অম্প্ঘ শিৱকৱচ

শিবকবচস্তোত্রম্

শ্রী শিবায় নমঃ ॥

অস্য শ্রী শিবকবচস্তোত্রমন্ত্রস্য

ব্রহ্মা ঋষিঃ,
অনুষ্টুপ্ ছন্দঃ,
শ্রীসদাশিবরুদ্রো দেবতা,
হ্রীং শক্তিঃ,
রং কীলকম্,
শ্রীং হ্রীং ক্লীং বীজম্,
শ্রীসদাশিবপ্রীত্যর্থে শিবকবচস্তোত্রজপে বিনিয়োগঃ ।

অথ ন্যাসঃ ।

ওঁ নমো ভগবতে জ্বলজ্জ্বালামালিনে ওঁ হ্রাং সর্বশক্তিধাম্নে ঈশানাত্মনে অঙ্গুষ্ঠাভ্যাং নমঃ ।
ওঁ নমো ভগবতে জ্বলজ্জ্বালামালিনে ওঁ নং রিং নিত্যতৃপ্তিধাম্নে তৎপুরুষাত্মনে তর্জনীভ্যাং নমঃ ।
ওঁ নমো ভগবতে জ্বলজ্জ্বালামালিনে ওঁ মং রুং অনাদিশক্তিধাম্নে অঘোরাত্মনে মধ্যমাভ্যাং নমঃ ।
ওঁ নমো ভগবতে জ্বলজ্জ্বালামালিনে ওঁ শিং রৈং স্বতন্ত্রশক্তিধাম্নে বামদেবাত্মনে অনামিকাভ্যাং নমঃ ।
ওঁ নমো ভগবতে জ্বলজ্জ্বালামালিনে ওঁ বাং রৌং অলুপ্তশক্তিধাম্নে সদ্যোজাতাত্মনে কনিষ্ঠিকাভ্যাং নমঃ ।
ওঁ নমো ভগবতে জ্বলজ্জ্বালামালিনে ওঁ যং রঃ অনাদি শক্তিধাম্নে সর্বাত্মনে করতলকরপৃষ্ঠাভ্যাং নমঃ ।

হৃদয়াদি ন্যাসঃ ।

ওঁ নমো ভগবতে জ্বলজ্জ্বালামালিনে ওঁ হ্রাং সর্বশক্তিধাম্নে ঈশানাত্মনে হৃদয়ায় নমঃ  ।
ওঁ নমো ভগবতে জ্বলজ্জ্বালামালিনে ওঁ নং রিং নিত্যতৃপ্তিধাম্নে তৎপুরুষাত্মনে শিরসে স্বাহা ।
ওঁ নমো ভগবতে জ্বলজ্জ্বালামালিনে ওঁ মং রুং অনাদিশক্তিধাম্নে অঘোরাত্মনে শিকায়ৈ বষট্ ।
ওঁ নমো ভগবতে জ্বলজ্জ্বালামালিনে ওঁ শিং রৈং স্বতন্ত্রশক্তিধাম্নে বামদেবাত্মনে কবচায় হুম্ ।
ওঁ নমো ভগবতে জ্বলজ্জ্বালামালিনে ওঁ বাং রৌং অলুপ্তশক্তিধাম্নে সদ্যোজাতাত্মনে নেত্রত্রয়ায় বৌষট্ ।
ওঁ নমো ভগবতে জ্বলজ্জ্বালামালিনে ওঁ যং রঃ অনাদি শক্তিধাম্নে সর্বাত্মনে অস্ত্রায় ফট্ ॥

অথ ধ্যানম্ ॥

বজ্রদংষ্ট্রং ত্রিনয়নং কালকণ্ঠমরিন্দমম্ ।
সহস্রকরমত্যুগ্রং বন্দে শম্ভুমুমাপতিম্ ॥১॥

অথাপরং সর্বপুরাণগুহ্যং নিঃশেষপাপৌঘহরং পবিত্রম্ ।
জয়প্রদং সর্ববিপৎপ্রমোচনং বক্ষ্যামি শৈবং কবচং হিতায় তে ॥২॥

ঋষভ উবাচ ॥

নমস্কৃত্বা মহাদেবং বিশ্বব্যাপিনমীশ্বরম্ ।
বক্ষ্যে শিবময়ং বর্ম সর্বরক্ষাকরং নৃণাম্ ॥৩॥

