Mrityunjaya Manasa Pooja Stotram

śrī mṛtyuñjaya mānasika pūjā stotram

kailāse kamanīyaratnakhacite kalpadrumūle sthitaṁ
karpūrasphaṭikendusundaratanuṁ kātyāyanīsevitam |
gaṅgātuṅgataraṅgarañjitajaṭābhāraṁ kṛpāsāgaraṁ
kaṇṭhālaṁkṛtaśeṣabhūṣaṇamamuṁ mṛtyuñjayaṁ bhāvaye || 1||

āgatya mṛtyuñjaya candramaule
vyāghrājinālaṁkṛta śūlapāṇe |
svabhaktasaṁrakśaṇakāmadheno
prasīda viśveśvara pārvatīśa || 2||

bhāsvanmauktikatoraṇe marakatastambhāyudhālaṁkṛte
saudhe dhūpasuvāsine maṇimaye māṇikyadīpāñcite |
brahmendrāmarayogipuṅgavagaṇairyukte ca kalpadrumaiḥ
śrīmṛtyuñjaya susthiro bhava vibho māṇikyasiṁhāsane || 3||

mandāramallīkaravīramādhavī-
punnāganīlotpalacampakānvitaiḥ |
karpūrapāṭīrasuvāsitairjalai-
rādhatsva mṛtyuñjaya pādyamuttamam || 4||

sugandhapuṣpaprakaraiḥ suvāsitai-
rviyannadīśītalavāribhiḥ śubhaiḥ |
trilokanāthārtiharārghyamādarā-
dgṛhāṇa mṛtyuñjaya sarvavandita || 5||

himāmbuvāsitaistoyaiḥ śītalairatipāvanaiḥ |
mṛtyuñjaya mahādeva śuddhācamanamācara || 6||

guḍadadhisahitaṁ madhuprakīrṇaṁ
sughṛtasamanvitadhenudugdhayuktam |
śubhakaramadhuparkamāhara tvaṁ
trinayana mṛtyuhara trilokavandya || 7||

pañcāsra śānta pañcāsya pañcapātakasaṁhara |
pañcāmṛtasnānamidaṁ kuru mṛtyuñjaya prabho || 8||

jagatrayīkhyāta samastatīrtha-
samāhṛtaiḥ kalmaṣahāribhiśca |
snānaṁ sutoyaiḥ samudācara tvaṁ
mṛtyuñjayānandaguṇāabhirāma || 9||

ānītenātiśubhreṇa kauśeyenāmaradrumāt |
mārjayāmi jaṭābhāraṁ śiva mṛtyuñjaya prabho || 10||

nānāhemavicitrāṇi cīracīnāmbarāṇi ca |
vividhāni ca divyāni mṛtyuñjaya sudhāraya || 11||

viśiddhamuktāphalajālaramyaṁ
manoharaṁ kāñcanahemasūtram |
yajñnopavītaṁ paramaṁ pavitra-
mādhatsva mṛtyuñjaya bhaktigamya || 12||

śrīgandhaṁ ghanasārakuṅkumayutaṁ kastūrikāpūritaṁ
kāleyena himāmbunā viracittaṁ mandārasaṁvāsitam |
divyaṁ devamanoharaṁ maṇimaye pātre samāropitaṁ
sarvāṅgeṣu vilepayāmi satataṁ mṛtyuñjaya śrīvibho || 13||

akśatairdhavalairdivyaiḥ samyaktilasamanvitaiḥ |
mṛtyuñjaya mahādeva pūjayāmi vṛṣadhvaja || 14||

campakapaṅkajakundaiḥ
karavīramallikākusumaiḥ |
vistāraya nijamakuṭaṁ
mṛtyuñjaya puṇḍarīkanayanāpta || 15||    

māṇikyapādukādvandve maunihṛtpadmamandire |
pādau sadpadmasadṛśau mṛtyuñjaya niveśaya || 16||

