Suvarnamaalaa Stutih

ಅಥ ಕಥಮಪಿ ಮದ್ರಸನಾಂ ತ್ವದ್ಗುಣಲೇಶೈರ್ವಿಶೋಧಯಾಮಿ ವಿಭೋ |
ಸಾಂಬ ಸದಾಶಿವ ಶಂಭೋ ಶಙ್ಕರ ಶರಣಂ ಮೇ ತವ ಚರಣಯುಗಮ್ ||೧||

ಆಖಣ್ಡಲಮದಖಣ್ಡನಪಣ್ಡಿತ ತಣ್ಡುಪ್ರಿಯ ಚಣ್ಡೀಶ ವಿಭೋ |
ಸಾಂಬ ಸದಾಶಿವ ಶಂಭೋ ಶಙ್ಕರ ಶರಣಂ ಮೇ ತವ ಚರಣಯುಗಮ್ || ೨||

ಇಭಚರ್ಮಾಂಬರ ಶಂಬರರಿಪುವಪುರಪಹರಣೋಜ್ಜವಲನಯನ ವಿಭೋ |
ಸಾಂಬ ಸದಾಶಿವ ಶಂಭೋ ಶಙ್ಕರ ಶರಣಂ ಮೇ ತವ ಚರಣಯುಗಮ್  ||೩||

ಈಶ ಗಿರೀಶ ನರೇಶ ಪರೇಶ ಮಹೇಶ ಬಿಲೇಶಯಭೂಷಣ ಭೋ |
ಸಾಂಬ ಸದಾಶಿವ ಶಂಭೋ ಶಙ್ಕರ ಶರಣಂ ಮೇ ತವ ಚರಣಯುಗಮ್  ||೪||

ಉಮಯಾ ದಿವ್ಯಸುಮಙ್ಗಳವಿಗ್ರಹಯಾಲಿಙ್ಗಿತವಾಮಾಙ್ಗ ವಿಭೋ |
ಸಾಂಬ ಸದಾಶಿವ ಶಂಭೋ ಶಙ್ಕರ ಶರಣಂ ಮೇ ತವ ಚರಣಯುಗಮ್  ||೫||

ಊರೀಕುರು ಮಾಮಜ್ಞಮನಾಥಂ ದೂರೀಕುರು ಮೇ ದುರಿತಂ ಭೋ |
ಸಾಂಬ ಸದಾಶಿವ ಶಂಭೋ ಶಙ್ಕರ ಶರಣಂ ಮೇ ತವ ಚರಣಯುಗಮ್  ||೬||

ಋಷಿವರಮಾನಸಹಂಸ ಚರಾಚರಜನನಸ್ಥಿತಿಕಾರಣ ಭೋ |
ಸಾಂಬ ಸದಾಶಿವ ಶಂಭೋ ಶಙ್ಕರ ಶರಣಂ ಮೇ ತವ ಚರಣಯುಗಮ್  || ೭||

ಋಕ್ಷಾಧೀಶಕಿರೀಟ ಮಹೋಕ್ಷಾರೂಢ ವಿಧೃತರುದ್ರಾಕ್ಷ ವಿಭೋ |
ಸಾಂಬ ಸದಾಶಿವ ಶಂಭೋ ಶಙ್ಕರ ಶರಣಂ ಮೇ ತವ ಚರಣಯುಗಮ್  ||೮||

ಲೃವರ್ಣದ್ವನ್ದ್ವಮವೃನ್ತಸುಕುಸುಮಮಿವಾಙ್ಘ್ರೌ  ತವಾರ್ಪಯಾಮಿ ವಿಭೋ |
ಸಾಂಬ ಸದಾಶಿವ ಶಂಭೋ ಶಙ್ಕರ ಶರಣಂ ಮೇ ತವ ಚರಣಯುಗಮ್  ||೯||

ಏಕಂ ಸದಿತಿ ಶ್ರುತ್ಯಾ ತ್ವಮೇವ ಸದಸೀತ್ಯುಪಾಸ್ಮಹೇ ಮೃಡ ಭೋ |
ಸಾಂಬ ಸದಾಶಿವ ಶಂಭೋ ಶಙ್ಕರ ಶರಣಂ ಮೇ ತವ ಚರಣಯುಗಮ್  ||೧೦||