শুচৌ দেশে সমাসীনো যথাবৎকল্পিতাসনঃ ।
জিতেন্দ্রিয়ো জিতপ্রাণঃ চিন্তয়েচ্ছিবমব্যযম্ ॥৪॥

হৃৎপুণ্ডরীকান্তরসন্নিবিষ্টং স্বতেজসা ব্যাপ্তনভোঽবকাশম্ ।
অতীন্দ্রিয়ং সূক্ষ্মমনন্তমাদ্যং ধ্যায়েৎপরানন্দময়ং মহেশম্ ॥৫॥

ধ্যানাবধূতাখিলকর্মবন্ধশ্চিরং চিদানন্দনিমগ্নচেতাঃ ।
ষডক্ষরন্যাসসমাহিতাত্মা শৈবেন কুর্যাৎকবচেন রক্ষাম্ ॥৬॥

মাং পাতু দেবোঽখিলদেবতাত্মা সংসারকূপে পতিতং গভীরে ।
তন্নাম দিব্যং বরমন্ত্রমূলং ধুনোতু মে সর্বমঘং হৃদিস্থম্ ॥ ৭॥

সর্বত্র মাং রক্ষতু বিশ্বমূর্তির্জ্যোতির্ময়ানন্দ ঘনশ্চিদাত্মা ।
অণোরণীয়ানুরুশক্তিরেকঃ স ঈশ্বরঃ পাতু ভয়াদশেষাৎ ॥৮॥

যো ভূস্বরূপেণ বিভর্তি বিশ্বং পায়াৎস ভূমের্গিরিশোঽষ্টমূর্তিঃ ।
যোঽপাংস্বরূপেণ নৃণাং করোতি সঞ্জীবনং সোঽবতু মাং জলেভ্যঃ ॥৯॥

কল্পাবসানে ভুবনানি দগ্ধ্বা সর্বাণি যো নৃত্যতি ভূরিলীলঃ ।
স কালরুদ্রোঽবতু মাং দবাগ্নের্বাত্যাদিভীতেরখিলাচ্চ তাপাৎ ॥১০॥

প্রদীপ্তবিদ্যুৎকনকাবভাসো বিদ্যাবরাভীতিকুঠার পাণিঃ ।
চতুর্মুখস্তৎপুরুষস্ত্রিনেত্রঃ প্রাচ্যাং স্থিতো রক্ষতু মামজস্রম্ ॥১১॥

কুঠারখেটাঙ্কুশপাশশূলকপালঢক্কাক্ষ গুণান্দধানঃ ।
চতুর্মুখো নীলরুচিস্ত্রিনেত্রঃ পায়াদঘোরো দিশি দক্ষিণস্যাম্ ॥১২॥

কুন্দেন্দু শঙ্খস্ফটিকাবভাসো বেদাক্ষমালাবরদাভয়াঙ্গঃ ।
ত্র্যক্ষশ্চতুর্বক্ত্র উরু প্রভাবঃ সদ্যোঽধিজাতোঽবতু মাং প্রতীচ্যাম্ ॥১৩॥

বরাক্ষমালাঽভয়টঙ্কহস্তঃ সরোজকিঞ্জল্কসমানবর্ণঃ ।
ত্রিলোচনশ্চারুচতুর্মুখো মাং পায়াদুদীচ্যাং দিশি বামদেবঃ ॥১৪॥

বেদাভয়েষ্টাঙ্কুশপাশঢঙ্ক কপালঢক্কাক্ষ্ররশূলপাণিঃ ।
সিতদ্যুতিঃ পঞ্চমুখোঽবতান্মামীশান ঊর্ধ্বম্ পরমপ্রকাশঃ ॥১৫॥

মূর্ধানমব্যান্মম চন্দ্রমৌলির্ভালং মমাব্যাদথ ভালনেত্রঃ ।
নেত্রে মমাব্যাজ্জগনেত্রহারী নাসাং সদা রক্ষতু বিশ্বনাথঃ ॥১৬॥

পায়াচ্ছ্রুতী মে শ্রুতিগীতকীর্তিঃ কপোলমব্যাৎসততং কপালী ।
বক্ত্রম্ সদা রক্ষতু পঞ্চবক্ত্রো জিহ্বাং সদা রক্ষতু বেদজিহ্বঃ ॥১৭॥

কণ্ঠং গিরীশোঽবতু নীলকণ্ঠঃ পাণিদ্বয়ং পাতু পিনাকপাণিঃ ।
দোর্মূলমব্যান্মম ধর্মবাহুর্বক্ষঃস্থলং দক্ষমখান্তকোঽব্যাৎ ॥১৮॥