māṇikyakeyūrakirīṭahāraiḥ
kāñcīmaṇisthāpitakudmalaiśca |
mañjīramukhyābharaṇairmanojñai-
raṅgāni mṛtyuñjaya bhūṣayāmi || 17||

gajavadanaskandadhṛte-
nātisvacchena cāmarayugena |
galadalakānanapadmaṁ
mṛtyuñjaya bhāvayāmi hṛtpadme || 18||

muktātapatraṁ śaśikoṭiśubhraṁ
śubhapradaṁ kāñjanadaṇḍayuktam |
māṇikyasaṁsthāpitahemakumbhaṁ
sureśa mṛtyuñjaya te'rpayāmi || 19||

maṇimukure niṣpaṭale
trijagadgāḍhāndhakārasaptāśve |
kandarpakoṭīsadṛśaṁ
mṛtyuñjaya paśya vadanamātmīyam || 20||

karpūracūrṇaṁ kapilājyapūtaṁ
dāsyāmi kāleyasamānvitaiśca |
samudbhavaṁ pāvanagandhadhūpitaṁ
mṛtyuñjayāṅgaṁ parikalpayāmi || 21||

vartitrayopetamakhaṇḍadīptyā
tamoharaṁ brāhmamathāntaraṁ ca |
sājyaṁ samastāmaravargahṛdyaṁ
sureśā  mṛtyuñjaya vaṁśadīpam || 22||

rājānnaṁ madhurānvitaṁ ca mṛdulaṁ māṇikyapātre sthitaṁ
hiṅgūjīrakasanmarīcamilitaiḥ śākairanekaiḥ śubhaiḥ |
śākaṁ samyagapūpasūpasahitaṁ sadyoghṛtenāplutaṁ
śrīmṛtyuñjaya pārvatīpriya vibho sāpośanaṁ bhujyatām || 23||

kūṣmāṇḍavārtākapaṭolikānāṁ
phalāni ramyāṇi ca kāravallyā |
supākayuktāni sasaurabhāṇi
śrīkaṇṭha mṛtyuñjaya bhakśayeśa || 24||

śītalaṁ madhuraṁ svacchaṁ pāvanaṁ vāsitaṁ laghu |
madhye svīkuru pānīyaṁ śiva mṛtyuñjaya prabho || 25||

śarkarāmilitaṁ snigdhaṁ dugdhānnaṁ godhṛtānvitam |
kadalīphalasaṁmiśraṁ bhujyatāṁ mṛtyusaṁhara || 26||

kevalamatimādhuryaṁ 
dugdhaiḥ snigdhaiśca śarkarāmilitaiḥ |
elāmarīcamilitaṁ 
mṛtyuñjaya deva bhuṅkśva paramānnam || 27||

rambhācūtakapitthakaṇṭhakaphalairdrākśārasāsvāduma-
tkharjūrairmadhurekśukhaṇḍaśakalaiḥ sannārikelāmbubhiḥ |
karpūreṇa suvāsitairguḍajalairmādhuryayuktairvibho
śrīmṛtyuñjaya pūraya tribhuvanādhāraṁ viśālodaram || 28||

manojñarambhāvanakhaṇḍakhaṇḍitā-
nrucipradānsarṣapajīrakāṁśca |
sasaurabhānsaindhavasevitāṁśca
gṛhāṇa mṛtyuñjaya lokavandya || 29||

hiṅgūjīrakasahitaṁ 
vimalāmalakaṁ kapitthamatimadhuram |
bisakhaṇḍāllāvaṇyayutā-
nmṛtyuñjaya te'rpayāmi jagadīśa || 30||

elāśuṇṭhīsahitaṁ
dadhyannaṁ cāruhemapātrastham |
amṛtapratinidhimāḍhyaṁ
mṛtyuñjaya bhujyatāṁ trilokeśa || 31||

jambīranīrāñcitaśṛṅgaberaṁ
manoharānamlaśalāṭukhaṇḍān |
mṛdūpadaṁśānsahitopabhuṅkśva
mṛtyuñaya śrīkaruṇāsamudra || 32||

