Dakshinamurti Varnamala Stotram

This Page is courtesy of Sanskrit Documents List. Please send your corrections
This stotra is also available in devanAgari PDF
dakṣiṇāmūrtivarṇamālāstotram

ommityetadyasya budhairnāma gṛhītaṁ
yadbhāsedaṁ bhāti samastaṁ viyadādi |
yasyājñātaḥ svasvapadasthā vidhimukhyā-
staṁ pratyañcaṁ dakṣiṇavaktraṁ kalayāmi || 1||

namrāṅgāṇāṁ bhaktimatāṁ yaḥ puruṣārthā-
ndatvā kṣipraṁ hanti ca tatsarvavipattīḥ |
pādāmbhojādhastanitāpasmṛtimīśaṁ
taṁ pratyañcaṁ dakṣiṇavaktraṁ kalayāmi || 2||

mohadhvastyai vaiṇikavaiyāsikimukhyāḥ
saṁvinmudrāpustakavīṇākṣaguṇānyam |
hastāmbhojairbibhratamārādhitavanta-
staṁ pratyañcaṁ dakṣiṇavaktraṁ kalayāmi || 3||

bhadrārūḍhaṁ bhadradamārādhayitṛṇāṁ
bhaktiśraddhāpūrvakamīśaṁ praṇamanti |
ādityā yaṁ vāñchitasiddhyai karuṇābdhiṁ
taṁ pratyañcaṁ dakṣiṇavaktraṁ kalayāmi || 4||

garbhāntaḥsthāḥ prāṇina ete bhavapāśa-
cchede dakṣaṁ niścitavantaḥ śaraṇaṁ yam |
ārādhyāṅghriprasphuradambhoruhayugmaṁ
taṁ pratyañcaṁ dakṣiṇavaktraṁ kalayāmi || 5||

vaktraṁ dhanyāḥ saṁsṛtivārdheratimātrā-
dbhītāḥ santaḥ pūrṇaśaśāṅkadyuti yasya |
sevente'dhyāsīnamanantaṁ vaṭamūlaṁ
taṁ pratyañcaṁ dakṣiṇavaktraṁ kalayāmi || 6||

tejaḥstomairaṅgadasaṁghaṭṭitabhāsva-
nmāṇikyotthairbhāsitaviśvo rucirairyaḥ |
tejomūrtiṁ khānilatejaḥpramukhābdhiṁ
taṁ pratyañcaṁ dakṣiṇavaktraṁ kalayāmi || 7||

dadhyājyādidravyakakarmāṇyakhilāni
tyaktvā kāṅkṣā karmaphaleṣvatra karoti |
yajjijñāsāṁ rūpaphalārthī kṣitideva-
staṁ pratyañcaṁ dakṣiṇavaktraṁ kalayāmi || 8||

kṣipraṁ loke yaṁ bhajamānaḥ pṛthupuṇyaḥ
pradhvastādhiḥ projjhitasaṁsṛtyakhilārtiḥ |
pratyagbhūtaṁ brahma paraṁ sanramate ya-
staṁ pratyañcaṁ dakṣiṇavaktraṁ kalayāmi || 9||

ṇānetyevaṁ yanmanumadhyasthitavarṇā-
nbhaktāḥ kāle varṇagṛhītyai prajapantaḥ |
modante saṁprāptasamastaśrutitantrā-
staṁ pratyañcaṁ dakṣiṇavaktraṁ kalayāmi || 10||

mūrtiśchāyānirjitamandākinikunda-
prāleyāmbhorāśisudhābhūtisurebhā |
yasyābhrābhā hāsavidhau dakṣaśirodhi-
staṁ pratyañcaṁ dakṣiṇavaktraṁ kalayāmi || 11||

taptasvarṇacchāyajaṭājūṭakaṭāha-
prodyadvīcīvallivirājatsurasindhum |
nityaṁ sūkṣmaṁ nityanirastākhiladoṣaṁ
taṁ pratyañcaṁ dakṣiṇavaktraṁ kalayāmi || 12||

yena jñātenaiva samastaṁ viditaṁ syā-
dyasmādanyadvastu jagatyāṁ śaśaśṛṅgam |
yaṁ prāptānāṁ nāsti paraṁ prāpyamanādiṁ
taṁ pratyañcaṁ dakṣiṇavaktraṁ kalayāmi || 13||