মমোদরং পাতু গিরীন্দ্রধন্বা মধ্যং মমাব্যান্মদনান্তকারী ।
হেরম্ভতাতো মম পাতু নাভিং পায়াৎকটিং ধূর্জটিরীশ্বরো মে ॥ ১৯॥

ঊরুদ্বয়ং পাতু কুবেরমিত্রো জানুদ্বয়ং মে জগদীশ্বরোঽব্যাৎ ।
জঙ্ঘায়ুগং পুঙ্গবকেতুরব্যাৎ পাদৌ মমাব্যাৎ সুরবন্দ্যপাদঃ ॥২০॥

মহেশ্বরঃ পাতু দিনাদিয়ামে মাং মধ্যযামেঽবতু বামদেবঃ ।
ত্রিলোচনঃ পাতু তৃতীয়যামে বৃষধ্বজঃ পাতু দিনান্ত্যযামে ॥২১॥

পায়ান্নিশাদৌ শশিশেখরো মাং গঙ্গাধরো রক্ষতু মাং নিশীথে ।
গৌরীপতিঃ পাতু নিশাবসানে মৃত্যুঞ্জয়ো রক্ষতু সর্বকালম্ ॥ ২২॥

অন্তঃস্থিতং রক্ষতু শঙ্করো মাং স্থাণুঃ সদা পাতু বহিঃ স্থিতং মাম্ ।
তদন্তরে পাতু পতিঃ পশূনাং সদাশিবো রক্ষতু মাং সমন্তাৎ ॥২৩॥

তিষ্ঠন্তমব্যাদ্ভুবনৈকনাথঃ পায়াত্ব্রজন্তং প্রমথাধিনাথঃ ।
বেদান্ত বেদ্যোঽবতু মাং নিষণ্ণং মামব্যযঃ পাতু শিবঃ শয়ানম্ ॥২৪॥

মার্গেষু মাং রক্ষতু নীলকণ্ঠঃ শৈলাদিদুর্গেষু পুরত্রয়ারিঃ ।
অরণ্যবাসাদিমহাপ্রবাসে পায়ান্মৃগব্যাধ উদারশক্তিঃ ॥২৫॥

কল্পান্তকালোগ্র পটুপ্রকোপস্ফুটাট্টহাসোচ্চলিতাণ্ডকোশঃ ।
ঘোরারিসেনার্ণবদুর্নিবার মহাভয়াদ্রক্ষতু বীরভদ্রঃ ॥২৬॥

পত্যশ্বমাতঙ্গঘটাবরূথসহস্র লক্ষায়ুত কোটিভীষণম্ ।
অক্ষৌহিণীনাং শতমাততায়িনাং ছিন্দ্যান্মৃডো ঘোরকুঠারধারয়া ॥২৭॥

নিহন্তু দস্যূন্প্রলয়ানলার্চির্জ্বলত্ত্রিশূলং ত্রিপুরান্তকস্য ।
শার্দূলসিংহর্ক্ষবৃকাদিহিংস্রান্ সন্ত্রাসয়ত্বীশধনুঃ পিনাকঃ ॥২৮॥

দুঃস্বপ্ন দুঃশকুন দুর্গতি দৌর্মনস্য দুর্ভিক্ষ দুর্ব্যসন দুঃসহ দুর্যশাংসি।
উৎপাত তাপ বিষভীতিমসদ্গ্রহার্তিম্ব্যাধীংশ্চ নাশয়তু মে জগতামধীশঃ ॥২৯॥