ಐಕ್ಯಂ ನಿಜಭಕ್ತೇಭ್ಯೋ ವಿತರಸಿ ವಿಶ್ವಂಭರೋಽತ್ರ ಸಾಕ್ಷೀ ಭೋ |
ಸಾಂಬ ಸದಾಶಿವ ಶಂಭೋ ಶಙ್ಕರ ಶರಣಂ ಮೇ ತವ ಚರಣಯುಗಮ್  || ೧೧||

ಓಮಿತಿ ತವ ನಿರ್ದೇಷ್ಟ್ರೀ ಮಾಯಾಽಸ್ಮಾಕಂ ಮೃಡೋಪಕರ್ತ್ರೀ ಭೋ |
ಸಾಂಬ ಸದಾಶಿವ ಶಂಭೋ ಶಙ್ಕರ ಶರಣಂ ಮೇ ತವ ಚರಣಯುಗಮ್  ||೧೨||

ಔದಾಸ್ಯಂ ಸ್ಫುಟಯತಿ ವಿಷಯೇಷು ದಿಗಮ್ಬರತಾ ಚ ತವೈವ ವಿಭೋ |
ಸಾಂಬ ಸದಾಶಿವ ಶಂಭೋ ಶಙ್ಕರ ಶರಣಂ ಮೇ ತವ ಚರಣಯುಗಮ್  ||೧೩||

ಅನ್ತಃ ಕರಣವಿಶುದ್ಧಿಂ ಭಕ್ತಿಂ ಚ ತ್ವಯಿ ಸತೀಂ ಪ್ರದೇಹಿ ವಿಭೋ |
ಸಾಂಬ ಸದಾಶಿವ ಶಂಭೋ ಶಙ್ಕರ ಶರಣಂ ಮೇ ತವ ಚರಣಯುಗಮ್  ||೧೪||

ಅಸ್ತೋಪಾಧಿಸಮಸ್ತವ್ಯಸ್ತೈ ರೂಪೈರ್ಜಗನ್ಮಯೋಽಸಿ ವಿಭೋ |
ಸಾಂಬ ಸದಾಶಿವ ಶಂಭೋ ಶಙ್ಕರ ಶರಣಂ ಮೇ ತವ ಚರಣಯುಗಮ್  ||೧೫||

ಕರುಣಾವರುಣಾಲಯ ಮಯಿ ದಾಸ ಉದಾಸಸ್ತವೋಚಿತೋ ನ ಹಿ ಭೋ |
ಸಾಂಬ ಸದಾಶಿವ ಶಂಭೋ ಶಙ್ಕರ ಶರಣಂ ಮೇ ತವ ಚರಣಯುಗಮ್  ||೧೬||

ಖಲಸಹವಾಸಂ ವಿಘಟಯ ಸತಾಮೇವ ಸಙ್ಗಮನಿಶಂ ಭೋ |
ಸಾಂಬ ಸದಾಶಿವ ಶಂಭೋ ಶಙ್ಕರ ಶರಣಂ ಮೇ ತವ ಚರಣಯುಗಮ್  || ೧೭||

ಗರಳಂ ಜಗದುಪಕೃತಯೇ ಗಿಲಿತಂ ಭವತಾ ಸಮೋಽಸ್ತಿ ಕೋಽತ್ರ ವಿಭೋ |
ಸಾಂಬ ಸದಾಶಿವ ಶಂಭೋ ಶಙ್ಕರ ಶರಣಂ ಮೇ ತವ ಚರಣಯುಗಮ್  || ೧೮||

ಘನಸಾರಗೌರಗಾತ್ರ ಪ್ರಚುರಜಟಾಜೂಟಬದ್ಧಗಙ್ಗ ವಿಭೋ |
ಸಾಂಬ ಸದಾಶಿವ ಶಂಭೋ ಶಙ್ಕರ ಶರಣಂ ಮೇ ತವ ಚರಣಯುಗಮ್  ||೧೯||

ಜ್ಞಪ್ತಿಃ ಸರ್ವಶರೀರೇಷ್ವಖಣ್ಡಿತಾ ಯಾ  ವಿಭಾತಿ ಸಾ ತ್ವಯಿ ಭೋ |
ಸಾಂಬ ಸದಾಶಿವ ಶಂಭೋ ಶಙ್ಕರ ಶರಣಂ ಮೇ ತವ ಚರಣಯುಗಮ್  || ೨೦||

ಚಪಲಂ ಮಮ ಹೃದಯಕಪಿಂ ವಿಷಯದುಚರಂ ದೃಢಂ ಬಧಾನ ವಿಭೋ |
ಸಾಂಬ ಸದಾಶಿವ ಶಂಭೋ ಶಙ್ಕರ ಶರಣಂ ಮೇ ತವ ಚರಣಯುಗಮ್  ||೨೧||

