Shiva Ashtottara Naama Shataka Stotram

---

শিৱাষ্টোত্তরনামশতকস্তোত্রম |

দেৱা ঊচুঃ || 

জয শংভো ৱিভো রুদ্র স্ৱযংভো জয শঙ্কর | 
জযেশ্ৱর জযেশান জয সর্ৱজ্ঞ কামদ ||১|| 

নীলকণ্ঠ জয শ্রীদ শ্রীকণ্ঠ জয ধূর্জটে | 
অষ্টমূর্তেঽনন্তমূর্তে মহামূর্তে জযানঘ ||২|| 

জয পাপহরানঙ্গনিঃসঙ্গাভঙ্গনাশন | 
জয ত্ৱং ত্রিদশাধার ত্রিলোকেশ ত্রিলোচন ||৩|| 

জয ত্ৱং ত্রিপথাধার ত্রিমার্গ ত্রিভিরূর্জিত | 
ত্রিপুরারে ত্রিধামূর্তে জযৈকত্রিজটাত্মক ||৪||

শশিশেখর শূলেশ পশুপাল শিৱাপ্রিয | 
শিৱাত্মক শিৱ শ্রীদ সুহৃচ্ছ্রীশতনো জয ||৫|| 

সর্ৱ সর্ৱেশ ভূতেশ গিরিশ ত্ৱং গিরীশ্ৱর | 
জযোগ্ররূপ ভীমেশ ভৱ ভর্গ জয প্রভো ||৬|| 

জয দক্ষাধ্ৱরধ্ৱংসিন্নন্ধকধ্ৱংসকারক | 
রুণ্ডমালিন্কপালিংস্ত্ৱং ভুজঙ্গাজিনভূষণ||৭|| 

দিগম্বর দিশাম্নাথ ৱ্যোমকেশ চিতাংপতে | 
জযাধার নিরাধার ভস্মাধার ধরাধর ||৮|| 

দেৱদেৱ মহাদেৱ দেৱতেশাদি দৈৱত | 
ৱহ্নিৱীর্য জয স্থাণো জযাযোনিজসম্ভৱ ||৯|| 

ভৱ শর্ৱ মহাকাল ভস্মাঙ্গ সর্পভূষণ | 
ত্র্যম্বক স্থপতে ৱাচাংপতে ভো জগতাংপতে ||১০|| 

শিপিৱিষ্ট ৱিরূপাক্ষ জয লিঙ্গ ৱৃষধ্ৱজ | 
নীললোহিত পিঙ্গাক্ষ জয খট্ৱাঙ্গমণ্ডন ||১১|| 

কৃত্তিৱাস অহির্বুধ্ন্য মঊডানীশ জটাংবুভৃত | 
জগদ্ভ্রাতর্জগন্মাতর্জগত্তাত জগদ্গুরো ||১২|| 

পঞ্চৱক্ত্র মহাৱক্ত্র কালৱক্ত্র গজাস্যভৃত |
দশবাহো মহাবাহো মহাৱীর্য মহাবল ||১৩|| 

অঘোরঘোরৱক্ত্র ত্ৱং সদ্যোজাত উমাপতে | 
সদানন্দ মহানন্দ নন্দমূর্তে জযেশ্ৱর ||১৪| 

এৱমষ্টোত্তরশতং নাম্নাং দেৱকৃতং তু যে | 
শংভোর্ভক্ত্যা স্মরন্তীহ শৃণ্ৱন্তি চ পঠন্তি চ ||১৫|| 

ন তাপাস্ত্রিৱিধাস্তেষাং ন শোকো ন রুজাদযঃ | 
গ্রহগোচরপীডা চ তেষাং ক্ৱাপি ন ৱিদ্যতে |১৬|| 

শ্রীঃ প্রজ্ঞাঽঽরোগ্যমাযুষ্যং সৌভাগ্যং ভাগ্যমুন্নতিম | 
ৱিদ্যা ধর্মে মতিঃ শংভোর্ভক্তিস্তেষাং ন সংশযঃ ||১৭|| 

ইতি শ্রীস্কন্দপুরাণে সহ্যাদ্রিখণ্ডে শিৱাষ্টওত্তরনামশতকস্তোত্রং সংপূর্ণং||