প্রদোষ স্তোত্রম্

Pradosha Stotram

জয় দেব জগন্নাথ জয় শঙ্কর শাশ্বত । 
জয় সর্বসুরাধ্যক্ষ জয় সর্বসুরার্চিত ॥১॥

জয় সর্বগুণাতীত জয় সর্ববরপ্রদ ॥ 
জয় নিত্য নিরাধার জয় বিশ্বম্ভরাব্যয ॥২॥

জয় বিশ্বৈকবন্দ্যেশ জয় নাগেন্দ্রভূষণ । 
জয় গৌরীপতে শম্ভো জয় চন্দ্রার্ধশেখর ॥৩॥

জয় কোঠ্যর্কসঙ্কাশ জয়ানন্তগুণাশ্রয় । 
জয় ভদ্র বিরূপাক্ষ জয়াচিন্ত্য নিরঞ্জন ॥৪॥

জয় নাথ  কৃপাসিন্ধো জয় ভক্তার্তিভঞ্জন । 
জয় দুস্তরসংসারসাগরোত্তারণ প্রভো ॥৫॥

প্রসীদ মে মহাদেব সংসারার্তস্য খিদ্যতঃ । 
সর্বপাপক্ষয়ং কৃত্বা রক্ষ মাং পরমেশ্বর ॥৬॥

মহাদারিদ্র্যমগ্নস্য মহাপাপহতস্য চ ॥ 
মহাশোকনিবিষ্টস্য মহারোগাতুরস্য চ ॥৭॥

ঋণভারপরীতস্য দহ্যমানস্য কর্মভিঃ ॥ 
গ্রহৈঃপ্রপীড্যমানস্য প্রসীদ মম শঙ্কর ॥৮॥

দরিদ্রঃ প্রার্থয়েদ্দেবং প্রদোষে গিরিজাপতিম্ ॥ 
অর্থাঢ্যো বাঽথ রাজা বা প্রার্থয়েদ্দেবমীশ্বরম্ ॥৯॥

দীর্ঘমায়ুঃ সদারোগ্যং কোশবৃদ্ধির্বলোন্নতিঃ ॥ 
মমাস্তু নিত্যমানন্দঃ প্রসাদাত্তব শঙ্কর ॥১০॥

শত্রবঃ সঙ্ক্ষয়ং যান্তু প্রসীদন্তু মম প্রজাঃ ॥ 
নশ্যন্তু দস্যবো রাষ্ট্রে জনাঃ সন্তু নিরাপদঃ ॥১১॥

দুর্ভিক্ষমারিসন্তাপাঃ শমং যান্তু মহীতলে ॥ 
সর্বসস্যসমৃদ্ধিশ্চ ভূয়াৎসুখময়া দিশঃ ॥১২॥

এবমারাধয়েদ্দেবং পূজান্তে গিরিজাপতিম্ ॥ 
ব্রাহ্মণান্ভোজয়েৎ পশ্চাদ্দক্ষিণাভিশ্চ পূজয়েৎ ॥১৩॥

সর্বপাপক্ষয়করী সর্বরোগনিবারণী । 
শিবপূজা ময়াঽঽখ্যাতা সর্বাভীষ্টফলপ্রদা ॥১৪॥

ইতি প্রদোষস্তোত্রং সম্পূর্ণম্ ॥