ಛಾಯಾ  ಸ್ಥಾಣೋರಪಿ ತವ ತಾಪಂ ನಮತಾಂ ಹರತ್ಯಹೋ ಶಿವ ಭೋ |
ಸಾಂಬ ಸದಾಶಿವ ಶಂಭೋ ಶಙ್ಕರ ಶರಣಂ ಮೇ ತವ ಚರಣಯುಗಮ್  ||೨೨||

ಜಯ ಕೈಲಾಸನಿವಾಸ ಪ್ರಮಥಗಣಾಧೀಶ ಭೂಸುರಾರ್ಚಿತ ಭೋ |
ಸಾಂಬ ಸದಾಶಿವ ಶಂಭೋ ಶಙ್ಕರ ಶರಣಂ ಮೇ ತವ ಚರಣಯುಗಮ್  || ೨೩||

ಝಣುತಕಝಙ್ಕಿಣುಝಣುತತ್ಕಿಟತಕಶಬ್ದೈರ್ನಟಸಿ ಮಹಾನಟ ಭೋ |
ಸಾಂಬ ಸದಾಶಿವ ಶಂಭೋ ಶಙ್ಕರ ಶರಣಂ ಮೇ ತವ ಚರಣಯುಗಮ್  ||೨೪||

ಜ್ಞಾನಂ ವಿಕ್ಷೇಪಾವೃತಿರಹಿತಂ ಕುರು ಮೇ ಗುರುಸ್ತ್ವಮೇವ ವಿಭೋ |
ಸಾಂಬ ಸದಾಶಿವ ಶಂಭೋ ಶಙ್ಕರ ಶರಣಂ ಮೇ ತವ ಚರಣಯುಗಮ್  ||೨೫||

ಟಙ್ಕಾರಸ್ತವ ಧನುಷೋ  ದಲಯತಿ ಹ್ರ‍ೃದಯಂ ದ್ವಿಷಾಮಶನಿರಿವ ಭೋ |
ಸಾಂಬ ಸದಾಶಿವ ಶಂಭೋ ಶಙ್ಕರ ಶರಣಂ ಮೇ ತವ ಚರಣಯುಗಮ್  || ೨೬||

ಠಾಕೃತಿರಿವ ತವ ಮಾಯಾ ಬಹಿರನ್ತಃ ಶೂನ್ಯರೂಪಿಣೀ ಖಲು ಭೋ |
ಸಾಂಬ ಸದಾಶಿವ ಶಂಭೋ ಶಙ್ಕರ ಶರಣಂ ಮೇ ತವ ಚರಣಯುಗಮ್  || ೨೭||

ಡಂಬರಮಂಬುರುಹಾಮಪಿ ದಲಯತ್ಯನಘಂ ತ್ವದಙ್ಘ್ರಿಯುಗಳಂ ಭೋ |
ಸಾಂಬ ಸದಾಶಿವ ಶಂಭೋ ಶಙ್ಕರ ಶರಣಂ ಮೇ ತವ ಚರಣಯುಗಮ್  || ೨೮||

ಢಕ್ಕಾಕ್ಷಸೂತ್ರಶೂಲದ್ರುಹಿಣಕರೋಟೀಸಮುಲ್ಲಸತ್ಕರ ಭೋ |
ಸಾಂಬ ಸದಾಶಿವ ಶಂಭೋ ಶಙ್ಕರ ಶರಣಂ ಮೇ ತವ ಚರಣಯುಗಮ್  || ೨೯||

ಣಾಕಾರಗರ್ಭಿಣೀ ಚೇಚ್ಛುಭದಾ ತೇ ಶರಣಗತಿರ್ನೃಣಾಮಿಹ ಭೋ |
ಸಾಂಬ ಸದಾಶಿವ ಶಂಭೋ ಶಙ್ಕರ ಶರಣಂ ಮೇ ತವ ಚರಣಯುಗಮ್  || ೩೦||

ತವ ಮನ್ವತಿಸಞ್ಜಪತಃ ಸದ್ಯಸ್ತರತಿ ನರೋ ಹಿ ಭವಾಬ್ಧಿಂ ಭೋ |
ಸಾಂಬ ಸದಾಶಿವ ಶಂಭೋ ಶಙ್ಕರ ಶರಣಂ ಮೇ ತವ ಚರಣಯುಗಮ್  ||೩೧