nāgararāmaṭhayuktaṁ
sulalitajambīranīrasaṁpūrṇam |
mathitaṁ saindavasahitaṁ
piba hara mṛtyuñjaya kratudhvaṁsin || 33||

mandārahemāmbujagandhayuktai-
rmandākinīnirmalapuṇyatoyaiḥ |
gṛhāṇa mṛtyuñjaya pūrṇakāma
śrīmatparāpośanamabhrakeśa || 34||

gaganadhunīvimalajalai-
rmṛtyuñjaya padmarāgapātragataiḥ |
mṛgamadacandanapūrṇaṁ
prakśālaya cāru hastapādayugmam || 35||

punnāgamallikākundavāsitairjāhnavījalaiḥ |
mṛtyuñjaya mahādeva punarācamanaṁ kuru || 36||

mauktikacūrṇasametai-
rmṛgamadaghanasāravāsitaiḥ pūgaiḥ |
parṇaiḥ svarṇasamānai-
rmṛtyuñjaya te'rpayāmi tāmbūlam || 37||

nīrājanaṁ nirmaladīptmādbhi-
rdīpāṅkurairujjvalamucchritaiśca |
ghaṇṭāninādena samarpayāmi
mṛtyuñjayāya tripurāntakāya || 38||

viriñcimukhyāmaravṛndavandite
sarojamatsyāṅkitacakracihnite |
dadāmi mṛtyuñjaya pādapaṅkaje 
phaṇīndrabhūṣe punararghyamīśvara || 39||

punnāganīlotpalakundajātī-
mandāramallīkaravīrapaṅkajaiḥ |
puṣpāñjaliṁ bilvadalaistulasyā
mṛtyuñjayāṅghrau viniveśayāmi || 40||

pade pade sarvamanonikṛndanaṁ
pade pade sarvaśubhapradāyakam |
pradakśiṇaṁ bhaktiyutena cetasā
karomi mṛtyuñjaya rakśa rakśa mām || 41||

namo gaurīśāya sphaṭikadhavalāṅgāya ca namo
namo lokeśāya stutivibudhalokāya ca namaḥ |
namaḥ śrīkaṇṭhāya kśapitapuradaityāya ca namo
namaḥ phālākśāya smaramadavināśāya ca namaḥ || 42||

saṁsāre janitāparogasahite tapatrayākrandite
nityaṁ putrakalatravittavilasatpāśairnibaddhaṁ dṛḍham |
garvāndhaṁ bahupāpavargasahitaṁ kāruṇyadṛṣṭyā vibho
śrīmṛtyuñjaya pārvatīpriya sadā māṁ pāhi sarveśvara || 43||

saudhe ratnamaye navotpaladalākīrṇe ca talpāntare
kauśeyena manohareṇa dhavalenācchādite sarvaśaḥ |
karpūrāñcitadīpadīptimilite ramyopadhānadvaye
pārrvatyāḥ karapadmalālitapadaṁ mṛtyuñjayaṁ bhāvaye || 44||

catuścatvāriṁśadvilasadupacārairabhimatai-
rmanaḥ padme bhaktyā bahirapi ca pūjāṁ śubhakarīm |
karoti pratyūṣe niśi divasamadhye'pi ca pumā-
nprayāti śrīmṛtyuñjayapadamanekādbhutapadam || 45||

prātarliṅgamumāpateraharahaḥ saṁdarśanātsvargataṁ
madhyāhne hayamedhatulyaphaladaṁ sāyaṁtane mokśadam |
bhānorastamane pradoṣasamaye pañcākśarārādhanaṁ
tatkālatrayatulyamiṣṭaphaladaṁ sadyo'navadyaṁ dṛḍham || 46||

|| iti śrīmacchāṅkarabhagavataḥ kṛtau mṛtyuñjayamānasikapūjāstotraṁ saṁpūrṇam ||

Back to Transliterated Stotras Page
Back to Sanskrit Scriptures and Stotras Page
Back to Scriptures and Stotras Page
Back to Shaivam Home Page