ওঁ নমো ভগবতে সদাশিবায় সকলতত্ত্বাত্মকায় সর্বমন্ত্রস্বরূপায়
সর্বয়ন্ত্রাধিষ্ঠিতায় সর্বতন্ত্রস্বরূপায় সর্বতত্ত্ববিদূরায় ব্রহ্মরুদ্রাবতারিণে
নীলকণ্ঠায় পার্বতীমনোহরপ্রিয়ায় সোমসূর্যাগ্নিলোচনায় ভস্মোদ্ধূলিতবিগ্রহায়
মহামণিমুকুটধারণায় মাণিক্যভূষণায় স্রুষ্টিস্থিতিপ্রল়য়কালরৌদ্রাবতারায়
দক্ষাধ্বরধ্বংসকায় মহাকালমেদনায় মূলাধারৈকনিলয়ায় তত্ত্বাতীতায়
গঙ্গাধরায় সর্বদেবাধিদেবায় ষডাশ্রয়ায় বেদান্তসারায়
ত্রিবর্গসাধনায়ানন্তকোটিব্রহ্মাণ্ডনায়কায়ানন্ত বাসুকি তক্ষক কার্কোটক
শঙ্খ কুলিক পদ্ম মহাপদ্মেত্যষ্ট মহানাগকুলভূষণায় প্রণবস্বরূপায়
চিদাকাশায়াকাশাদিস্বরূপায় গ্রহনক্ষত্রমালিনে সকলায় কল়ঙ্করহিতায়
সকললোকৈককর্ত্রে সকললোকৈকভর্ত্রে সকললোকৈক সংহর্ত্রে সকললোকৈকগুরবে
সকললোকৈকসাক্ষিণে সকলনিগমগুহ্যায় সকলবেদান্তপারগায় সকললোকৈকবরপ্রদায়
সকললোকৈকশঙ্করায় শশাঙ্কশেখরায় শাশ্বতনিজাবাসায় নিরাভাসায়
নিরাময়ায় নির্মলায় নির্লোভায় নির্মদায় নিশ্চিন্তায় নিরহঙ্কারায় নিরঙ্কুশায়
নিষ্কল়ঙ্কায় নির্গুণায় নিষ্কামায় নিরুপপ্লবায় নিরবদ্যায় নিরন্তরায় নিষ্কারণায়
নিরাতঙ্কায় নিষ্প্রপঞ্চায় নিঃসঙ্গায় নির্দ্বন্দ্বায় নিরাধারায় নীরাগায় নিষ্ক্রোধায়
নির্মলায় নিষ্পাপায় নির্ভয়ায় নির্বিকল্পায় নির্ভেদায় নিষ্ক্রিয়ায় নিস্তুলায় নিঃসংশয়ায়
নিরঞ্জনায় নিরুপমবিভবায় নিত্যশুদ্ধবুদ্ধপরিপূর্ণসচ্চিদানন্দাদ্বয়ায় পরমশান্তস্বরূপায়
তেজোরূপায় তেজোময়ায় জয় জয় রুদ্র মহারৌদ্র মহাভদ্রাবতার মহাভৈরব কালভৈরব
কল্পান্তভৈরব কপালমালাধর খট্বাঙ্গ খড্গ চর্ম পাশাঙ্কুশ ডমরুক শূল চাপ
বাণ গদা শক্তি ভিণ্ডিপাল তোমর মুসল মুদ্গর পাশ পরিঘ ভুশুণ্ডি শতঘ্নি চক্রায়ুধ
ভীষণকর সহস্রমুখ দংষ্ট্রাকরাল়বদন বিকটাট্টহাস বিস্ফারিত ব্রহ্মাণ্ডমণ্ডল
নাগেন্দ্রকুণ্ডল নাগেন্দ্রহার নাগেন্দ্রবলয় নাগেন্দ্রচর্মধর মৃত্যুঞ্জয় ত্র্যম্বক ত্রিপুরান্তক
বিশ্বরূপ বিরূপাক্ষ বিশ্বেশ্বর বৃষভবাহন বিষবিভূষণ বিশ্বতোমুখ সর্বতোমুখ রক্ষ
রক্ষ মাং জ্বল জ্বল মহামৃত্যুমপমৃত্যুভয়ং নাশয় নাশয়  চোরভয়মুৎসাদয়োৎসাদয়
বিষসর্পভয়ং শময় শময় চোরান্মারয় মারয় মম শত্রূনুচ্চাটয়োচ্চাটয় ত্রিশূলেন
বিদারয় বিদারয় কুঠারেণ ভিন্ধি ভিন্ধি খড্গেন ছিন্ধি ছিন্ধি খট্বাঙ্গেন বিপোথয় বিপোথয়
সুসলেন নিষ্পেষয় নিষ্পেষয় বাণৈঃ সন্তাডয় সন্তাডয় রক্ষাংসি ভীষয় ভীষয়
শেষভূতানি বিদ্রাবয় বিদ্রাবয় কূষ্মাণ্ড বেতাল় মারীচ ব্রহ্মরাক্ষসগণান্ সন্ত্রাসয়
সন্ত্রাসয় মমাভয়ং কুরু কুরু বিত্রস্তং মামাশ্বাসয়াশ্বাসয় নরকমহাভয়ান্মামুদ্ধারয়োদ্ধারয়
অমৃতকটাক্ষ বীক্ষণেন মাম্ সঞ্জীবয় সঞ্জীবয় ক্ষুতৃড্ভ্যাং মামাপ্যায়যাপ্যায়য দুঃখাতুরং
মামানন্দয়ানন্দয় শিবকবচেন মামাচ্ছাদয়াচ্ছাদয় মৃত্যুঞ্জয় ত্র্যম্বক সদাশিব নমস্তে নমস্তে ।