ಥೂತ್ಕಾರಸ್ತಸ್ಯ ಮುಖೇ ಭೂಯಾತ್ತೇ ನಾಮ ನಾಸ್ತಿ ಯಸ್ಯ ವಿಭೋ |
ಸಾಂಬ ಸದಾಶಿವ ಶಂಭೋ ಶಙ್ಕರ ಶರಣಂ ಮೇ ತವ ಚರಣಯುಗಮ್  || ೩೨||

ದಯನೀಯಶ್ಚ ದಯಾಳುಃ ಕೋಽಸ್ತಿ ಮದನ್ಯಸ್ತ್ವದನ್ಯ ಇಹ ವದ ಭೋ |
ಸಾಂಬ ಸದಾಶಿವ ಶಂಭೋ ಶಙ್ಕರ ಶರಣಂ ಮೇ ತವ ಚರಣಯುಗಮ್  ||೩೩||

ಧರ್ಮಸ್ಥಾಪನದಕ್ಷ ತ್ರ್ಯಕ್ಷ ಗುರೋ ದಕ್ಷಯಜ್ಞಶಿಕ್ಷಕ ಭೋ |
ಸಾಂಬ ಸದಾಶಿವ ಶಂಭೋ ಶಙ್ಕರ ಶರಣಂ ಮೇ ತವ ಚರಣಯುಗಮ್  ||೩೪||

ನನು ತಾಡೀತೋಽಸಿ ಧನುಷಾ ಲುಬ್ಧಧಿಯಾ ತ್ವಂ ಪುರಾ ನರೇಣ ವಿಭೋ |
ಸಾಂಬ ಸದಾಶಿವ ಶಂಭೋ ಶಙ್ಕರ ಶರಣಂ ಮೇ ತವ ಚರಣಯುಗಮ್  || ೩೫||

ಪರಿಮಾತುಂ ತವ ಮೂರ್ತಿಂ ನಾಲಮಜಸ್ತತ್ಪರಾತ್ಪರೋಽಸಿ ವಿಭೋ|
ಸಾಂಬ ಸದಾಶಿವ ಶಂಭೋ ಶಙ್ಕರ ಶರಣಂ ಮೇ ತವ ಚರಣಯುಗಮ್  || ೩೬||

ಫಲಮಿಹ ನೃತಯಾ ಜನುಷಸ್ತ್ವತ್ಪದಸೇವಾ ಸನಾತನೇಶ ವಿಭೋ |
ಸಾಂಬ ಸದಾಶಿವ ಶಂಭೋ ಶಙ್ಕರ ಶರಣಂ ಮೇ ತವ ಚರಣಯುಗಮ್  || ೩೭||

ಬಲಮಾರೋಗ್ಯಂ ಚಾಯುಸ್ತ್ವದ್ಗುಣರುಚಿತಾಂ ಚಿರಂ ಪ್ರದೇಹಿ ವಿಭೋ |
ಸಾಂಬ ಸದಾಶಿವ ಶಂಭೋ ಶಙ್ಕರ ಶರಣಂ ಮೇ ತವ ಚರಣಯುಗಮ್  || ೩೮||

ಭಗವನ್ ಭರ್ಗ ಭಯಾಪಹ ಭೂತಪತೇ ಭೂತಿಭೂಷಿತಾಙ್ಗ ವಿಭೋ |
ಸಾಂಬ ಸದಾಶಿವ ಶಂಭೋ ಶಙ್ಕರ ಶರಣಂ ಮೇ ತವ ಚರಣಯುಗಮ್  || ೩೯||

ಮಹಿಮಾ ತವ ನಹಿ ಮಾತಿ ಶ್ರುತಿಷು ಹಿಮಾನೀಧರಾತ್ಮಜಾಧವ ಭೋ |
ಸಾಂಬ ಸದಾಶಿವ ಶಂಭೋ ಶಙ್ಕರ ಶರಣಂ ಮೇ ತವ ಚರಣಯುಗಮ್  || ೪೦||

ಯಮನಿಯಮಾದಿಭಿರಙ್ಗೈರ್ಯಮಿನೋ ಹೃದಯೇ ಭಜನ್ತಿ ಸ ತ್ವಂ ಭೋ |
ಸಾಂಬ ಸದಾಶಿವ ಶಂಭೋ ಶಙ್ಕರ ಶರಣಂ ಮೇ ತವ ಚರಣಯುಗಮ್  || ೪೧||

