ শিবায়াঃ পতিবিলয়ভিয়া সর্বলোকোপতাপাৎ-
সম্বিগ্নস্যাপি বিষ্ণোঃ সরভসমুভয়োর্বারণপ্রেরণাভ্যাম্ ।
মধ্যে ত্রৈশঙ্কবীয়ামনুভবতি দশাং যত্র হালাহলোষ্মা
সোঽয়ং সর্বাপদাং নঃ শময়তু নিচয়ং নীলকণ্ঠস্য কণ্ঠঃ ॥২৫॥

হৃদ্যৈরদ্রীন্দ্রকন্যামৃদুদশনপদৈর্মুদ্রিতো বিদ্রুমশ্রী-
রুদ্দ্যোতন্ত্যা নিতান্তং ধবল়ধবল়য়া মিশ্রিতো দন্তকান্ত্যা ।
মুক্তামাণিক্যজালব্যতিকরসদৃশা তেজসা ভাসমানঃ
সদ্যোজাতস্য দদ্যাদধরমণিরসৌ সম্পদাং সঞ্চয়ং নঃ ॥২৬॥

কর্ণালঙ্কারনানামণিনিকররুচাং সঞ্চয়ৈরঞ্চিতায়াং
বর্ণ্যায়াং স্বর্ণপদ্মোদরপরিবিলসৎকর্ণিকাসন্নিভায়াম্ ।
পদ্ধত্যাং প্রাণবায়োঃ প্রণতজনহৃদম্ভোজবাসস্য
শম্ভোর্নিত্যং নশ্চিত্তমেতদ্বিরচয়তু সুখে নাসিকাং নাসিকায়াম্ ॥২৭॥

অত্যন্তং ভাসমানে রুচিরতররুচাং সঙ্গমাৎসন্মণীনা-
মুদ্যচ্চণ্ডাংশুধামপ্রসরনিরসনস্পষ্টদৃষ্টাপদানে ।
ভূয়াস্তাং ভূতয়ে নঃ করিবরজয়িনঃ কর্ণপাশাবলম্বে
ভক্তালীভালসজ্জজ্জনিমরণলিপেঃ কুণ্ডলে কুণ্ডলে তে ॥২৮॥

যাভ্যাং কালব্যবস্থা ভবতি তনুমতাং যো মুখং দেবতানাং
যেষামাহুঃ স্বরূপং জগতি মুনিবরা দেবতানাং ত্রয়ীং তাম্ ।
রুদ্রাণীবক্ত্রপঙ্কেরুহসততবিহারোৎসুকেন্দীবরেভ্য-
স্তেভ্যস্ত্রিভ্যঃ প্রণামাঞ্জলিমুপরচয়ে ত্রীক্ষণস্যেক্ষণেভ্যঃ ॥২৯॥

বামং বামাঙ্কগায়া বদনসরসিজে ব্যাবলদ্বল্লভায়া
ব্যানম্রেষ্বন্যদন্যৎপুনরলিকভবং বীতনিঃশেষরৌক্ষ্যম্ ।
ভূয়ো ভূয়োঽপি মোদান্নিপতদতিদয়াশীতলং চূতবাণে
দক্ষারেরীক্ষণানাং ত্রয়মপহরতাদাশু তাপত্রয়ং নঃ ॥৩০॥

যস্মিন্নর্ধেন্দুমুগ্ধদ্যুতিনিচয়তিরস্কারনিস্তন্দ্রকান্তৌ
কাশ্মীরক্ষোদসঙ্কল্পিতমিব রুচিরং চিত্রকং ভাতি নেত্রম্ ।
তস্মিন্নুল্লীলচিল্লীনটবরতরুণীলাস্যরঙ্গায়মাণে
কালারেঃ ফালদেশে বিহরতু হৃদয়ং বীতচিন্তান্তরং নঃ ॥৩১॥

স্বামিন্ গঙ্গামিবাঙ্গীকুরু তব শিরসা মামপীত্যর্থয়ন্তীং
ধন্যাং কন্যাং খরাংশোঃ শিরসি বহতি কিংন্বেষ কারুণ্যশালী ।
ইত্থং শঙ্কাং জনানাং জনয়দতিঘনং কৈশিকং কালমেঘ-
চ্ছায়ং ভূয়াদুদারং ত্রিপুরবিজয়িনঃ শ্রেয়সে ভূয়সে নঃ ॥৩২॥

শ্রৃঙ্গারাকল্পয়োগ্যৈঃ শিখরিবরসুতাসৎসখীহস্তলূনৈঃ
সূনৈরাবদ্ধমালাবলিপরিবিলসৎসৌরভাকৃষ্টভৃঙ্গম্ ।
তুঙ্গং মাণিক্যকান্ত্যা পরিহসিতসুরাবাসশৈলেন্দ্রশ্রৃঙ্গং
সঙ্ঘং নঃ সঙ্কটানাং বিঘটয়তু সদা কাঙ্কটীকং কিরীটম্ ॥৩৩॥