ঋষভ উবাচ ॥

ইত্যেতৎকবচং শৈবং বরদং ব্যাহৃতং ময়া ।
সর্ববাধা প্রশমনং রহস্যং সর্বদেহিনাম্ ॥ ৩০॥

যঃ সদা ধারয়েন্মর্ত্যঃ শৈবং কবচমুত্তমম্।
ন তস্য জায়তে ক্বাপি ভয়ং শম্ভোরনুগ্রহাৎ ॥৩১॥

ক্ষীণায়ুঃ প্রাপ্তমৄত্যুর্বা মহারোগহতোঽপি বা ।
সদ্যঃ সুখমবাপ্নোতি দীর্ঘমায়ুশ্চ বিন্দতি ॥ ৩২॥

সর্বদারিদ্রশমনং সৌমঙ্গল্যবিবর্ধনম্ ।
যো ধত্তে কবচং শৈবং স দেবৈরপি পূজ্যতে ॥ ৩৩॥

মহাপাতকসঙ্ঘাতৈর্মুচ্যতে চোপপাতকৈঃ ।
দেহান্তে মুক্তিমাপ্নোতি শিববর্মানুভাবতঃ ॥৩৪॥

ত্বমপি শ্রদ্ধয়া বৎস শৈবং কবচসুত্তমম্ ।
ধারয়স্ব ময়া দত্তং সদ্যঃ শ্রেয়ো হ্যবাপ্স্যসি ॥ ৩৫॥

সূত উবাচ ॥

ইত্যুক্ত্বা ঋষভো যোগী তস্মৈ পার্থিবসূনবে ।
দদৌ শঙ্খং মহারাবং খড্গং চারিনিষূদনম্ ॥৩৬॥

পুনশ্চ ভস্ম সংমন্ত্র্য তদঙ্গং পরিতোঽস্পৃশৎ ।
গজানাং ষট্সহস্রস্য ত্রিগুণস্য বলং দদৌ ॥৩৭॥

ভস্মপ্রভাবাৎসম্প্রাপ্ত বলৈশ্বর্য ধৃতি স্মৃতিঃ ।
স রাজপুত্রঃ শুশুভে শরদর্ক ইব শ্রিয়া॥৩৮॥

তমাহ প্রাঞ্জলিং ভূয়ঃ স যোগী নৃপনন্দনম্ ।
এষ খড্গো ময়া দত্তস্তপোমন্ত্রানুভাবিতঃ ॥৩৯॥

শিতধারমিমং খড্গং যস্মৈ দর্শয়সে স্ফুটম্ ।
স সদ্যো ম্রিয়তে শত্রুঃ সাক্ষান্মৃত্যুরপি স্বয়ম্ ॥৪০॥

অস্য শঙ্খস্য নির্হ্রাদং যে শৃণ্বন্তি তবাহিতাঃ ।
তে মূর্চ্ছিতাঃ পতিষ্যন্তি ন্যস্তশস্ত্রা বিচেতনাঃ ॥৪১॥

খড্গশঙ্খাবিমৌ দিব্যৌ পরমন্যৌ বিনাশিনৌ ।
আত্মসৈন্য স্বপক্ষাণাং শৌর্যতেজোবিবর্ধনৌ ॥৪২॥

এতয়োশ্চ প্রভাবেণ শৈবেন কবচেন চ ।
দ্বিষট্সহস্রনাগানাং বলেন মহতাপি চ ॥ ৪৩॥

ভস্ম ধারণসামর্থ্যাচ্ছত্রুসৈন্যং বিজেষ্যসি ।
প্রাপ্ত সিংহাসনং পিত্র্যং গোপ্তাসি পৃথিবীমিমাম্ ॥৪৪॥

ইতি ভদ্রায়ুষং সম্যগনুশাস্য সমাতৃকম্ ।
তাভ্যাং সম্পূজিতঃ সোঽথ যোগী স্বৈরগতির্যযৌ ॥৪৫॥

ইতি শ্রীস্কন্দপুরাণে ব্রহ্মোত্তরখণ্ডে শিবকবচস্তোত্রং সম্পূর্ণম্ ॥