ರಜ್ಜಾವಹಿರಿವ ಶುಕ್ತೌ ರಜತಮಿವ ತ್ವಯಿ ಜಗನ್ತಿ ಭಾನ್ತಿ ವಿಭೋ |
ಸಾಂಬ ಸದಾಶಿವ ಶಂಭೋ ಶಙ್ಕರ ಶರಣಂ ಮೇ ತವ ಚರಣಯುಗಮ್  || ೪೨||

ಲಬ್ಧ್ವಾ ಭವತ್ಪ್ರಸಾದಾಚ್ಚಕ್ರಂ ವಿಧುರವತಿ ಲೋಕಮಖಿಲಂ ಭೋ |
ಸಾಂಬ ಸದಾಶಿವ ಶಂಭೋ ಶಙ್ಕರ ಶರಣಂ ಮೇ ತವ ಚರಣಯುಗಮ್  || ೪೩||  

ವಸುಧಾತದ್ಧರತಚ್ಛಯರಥಮೌರ್ವೀಶರಪರಾಕೃತಾಸುರ ಭೋ |
ಸಾಂಬ ಸದಾಶಿವ ಶಂಭೋ ಶಙ್ಕರ ಶರಣಂ ಮೇ ತವ ಚರಣಯುಗಮ್  || ೪೪||  

ಶರ್ವ ದೇವ ಸರ್ವೋತ್ತಮ ಸರ್ವದ ದುರ್ವೃತ್ತಗರ್ವಹರಣ ವಿಭೋ |
ಸಾಂಬ ಸದಾಶಿವ ಶಂಭೋ ಶಙ್ಕರ ಶರಣಂ ಮೇ ತವ ಚರಣಯುಗಮ್  || ೪೫||

ಷಡ್ರಿಪುಷಡೂರ್ಮಿಷಡ್ವಿಕಾರಹರ ಸನ್ಮುಖ ಷಣ್ಮುಖಜನಕ ವಿಭೋ |
ಸಾಂಬ ಸದಾಶಿವ ಶಂಭೋ ಶಙ್ಕರ ಶರಣಂ ಮೇ ತವ ಚರಣಯುಗಮ್  || ೪೬||

ಸತ್ಯಂ ಜ್ಞಾನಮನನ್ತಂ ಬ್ರಹ್ಮೇತ್ಯೇತಲ್ಲಕ್ಷಣಲಕ್ಷಿತ ಭೋ |
ಸಾಂಬ ಸದಾಶಿವ ಶಂಭೋ ಶಙ್ಕರ ಶರಣಂ ಮೇ ತವ ಚರಣಯುಗಮ್  || ೪೭||

ಹಾಹಾಹೂಹೂಮುಖಸುರಗಾಯಕಗೀತಪದಾನವದ್ಯ ವಿಭೋ |
ಸಾಂಬ ಸದಾಶಿವ ಶಂಭೋ ಶಙ್ಕರ ಶರಣಂ ಮೇ ತವ ಚರಣಯುಗಮ್  || ೪೮||

ಳಾದಿರ್ನ ಹಿ ಪ್ರಯೋಗಸ್ತದನ್ತಮಿಹ ಮಙ್ಗಳಂ ಸದಾಽಸ್ತು ವಿಭೋ |
ಸಾಂಬ ಸದಾಶಿವ ಶಂಭೋ ಶಙ್ಕರ ಶರಣಂ ಮೇ ತವ ಚರಣಯುಗಮ್  || ೪೯||

ಕ್ಷಣಮಿವ ದಿವಸಾನ್ನೇಷ್ಯತಿ ತ್ವತ್ಪದಸೇವಾಕ್ಷಣೋತ್ಸುಕಃ ಶಿವ ಭೋ |
ಸಾಂಬ ಸದಾಶಿವ ಶಂಭೋ ಶಙ್ಕರ ಶರಣಂ ಮೇ ತವ ಚರಣಯುಗಮ್  ||೫೦||

ಇತಿ ಶ್ರೀಮತ್ಪರಮಹಂಸಪರಿವ್ರಾಜಕಾಚಾರ್ಯಶ್ರೀಗೋವಿನ್ದಭಗವತ್ಪೂಜ್ಯಪಾದಶಿಷ್ಯಸ್ಯ
ಶ್ರೀಶಙ್ಕರಭಗವತಃ ಕೃತೌ ಸುವರ್ಣಮಾಲಾಸ್ತುತಿಃ ಸಂಪೂರ್ಣಾ||