matto māro yasya lalāṭākṣibhavāgni-
sphūrjatkīlaproṣitabhasmīkṛtadehaḥ |
tadbhasmāsīdyasya sujātaḥ paṭavāsa-
staṁ pratyañcaṁ dakṣiṇavaktraṁ kalayāmi || 14||

hyambhorāśau saṁsṛtirūpe luṭhatāṁ ta-
tpāraṁ gantuṁ yatpadabhaktirdṛḍhanaukā |
sarvārādhyaṁ sarvagamānandapayonidhiṁ
taṁ pratyañcaṁ dakṣiṇavaktraṁ kalayāmi || 15||

medhāvī syādinduvataṁsaṁ dhṛtavīṇaṁ
karpūrābhaṁ pustakahastaṁ kamalākṣam |
citte dhyāyanyasya vapurdrāṅnimiṣārdhaṁ
taṁ pratyañcaṁ dakṣiṇavaktraṁ kalayāmi || 16||

dhāmnāṁ dhāma prauḍharucīnāṁ paramaṁ ya-
tsūryādīnāṁ yasya sa heturjagadādeḥ |
etāvānyo yasya na sarveśvaramīḍyaṁ
taṁ pratyañcaṁ dakṣiṇavaktraṁ kalayāmi || 17||

pratyāhāraprāṇanirodhādisamarthai-
rbhaktairdāntaiḥ saṁyatacittairyatamānaiḥ |
svātmatvena jñāyata eva tvarayā ya-
staṁ pratyañcaṁ dakṣiṇavaktraṁ kalayāmi || 18||

jñāṁśībhūtānprāṇina etānphaladātā
cittāntaḥsthaḥ prerayati sve sakale'pi |
kṛtye devaḥ prāktanakarmānusaraḥ saṁ-
staṁ pratyañcaṁ dakṣiṇavaktraṁ kalayāmi || 19||

prajñāmātraṁ prāpitasaṁbinnijabhaktaṁ
prāṇākṣādeḥ prerayitāraṁ praṇavārtham |
prāhuḥ prājñā viditānuśravatattvā-
staṁ pratyañcaṁ dakṣiṇavaktraṁ kalayāmi || 20||

yasyāṁjñānādeva nṛṇāṁ saṁsṛtibodho
yasya jñānādeva vimokṣo bhavatīti |
spaṣṭaṁ brūte vedaśiro deśikamādyaṁ
taṁ pratyañcaṁ dakṣiṇavaktraṁ kalayāmi || 21||

channe'vidyārūpapaṭenaiva ca viśvaṁ
yatrādhyastaṁ jīvapareśatvamapīdam |
bhānorbhānuṣvambuvadastākhilabhedaṁ
taṁ pratyañcaṁ dakṣiṇavaktraṁ kalayāmi || 22||

svāpasvapnau jāgradavasthāpi na yatra
prāṇaśvetaḥ sarvagato yaḥ sakalātmā |
kūṭastho yaḥ kevalasaccitsukharūpa-
staṁ pratyañcaṁ dakṣiṇavaktraṁ kalayāmi || 23||

hā hetyevaṁ vismayamīyurmunimukhyā
jñāte yasminsvātmatayānātmavimohaḥ |
pratyagbhūte brahmaṇi yātaḥ kathamitthaṁ
taṁ pratyañcaṁ dakṣiṇavaktraṁ kalayāmi || 24||

yaiṣā ramyairmattamayūrābhidhavṛttai-
rādau klṛptā yanmanuvarṇairmunibhaṅgī |
tāmevaitāṁ dakṣiṇavaktraḥ kṛpayāsā-
vūrīkuryāddeśikasamrāṭ paramātmā || 25||

iti śrīmatparamahaṁsaparivrajakācāryasya
śrigovindabhagavatpūjyapādaśiṣyasya
śrīmacchaṁkarabhagavatpāda kṛtau
śrīdakṣiṇāmūrtivarṇamālāstotraṁ saṁpūrṇam ||
Back to Transliterated Stotras Page
Back to Scriptures and Stotras Page
Back to Shaivam Home Page