Tattvaryastavam Hymn on Lord Nataraja at Chidambaram

tattvāryāstavaḥ Hymn on Lord Nataraja at Chidambaram
tattvāryāstavaḥ

śivakāmasundarīśaṁ śivagaṅgātīrakalpitaniveśam |
śivamāśraye dyukeśaṁ śivamicchanmā vapuṣyabhiniveśam || 1||

gīrvāṇacakravartī gīścetomārgadūratovartī |
bhaktāśayānuvartī bhavatu naṭeśo'khilāmayanivartī || 2||

vaiyāghrapādabhāgyaṁ vaiyāghraṁ carma kaṁcana vasānam |
vaiyākaraṇaphaṇīḍyaṁ vaiyāsikyā girā stutaṁ praṇumaḥ || 3||

hāṭakasabhānivāsaḥ śāṭakatāpannasakalaharidantaḥ |
ghoṭakanigamo māyānāṭakasākṣī jagatpatirjayati || 4||

śailūṣarājamādyaṁ mālūraprasavamālikābharaṇam |
pīlūpamo'ndhujīryacchālūrābhaḥ kathaṁ vijānīyām || 5||

kanakasabhaikaniketaṁ kaṭhinapurāṇoktisārasaṁketam |
nārādhayanti ke taṁ nārāyaṇyā yutaṁ svatoketam || 6||

tillavane kṣullavane pallavasaṁbhinnaphullapuṣpaghane |
cillaharīmullalayan vallabhayā bhillatallajo naṭati || 7||

vairājahṛtsaroje vairājādyaiḥ sa sāmabhiḥ stavyaḥ |
vairāgyādiguṇāḍhyaiḥ vairādyutsṛjya dṛśyate nṛtyan || 8||

ḍhakkāninadaiḥ sūtrāṇyaṅgadanādairaho mahadbhāṣyam |
vyākaraṇasya vivṛṇvan nṛtyati bhṛtyān kṛtārthayan martyān || 9||

naṭanāyaka naṭanāya ka iha sukṛtī no tava spṛhayet |
manjulatāmañjulatāmahite vastuṁ ca tillavane || 10||

atiduritottārakṛte ciradhṛtaharṣaḥ sabhāpatiḥ sadyaḥ |
agaṇeyāghaghanaṁ māmāsādyānandameduro naṭati || 11||

matpādalagnajanatāmuddhartāsmīti citsabhānāthaḥ |
tāṇḍavamiṣoddhṛtaikasavāṅghriḥ sarvān vibodhayati || 12||

āpannalokapālini kapālini strīkṛtāṅgapālini me |
śamitavidhiśrīśaraṇe śaraṇā dhīrastu citsabhāśaraṇe || 13||

bhikṣurmaheśvaro'pi śrutyā proktaḥ śivo'pyugraḥ |
api bhavahārī ca bhavo naṭo'pi citraṁ sabhānāthaḥ || 14||

nṛtyannaṭeśamaulitvaṅgadgaṅgātaraṅgaśīkariṇaḥ |
bhūṣāhipītaśiṣṭāḥ punantu māṁ tillavanavātāḥ || 15||

kanakasabhāsamrājo naṭanārambhe jhalaṁjhalaṁjhaliti |
mañjīramañjuninadā dhvaniyuḥ śrotre kadā nu mama || 16||

parvatarājatanūjākucataṭasaṁkrāntakuṅkumonmiśrāḥ |
naṭanārbhaṭīvidhūtā bhūtikaṇāste spṛśeyurapi me'ṅgam || 17||

naṭanoccalatkapālāmarditacandrakṣaratsudhāmilitāḥ |
ādinaṭamaulitaṭinīpṛṣato gotre'tra me skhaleyuḥ kim || 18||

paśyāni sabhādhīśaṁ kadā nu taṁ mūrdhani sabhādhīśam |
yaḥ kṣayarasikaṁ kālaṁ jitavān dhatte ca śirasi kaṅkālam || 19||

tanujāyātanujāyāsaktānāṁ durlabhaṁ sabhānātham |
nagatanayā nagatanayā vaśayati dattvā śarīrārdham || 20||

