Daridrya Dahana Shiva Stotram

দারিদ্র্যদহনশিবস্তোত্রম্

বিশ্বেশ্বরায় নরকার্ণবতারণায় কর্ণামৃতায় শশিশেখরধারণায় ।
কর্পূরকান্তিধবল়ায় জটাধরায় দারিদ্র্যদুঃখদহনায় নমঃ শিবায় ॥১॥

গৌরিপ্রিয়ায় রজনীশকলাধরায় কালান্তকায় ভুজগাধিপকঙ্কণায় ।
গঙ্গাধরায় গজরাজবিমর্দনায় দারিদ্র্যদুঃখদহনায় নমঃ শিবায় ॥২॥

ভক্তিপ্রিয়ায় ভবরোগভয়াপহায় উগ্রায় দুর্গভবসাগরতারণায় ।
জ্যোতির্ময়ায় গুণনামসুনৃত্যকায় দারিদ্র্যদুঃখদহনায় নমঃ শিবায় ॥৩॥

চর্মাম্বরায় শবভস্মবিলেপনায় ভালেক্ষণায় মণিকুণ্ডলমণ্ডিতায় ।
মঞ্জীরপাদয়ুগল়ায় জটাধরায় দারিদ্র্যদুঃখদহনায় নমঃ শিবায় ॥৪॥

পঞ্চাননায় ফণিরাজবিভূষণায় হেমাংশুকায় ভুবনত্রয়মণ্ডিতায় ।
আনন্দভূমিবরদায় তমোময়ায় দারিদ্র্যদুঃখদহনায় নমঃ শিবায় ॥৫॥

ভানুপ্রিয়ায় ভবসাগরতারণায় কালান্তকায় কমলাসনপূজিতায় ।
নেত্রত্রয়ায় শুভলক্ষণলক্ষিতায় দারিদ্র্যদুঃখদহনায় নমঃ শিবায় ॥৬॥

রামপ্রিয়ায় রঘুনাথবরপ্রদায় নাগপ্রিয়ায় নরকার্ণব তারণায় ।
পুণ্যেষু পুণ্যভরিতায় সুরার্চিতায় দারিদ্র্যদুঃখদহনায় নমঃ শিবায় ॥৭॥

মুক্তেশ্বরায় ফলদায় গণেশ্বরায় গীতপ্রিয়ায় বৃষভেশ্বরবাহনায় ।
মাতঙ্গচর্মবসনায় মহেশ্বরায় দারিদ্র্যদুঃখদহনায় নমঃ শিবায় ॥৮॥

বসিষ্ঠেন কৃতং স্তোত্রং সর্বরোগনিবারণম্ ।
সর্বসম্পৎকরং শীঘ্রং পুত্রপৌত্রাদিবর্ধনম্ ।
ত্রিসন্ধ্যং যঃ পঠেন্নিত্যং স হি স্বর্গমবাপ্নুয়াৎ ॥৯॥

ইতি শ্রীবসিষ্ঠবিরচিতং দারিদ্র্যদহনশিবস্তোত্রং সম্পূর্ণম্ ॥