বক্রাকারঃ কলঙ্কী জডতনুরহমপ্যঙ্ঘ্রিসেবানুভাবা-
দুত্তংসত্বং প্রয়াতঃ সুলভতরঘৃণাস্যন্দিনশ্চন্দ্রমৌলেঃ ।
তৎসেবন্তাং জনৌঘাঃ শিবমিতি নিজয়াঽবস্থয়ৈব ব্রুবাণং
বন্দে দেবস্য শম্ভোর্মুকুটসুঘটিতং মুগ্ধপীয়ূষভানুম্ ॥৩৪॥

কান্ত্যা সম্ফুল্লমল্লীকুসুমধবল়য়া ব্যাপ্য বিশ্বং বিরাজন্
বৃত্তাকারো বিতন্বন্ মুহুরপি চ পরাং নির্বৃতিং পাদভাজাম্ ।
সানন্দং নন্দিদোষ্ণা মণিকটকবতা বাহ্মমানঃ পুরারেঃ
শ্বেতচ্ছত্রাখ্যশীতদ্যুতিরপহরতাদস্তাপদা নঃ ॥৩৫॥

দিব্যাকল্পোজ্জ্বলানাং শিবগিরিসুতয়োঃ পার্শ্বয়োরাশ্রিতানাং
রুদ্রাণীসৎসখীনামতিতরলকটাক্ষাঞ্চলৈরঞ্চিতানাম্ ।
উদ্বেল্লদ্বাহুবল্লীবিলসনসময়ে চামরান্দোলনীনামুদ্ভূতঃ
কঙ্কণালীবলয়কলকলো বারয়েদাপদো নঃ ॥৩৬॥

স্বর্গৌকঃসুন্দরীণাং সুললিতবপুষাং স্বামিসেবাপরাণাং
বল্গদ্ভূষাণি বক্ত্রাম্বুজপরিবিগলন্মুগ্ধগীতামৃতানি ।
নিত্যং নৃত্তান্যুপাসে ভুজবিধুতিপদন্যাসভাবাবলোক-
প্রত্যুদ্যৎপ্রীতিমাদ্যৎপ্রমথনটনটীদত্তসম্ভাবনানি ॥৩৭॥

স্থানপ্রাপ্ত্যা স্বরাণাং কিমপি বিশদতাং ব্যঞ্জয়ন্মঞ্জুবীণা-
স্বানাবচ্ছিন্নতালক্রমমমৃতমিবাস্বাদ্যমানং শিবাভ্যাম্ ।
নানারাগাতিহৃদ্যং নবরসমধুরস্তোত্রজাতানু বিদ্ধং
গানং বীণামহর্ষেঃ কলমতিললিতং কর্ণপূরায়তাং নঃ ॥৩৮॥

চেতো জাতপ্রমোদং সপদি বিদধতী প্রাণিনাং বাণিনীনাং
পাণিদ্বন্দ্বাগ্রজাগ্রৎসুললিতরণিতস্বর্ণতালানুকূলা ।
স্বীয়ারাবেণ পাথোধররবপটুনা নাদয়ন্তী ময়ূরী
মায়ূরীং মন্দভাবং মণিমুরজভবা মার্জনা মার্জয়েন্নঃ ॥৩৯॥

দেবেভ্যো দানবেভ্যঃ পিতৃমুনিপরিষৎসিদ্ধবিদ্যাধরেভ্যঃ
সাধ্যেভ্যশ্চারণেভ্যো মনুজপশুপতজ্জাতিকীটাদিকেভ্যঃ ।
শ্রীকৈলাসপ্ররূঢাস্তৃণবিটপিমুখাশ্চাপি যে সন্তি তেভ্যঃ
সবভ্যো নির্বিচারং নতিমুপরচয়ে শর্বপাদাশ্রয়েভ্যঃ ॥৪০॥

ধ্যায়ন্নিত্যং প্রভাতে প্রতিদিবসমিদং স্তোত্ররত্নং পঠেদ্যঃ
কিম্বা ব্রূমস্তদীয়ং সুচরিতমথবা কীর্তয়ামঃ সমাসাৎ ।
সম্পজ্জাতং সমগ্রং সদসি বহুমতিং সর্বলোকপ্রিয়ত্বং
সম্প্রাপ্যায়ুঃশতান্তে পদময়তি পরব্রহ্মণো মন্মথারেঃ ॥৪১॥

ইতি শ্রীমৎপরমহংসপরিব্রাজকাচার্যস্য
শ্রীগোবিন্দভগবৎপূজ্যপাদশিষ্যস্য
শ্রীমচ্ছঙ্করাচার্যস্য কৃতম্
শিবপাদাদিকেশান্তবর্ণনস্তোত্রং সম্পূর্ণম্ ॥