ānandatāṇḍavaṁ yastaveśa paśyenna cāpi nṛgaṇe yaḥ |
sa ca sa ca na candramaule vidvadbhirjanmavatsu vigaṇeyaḥ || 21||

kāmaparavaśaṁ kṛtvā kāmaparavaśaṁ tvakṛtvā mām |
kanakasabhāṁ gamayasi re kanakasabhāṁ hā na yāpayasi || 22||

naṭanaṁ vihāya śaṁbhorghaṭanaṁ pīnastanībhirāśāsse |
aṭanaṁ bhave durante viṭa nandasi na svabhūmasukham || 23||

kalitabhavalaṅghanānāṁ kiṁ karaiva citsukhaghanānām |
sumudāṁ sāpaghanānāṁ śivakāmeśyāḥ kṛpāmṛtaghanānām || 24||

ninilīye māyāyāṁ na viliye vā śucā paraṁ līye |
ānandasīmani lasattillavanīdhāmani svabhūmani tu || 25||

adhihemasabhaṁ prasabhaṁ bisabhaṅgavadānyadhanyarucam |
śrutagalagaralaṁ saralaṁ nirataṁ bhaktāvane bhaje devam || 26||

sabhayā citsabhayāsīnmāyā māyāprabodhaśītaruceḥ |
suhitā dhīḥ suhitā me somā somārdhadhāriṇī mūrtiḥ || 27||

patyā hemasabhāyāḥ satyānandaikacidvapuṣā |
katyārtā na trātā nṛtyāyattena mādṛśā martyāḥ || 28||

bhajatāṁ mumukṣayā tvāṁ naṭeśa labhayāstrayaḥ pumarthāśca |
phalalipsayāmrabhājāṁ chāyāsaurabhyamādhavya iva || 29||

kañcukapañcakanaddhaṁ naṭayasi māṁ kiṁ naṭeśa nāṭayasi |
naṭasi nirāvṛtisukhito jahi māyāṁ tvādṛśo'hamapi tat syām || 30||

āstāṁ naṭeśa tadyannaṭati bhavānambare nirālambe |
tvannaṭane'pi hi naṭanaṁ vedapurānāgamāḥ samādadhati || 31||

vedhasi sarvādhīśe'medhasi vā mādṛśe sarūpakṛtā |
rodhasi śivagaṅgāyā bodhasirā kācidullasati || 32||

haṭṭāyitaṁ vimukteḥ kuṭṭākaṁ taṁ bhajāmi māyāyāḥ |
bhaṭṭārakaṁ sabhāyāḥ kiṭṭātmanyaṅgake tyajanmamatām || 33||

śrīmaccidambareśādanyatrānandatāṇḍavāsaktāt |
brāhmaṁ lakṣaṇamāste kutracidānandarūpatā deve || 34||

kṣullakakāmakṛte'pi tvatsevā syādvimuktimapi dātrī |
pītāmṛto'pyudanyāśāntyai syāccitsabhādhipāmartyaḥ || 35||

satyaṁ satyaṁ gatyantaramutsṛjya te padāpātyam |
atyantārtaṁ bhṛtyaṁ na tyaja nityaṁ naṭeśa māṁ pāhi || 36||

ṣaṭtriṁśatā tattvamayībhirābhiḥ sopānabhūtābhirumāsahāyam |
āryābhirādyaṁ paratattvabhūtaṁ cidambarānandanaṭaṁ bhajadhvam || 37||

        || iti śrītattvāryāstavaḥ saṁpūrṇaḥ||

Back to Transliterated Stotras Page
Back to Sanskrit Scriptures and Stotras Page
Back to stotras in many languages
Back to Shaivam Home Page